នៅព្រឹកថ្ងៃទី១៨ ខែវិច្ឆិកា ឆ្នាំ២០២២នេះ ក្រសួងកិច្ចការនារី បានបើកយុទ្ធនាការអប់រំផ្សព្វផ្សាយស្ដីពី “ជំងឺមហារីកមាត់ស្បូន មហារីកសុដន់ អាហារូបត្ថម្ភ និងចំណេះដឹងហិរញ្ញវត្ថុ” តាមរយៈគម្រោងលើកកម្ពស់សុខភាព និងហិរញ្ញវត្ថុសម្រាប់ស្ត្រីកម្ពុជា ដើម្បីរួមចំណែកលើកកម្ពស់សមភាពយេនឌ័រ និងសិទ្ធិស្ត្រីនៅក្នុវិស័យសុខភាព ដែលពិធីនេះធ្វើឡើងក្នុងសាលាអនុវិទ្យាល័យចាន់សរ ឃុំចាន់សរ ស្រុកសូទ្រនិគម ខេត្តសៀមរាប។
លោកជំទាវ សាន្ត អរុណ រដ្ឋលេខាធិការក្រសួងកិច្ចការនារី មានប្រសាសន៍ថា នៅក្នុងប្រទេសកម្ពុជា ជំងឺមហារីកមាត់ស្បូន និងមហារីកសុដន់ ជាជំងឺមួយក្នុងចំណោមជំងឺមិនឆ្លងទាំង៤ ដែលកំពុងតែកើនឡើង និងជាមូលហេតុនៃការស្លាប់ជាងពាក់កណ្តាលក្នុងចំណោមការស្លាប់ទាំងអស់នៅប្រទេសកម្ពុជា បើប្រៀបធៀប គឺអត្រាស្លាប់ស្ត្រីច្រើនជាងបុរស ហើយត្រូវបានគេព្យាករណ៍ថា នឹងកើនឡើងថែមទៀត ដោយសារតែផលវិបាកនៃការផ្លាស់ប្ដូររបៀបរស់នៅ និងបរិស្ថានដែលកំពុងតែមានការប្រែប្រួលរួមទាំងចំណីអាហារ។ ជាមួយគ្នានោះបញ្ហាកង្វះអាហារូបត្ថម្ភស្រួចស្រាវ និងរ៉ាំរ៉ៃក្នុងចំណោមស្ត្រី និងកុមារនៅខ្ពស់ធ្វើឱ្យប៉ះពាល់ធ្ងន់ធ្ងរដល់អភិវឌ្ឍសុខភាព និងស្មារតីនៅដំណាក់កាលក្រោយៗ នៃជីវិតរស់នៅ ដូចជាការបាត់បង់កំលាំងពលកម្ម ការធ្លាក់ខ្លួនឈឺ មានពិការភាព អំពើហិង្សាទាក់ទងនឹងយេនឌ័រ ភាពក្រីក្រ និងតម្រូវឱ្យមានការខាតបង់ថវិការជាច្រើនទៅលើការចំណាយលើការថែទាំសុខភាពសម្រាប់ស្ត្រី និងសមាជិកគ្រួសារ។
បើតាមលោកស្រី យូរ សុភា អភិបាលរងខេត្តសៀមរាប មានប្រសាសន៍ថា ដើម្បីឆ្លើយតបនឹងបញ្ហាទាំងអស់ខាងលើនេះ នាយកដ្ឋានស្ត្រី និងសុខភាព ក្រសួងកិច្ចការនារី សហការជាមួយយមន្ទីរកិច្ចការនារីខេត្ត បានរៀបចំយុទ្ធនាការអប់រំផ្សព្វផ្សាយដល់សហគមន៍ស្ដីពី “ជំងឺមហារីកមាត់ស្បូន មហារីកសុដន់ អាហារូបត្ថម្ភ និងចំណេះដឹងហិរញ្ញវត្ថុ” នៅខេត្តសៀមរាបនេះ គឺក្រោមការឧបត្ថម្ភថវិកាពីក្រុមហ៊ុនធានារ៉ាប់រងអាយុជីវិត អេ អាយ អេ (ខេមបូឌា) ក្នុងគោលបំណងផ្តល់ចំណេះដឹងដល់ប្រជាជនឱ្យយល់ដឹងកាន់តែច្បាស់ ចេះពិនិត្យស្ទាបរកជំងឺមហារីកសុដន់ដោយខ្លួនឯងបាន និងទៅទទួលយកសេវាព្យាបាលទាន់ពេលវេលានៅមូលដ្ឋានសុខាភិបាល រួមទាំងចំណេះដឹងស្តីពីអាហារូបត្ថម្ភ កែប្រែទម្លាប់នៃការបរិភោគអាហារឱ្យកាន់តែប្រសើរឡើង។
លោកស្រី យូរ សុភា បានបង្ហាញទៀតថា យុទ្ធនាការនេះ នឹងផ្ដល់ផលប្រយោជន៍ដល់ប្រជាជនគោលដៅជាពិសេសស្រ្តី និងគ្រួសារ និងបានចូលរួមកាត់បន្ថយអត្រាស្លាប់របស់ប្រជាជនកម្ពុជាដោយសារជំងឺមិនឆ្លង ដែលចែងក្នុងផែនការសកម្មភាពពហុវិស័យជាតិស្តីពី ការការពារ និងការប្រយុទ្ធនឹងជំងឺឆ្លង លើចំនុចសំខាន់២ គឺ៖ ១.បង្ការប្រជាជនមិនឲ្យមានជំងឺមិនឆ្លងកាន់តែច្រើនឡើង និង២.សម្រាលភាពធ្ងន់ធ្ងររបស់អ្នកជំងឺមិនឆ្លង មិនឲ្យធ្លាក់ខ្លួនជាជនមានពិការភាព និងឆាប់ស្លាប់។ ក្នុងនោះ ៨០% នៃជំងឺមិនឆ្លងអាចការពារបាន បើសិនជាមានអន្តាគមន៍ដ៏មានប្រសិទ្ធភាពខ្ពស់ជាច្រើន សូម្បីតែអ្នកជំងឺដែលមានជំងឺមិនឆ្លងរួចទៅហើយ ក៏អាចរក្សាសុខភាពល្អជាធម្មតាជាមួយសមាជិកគ្រួសារ និងសង្គមដែលមានផលិតភាពតាមរយៈការរួមបញ្ចូលគ្នានូវការថែទាំសុខភាពបឋម ការគ្រប់គ្រងខ្លួនឯង ដោយកាត់បន្ថយកត្តាហានិភ័យនៃជំងឺមិនឆ្លងដូចជាកុំប្រើប្រាស់គ្រឿងស្រវឹង ថ្នាំជក់ កាត់បន្ថយការប្រើប្រាស់អំបិល និងជាតិខ្លាញ់ក្នុងអាហារ និងការធ្វើលំហាត់ប្រាណជាប្រចាំ និងទៀងទាត់ជាដើម៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
