ថ្ងៃទី១១ ខែវិច្ឆិកា ឆ្នាំ២០២២នេះ អង្គការអាគ្រីស៊ុត បានសម្របសម្រួលកម្មវិធីបេីកដំណើរការជាផ្លូវការ បន្ទាយក្រអូបឃុនរាម ជាគម្រោងមួយ ដែលបានរៀបចំឡេីងដោយសមាគមអ្នកដាំបន្លែសុវត្ថិភាពសៀមរាប មានគោលដៅចំបងសម្រាប់កែច្នៃផលិតផលកសិកម្ម ដើម្បីលើកកម្ពស់ជីវភាព និងចូលរួមដោះស្រាយបញ្ហាទីផ្សារកសិកម្មរបស់ប្រជាកសិករបន្ទាប់ពីប្រមូលផល។
សិប្បកម្មសមាគមនេះ ស្ថិតនៅក្នុងភូមិទួសគ្រួស ឃុំឃុនរាម ស្រុកបន្ទាយស្រី ខេត្តសៀមរាប ដែលមានការចូលរួមពីកសិករក្នុងមូលដ្ឋានប្រមាណ១៩គ្រួសារ ដែលអាចកែច្នៃចេញជាប្រេងក្រអូប និងសមាជិកផ្សេងទៀតរបស់សមាគម មកពីតំបន់ជាយក្រុងសៀមរាប មានសមត្ថភាពកែច្នៃផលិតផលកសិកម្ម ដែលសរុបមានចំនួនប្រម៉ាណ ១០ប្រភេទ ក្នុងនោះរួមមានផលិតផលភេសជ្ជៈសុខភាព គ្រឿងទេស ប្រេងក្រអូប ថ្នាំពុលធម្មជាតិជាដើម។
លោក ជិញ ភារ: អនុប្រធានគម្រោងអង្គការអាគ្រីស៊ុតកម្ពុជា បញ្ជាក់ថា គម្រោងបន្ទាយក្រអូបឃុនរាម នឹងចូលរួមបង្កើតការងារសម្រាប់ប្រជាជនក្នុងតំបន់ ផ្សព្វផ្សាយផលិតផលកសិករ ចែករំលែក និងធ្វើនវានុវត្តន៍លើដំណើរការកែច្នៃកសិផលនៅក្នុងខេត្តសៀមរាប។ គម្រោងនេះដែរ មានការផ្តួចផ្តើមឡើងដោយសមាគមអ្នកដាំបន្លែសុវត្ថិភាពសៀមរាប ក្រោមការផ្តល់ជំនួយមូលនិធិ និងបច្ចេកទេសដោយគម្រោងប្រពលវប្បកម្ម និងពិពិធកម្មកម្មកសិកម្ម តំបន់ជាយក្រុង សៀមរាប របស់អង្គការអាគ្រីស៊ុត ប្រចាំប្រទេសកម្ពុជា។
លោក ភន់ សុខុម អភិបាលស្រុកបន្ទាយស្រីស្ដីទី លើកឡើងថា ស្រុកបន្ទាយស្រីជាតំបន់ដ៏មានសក្ដានុពល សម្រាប់ភ្ញៀវទេសចរជាតិ និងអន្តរជាតិ និងជាឱកាសក្នុងការផ្សព្វផ្សាយផលិតផលក្នុងតំបន់ផងដែរ។ ជាមួយនេះ ការបង្កើតបន្ទាយក្រអូបឃុនរាម
របស់អង្គការអាគ្រីស៊ុតនេះ បានចូលរួមចំណែកជាមួយរដ្ឋាភិបាលកម្ពុជា ក៏ដូចជាអាជ្ញាធរមូលដ្ឋាន ក្នុងការលើកកម្ពស់ជីវភាពប្រជាពលរដ្ឋ ឱ្យមានមុខរបរ និងបង្កើនប្រាក់ចំណូល ជាមួយនឹងបច្ចេកទេសកែច្នៃផលិតផលកសិកម្ម ដូចជាបន្លែ ផ្លែឈើ និងចិញ្ចិមសត្វ ជាដើម។
លោក ទុំ អ៊ត់ កសិករក្នុងគម្រោង លើកឡើងថា រូបលោក និងសមាជិកជាក្រុមផលិតប្រេងក្រអូបភ្នំក្បាលស្ពានបានលេីកឡេីងថា ផលិតផលដែលក្រុមលោកផលិតបាន បានទទួលបានការគាំទ្រទាំងបច្ចេកទេស និងថវិកាពីអង្គការអាគ្រីស៊ុត រីឯទីផ្សារសមាគមអ្នកដាំបន្លែសុវត្តិភាពខេត្តសៀមរាប ជាអ្នកសម្របសម្រួល។
