នៅសណ្ឋាគារអេមព្រីសអង្គរ ខេត្តសៀមរាប នាព្រឹកថ្ងៃទី១៨ ខែវិច្ឆិកា ឆ្នាំ២០២២នេះ ក្នុងនាមជាម្ចាស់ផ្ទះ អាយឆាកម្ពុជា បានដឹកនាំរៀបចំពិធីអបអរសាទរខួបលើកទី១០ នៃសេចក្តីប្រកាសសិទ្ធិមនុស្សអាស៊ាន និងសេចក្តីថ្លែងការណ៍ភ្នំពេញ ស្ដីពីការអនុម័តសេចក្ដីប្រកាសសិទ្ធិមនុស្សអាស៊ាន (AICHR) ដែលពិធីនេះប្រព្រឹត្តិទៅក្រោមអធិបតីភាព ឯកឧត្តម កិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រី និងជាប្រធានអង្គភាពប្រឆាំងអំពើពុករលួយកម្ពុជា និង ឯកឧត្តម កែវ រ៉េមី តំណាងកម្ពុជាប្រចាំអាយឆា និងមានការចូលរួមពីតំណាងអាយឆា នៃប្រទេសអាស៊ានទាំងអស់ ព្រមទាំងលេខាធិកាដ្ឋានអាស៊ានផងដែរ។
តំណាងកម្ពុជាប្រចាំអាយឆា ឯកឧត្តម កែវ រ៉េមី បានបញ្ជាក់ពីលទ្ធផលរបស់អាយឆាកម្ពុជា ដែលអនុវត្តបានក្នុងរយៈ ១០ឆ្នាំមកនេះ។ ក្នុងនោះវឌ្ឍនភាពនៃការអនុវត្តកម្មវិធី/សកម្មភាពអាទិភាពរបស់អាយឆា ឆ្នាំ២០២២ ដែលពាក់ព័ន្ធនឹងសិទ្ធិកុមារ សិទ្ធិជនមានពិការភាព សិទ្ធិមនុស្សនិង បរិស្ថាន ធុរកិច្ច និងសិទ្ធិមនុស្ស និងការជួញដូរមនុស្សជាដើម។ ការអនុវត្តក្របខណ្ឌត្រួតពិនិត្យ និងវាយតម្លៃផែនការការងារប្រាំឆ្នាំរបស់អាយឆា ២០២១-២០២៥ វិធាននៃនីតិវិធីសម្រាប់មូលនិធិអាយឆា រួមទាំងគោលការណ៍ណែនាំស្តីពីទំនាក់ទំនងខាងក្រៅរបស់អាយឆា។ ឯកឧត្តម ក៏បានបង្ហាញនូវសុទិដ្ឋិនិយម និងសេចក្តីរំពឹងយ៉ាងមុតមាំថា អាយឆា-ឥណ្ឌូនេស៊ី ក្នុងនាមជាប្រធានអាយឆាឆ្នាំ២០២៣ នឹងបន្តដឹកនាំបេសកកម្មសិទ្ធិមនុស្សនេះ ឱ្យសម្រេចបានលទ្ធផលថ្មីៗបន្ថែមទៀត ដើម្បីជាឧត្តមប្រយោជន៍របស់ប្រជាជនអាស៊ាន ទាំងក្នុងពេលបច្ចុប្បន្ន និងអនាគតទៅមុខទៀត។
មានប្រសាសន៍ក្នុងឱកាសនោះដែរ ឯកឧត្តម កិត្តិនីតិកោសលបណ្ឌិត ឱម យ៉ិនទៀង បានថ្លែងការកោតសរសើរពីកិច្ចខិតខំប្រឹងប្រែងរបស់អាយឆា ក្នុងការអនុវត្តសេចក្តីប្រកាសសិទ្ធិមនុស្សអាស៊ាន និងសេចក្តីថ្លែងការណ៍ភ្នំពេញ ស្តីពីការអនុម័តសេចក្ដីប្រកាសសិទ្ធិមនុស្សអាស៊ាន។ ដោយអនុលោមតាមមាត្រា១១ នៃធម្មនុញ្ញរបស់អាស៊ាន ហើយអាស៊ានត្រូវបង្កើតឲ្យមានស្ថាប័នអប់រំ ក្នុងគោលបំណងលើកកម្ពស់ និងការពារសិទ្ធិមនុស្ស និងសេរីភាពជាមូលដ្ឋាន។ កត្តានេះហើយទើបគណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស (AICHR) ត្រូវបានបង្កើតឡើងនៅឆ្នាំ២០០៩ ដែលជាស្ថាប័នមានការទទួលខុសត្រូវជារួម ដោយគ្រប់ដណ្តប់លើការលើកកម្ពស់ការពារសិទ្ធិមនុស្ស និងសេរីភាពជាមូលដ្ឋាន ក្នុងតំបន់អាស៊ាន។
ឯកឧត្តមមានប្រសាសន៍បន្តថា ក្រោយការបង្កើត AICHR សមទ្ធិផលរួមដ៏សំខាន់ៗជាច្រើនត្រូវបានសម្រេចលើការបង្កើតឧបករណ៍ស្នូលនៃការការពារ និងលើកកម្ពស់សិទ្ធិមនុស្សរបស់អាស៊ាន និងសម្រាប់កិច្ចសហប្រតិបត្តិការសិទ្ធិមនុស្សអាស៊ាននៅក្នុងតំបន់ដែលហៅថា សេចក្តីប្រកាសសិទ្ធិមនុស្សអាស៊ាន និងសេចក្តីថ្លែងការណ៍ភ្នំពេញ ស្ដីពីការអនុម័ត សេចក្ដីប្រកាសសិទ្ធិមនុស្សអាស៊ាន នៅឆ្នាំ២០១២ ក្នុងឱកាសកិច្ចប្រជុំកំពូលអាស៊ានលើកទី២១ នៅរាជធានីភ្នំពេញ។
ឯកឧត្តម ទេសរដ្ឋមន្ត្រី មានប្រសាសន៍បញ្ជាក់ថា សម្រាប់ឆ្នាំ២០២២នេះ គឺជាខួបគម្រប់ ១០ឆ្នាំ នៃសេចក្តីប្រកាសសិទ្ធិមនុស្សអាស៊ាន និងសេចក្តីថ្លែងការណ៍ភ្នំពេញស្ដីពីការអនុម័ត សេចក្ដីប្រកាសសិទ្ធិមនុស្សអាស៊ាន។ ក្នុងរយៈពេល ១ទស្សវត្សនេះ ដើមី្បលើកកម្ពស់ និងការពារសិទ្ធិមនុស្សក្នុងតំបន់អាស៊ាន ដែលត្រូវបានបញ្ជា្រប់ចូលទៅក្នុងមូលដ្ឋាននៃតំបន់អាស៊ាន ក្នុងការការពារសិទ្ធិមនុស្សក្នុងគោលការណ៍ ដើម្បីជាឧត្តមប្រយោជន៍របស់ប្រជាជាតិអាស៊ាន ទាំងក្នុងពេលបច្ចុប្បន្ន និងអនាគត។ ឯកឧត្តមក៏បានជម្រុញ AICHR ដែលជាស្ថាប័នគ្រប់ដណ្តប់ក្នុងការលើកកម្ពស់ និងការការពារសិទ្ធិមនុស្សក្នុងតំបន់អាស៊ាន និងត្រូវបន្តខិតខំប្រឹងប្រែង ដើមី្បលើកកម្ពស់ក្នុងការការពារសិទ្ធិមនុស្សឲ្យស្របតាមសេចក្តីប្រកាសសិទ្ធិមនុស្សអាស៊ាន និងសេចក្តីថ្លែងការណ៍ភ្នំពេញ ស្ដីពីការអនុម័ត សេចក្ដីប្រកាសសិទ្ធិមនុស្សអាស៊ាន តាមរយៈបញ្ជ្រាបសិទ្ធិមនុស្ស ទៅក្នុងសសរស្តម្ភទាំងបី ដែលមានសហគមន៍សេដ្ឋកិច្ចអាស៊ាន ,សហគមន៍វប្បធម៌អាស៊ាន និងបន្តពង្រឹងកិច្ចសហប្រតិបត្តិការល្អ រវាងរដ្ឋក្នុងតំបន់អាស៊ានផងដែរ៕
អត្ថបទ និងរូបភាព៖ លោក អ៊ុន ណារាជ្យ, លោក ម៉ី សុខារិទ្ធ
