នៅសណ្ឋាគារអេមព្រីសអង្គរ ខេត្តសៀមរាប គណៈកម្មាធិការសិទ្ធិមនុស្សកម្ពុជាកម្ពុជា បានធ្វើជាម្ចាស់ផ្ទះដឹកនាំកិច្ចប្រជុំពិសេសលើកទី២ ឆ្នាំ២០២២ របស់គណៈកម្មការអន្តររដ្ឋាភិបាលអាស៊ាន ទទួលបន្ទុកសិទ្ធិមនុស្ស (អាយឆា-AICHR) ដែលមានរយៈពេល ២ថ្ងៃ ចាប់ពីថ្ងៃទី១៦-១៧ ខែវិច្ឆិកា ឆ្នាំ២០២២។
កិច្ចប្រជុំនេះប្រព្រឹត្តិទៅក្រោមការដឹកនាំដោយឯកឧត្តម កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី ប្រធានគណៈកម្មាធិការសិទ្ធិមនុស្សកម្ពុជា តំណាងកម្ពុជាប្រចាំអាយឆា និងជាប្រធានអាយឆា ឆ្នាំ២០២២ ដោយមានការចូលរួមពីតំណាងប្រទេសជាសមាជិកអាស៊ានទាំងអស់ប្រចាំអាយឆា និងលេខាធិការដ្ឋានអាស៊ានផងដែរ។
កិច្ចប្រជុំនេះដែរ ក៏បានធ្វើការពិនិត្យទៅលើខ្លឹមសារនៃសេចក្ដីព្រាងរបាយការណ៍មួយចំនួន ពាក់ព័ន្ធទៅនឹងកិច្ចប្រជុំរបស់ AICHR កិច្ចជំនួបនានារវាង AICHR ជាមួយភាគីពាក់ព័ន្ធ និងកម្មវិធីផ្សេងៗ ដែលបានរៀបចំនាពេលកន្លងមក។ បន្ថែមលើនេះកិច្ចប្រជុំក៏បានពិភាក្សាទៅលើវឌ្ឍនភាពនៃឯកសារ ទស្សនទាន សកម្មភាព និងរបាយការណ៍នៃសកម្មភាព កម្មវិធីមួយចំនួនរបស់ AICHR ដែលពាក់ព័ន្ធនឹងការប្រើប្រាស់បច្ចេកវិទ្យាព័ត៌មាន និងទូរគមនាគមន៍ក្នុងការលើកកម្ពស់ និងការពារសិទ្ធិសុខភាព សិទ្ធិទទួលបានទឹកស្អាត និងអនាម័យ អន្តរសាសនា ការវាយតម្លៃលើផលប៉ះពាល់បរិស្ថានដោយផ្អែកលើអភិក្រមសិទ្ធិមនុស្ស និងការបញ្ជ្រាបសិទ្ធិជនមានពិការភាព។
ព័ត៌មានជាតិ ថ្មីៗ
ជាមួយគ្នានោះ ឯកឧត្តម កែវ រ៉េមី ប្រធានអាយឆា ក៏នឹងដឹកនាំគណៈប្រតិភូ AICHR ជួបប្រជុំដាច់ដោយឡែកមួយ ជាមួយក្រុមការងារអង្គការសហប្រជាជាតិ ដឹកនាំដោយ លោកស្រី Cynthia Veliko តំណាងប្រចាំតំបន់អាស៊ីអគ្នេយ៍ នៃការិយាល័យឧត្តមស្នងការសិទ្ធិមនុស្សអង្គការសហប្រជាជាតិ ក្នុងគោលបំណងពង្រឹងទំនាក់ទំនង និងកិច្ចសហប្រតិបត្តិការរវាងអាយឆា និងអង្គការសហប្រជាជាតិ សំដៅធ្វើការការពារ និងលើកកម្ពស់សិទ្ធិមនុស្សក្នុងតំបន់អាស៊ាន៕
អត្ថបទ និងរូបភាព៖ លោក អ៊ុន ណារាជ្យ
