ឯកឧត្តម លីវ សុខុន ទីប្រឹក្សាក្រសួង ជាប្រធានមន្ទីរព័ត៌មានខេត្តសៀមរាប និងជាប្រធានក្រុមការងារថ្នា់ក់កណ្ដាលចុះមូលដ្ឋានឃុំស្លែងស្ពាន និង សហការី ដោយមានការចូលរួមពីលោក ហ៊ន់ ឬទ្ធិ អភិបាលស្រុកស្រីស្នំ បាននាំយកនូវឯកសណ្ឋានប្រជាការពារ ចំនួន៤២សម្រាប់ ជាអំណោយរបស់ក្រុមការងារមន្ទីរព័ត៌មានខេត្តសៀមរាប ត្រូវបានប្រគល់ជូនដល់កម្លាំងប្រជាការពារក្នុងឃុំស្លែងស្ពាន ស្រុកស្រីស្នំ នៅប៉ុស្តិ៍នគរបាលរដ្ឋបាលឃុំស្លែងស្ពាន នាព្រឹកថ្ងៃទី១៩ ខែវិច្ឆិកា ឆ្នាំ២០២២នេះ។
មានប្រសាសន៍ក្នុងឱកាសនោះ ឯកឧត្តម លីវ សុខុន បានបញ្ជាក់ថា នេះជាលើកទី២សម្រាប់ឆ្នាំ២០២២នេះ ចំពោះការផ្ដល់ជូននូវឯកសណ្ឋានប្រជាការពារ ខណៈកាលពីលើកទី១ បានប្រគល់ជូនបានចំនួន២៥សម្រាប់ ដើម្បីបំពេញភាកិច្ចប្រចាំថ្ងៃ ក្នុងការការពារសន្ថិសុខ និង សុវត្ថិភាពជូនបងប្អូនប្រជាពលរដ្ឋក្នុងឃុំ ស្របតាមគោលនយោបាយភូមិឃុំមានសុវត្ថិភាព ដូច្នេះដើម្បីឆ្លើយតបនឹងស្មារតីជួយគ្នាទៅវិញទៅមកនេះ ទើបឯកឧត្តម និងក្រុមការងារបានកៀរគររកថវិកា និងសម្ភារៈផ្សេងៗពីសប្បុរសជននានា រួមនឹងធនធានផ្ទាល់ខ្លួនយកមកជួយឧបត្ថម្ភដល់បងប្អូនជាបន្តបន្ទាប់។
ជាមួយគ្នានោះដែរឯកឧត្តម លីវ សុខុន បានថ្លែងកោតសរសើរដល់ស្នាដៃសកម្មភាពក្នុងរយៈពេលកន្លងមករបស់ប្រជាការពារក្នុងមូលដ្ឋានទាំងអស់ ដែលមានឆន្ទៈមុតមាំ ក្នុងការសហការចូលរួមការពារសុវត្ថិភាពក្នុងមូលដ្ឋានរបស់ខ្លួន ជាមួយមន្ត្រីមានសមត្ថកិច្ចគ្រប់ជាន់ថ្នាក់ ខណៈបច្ចុប្បន្ននេះ កម្លាំងប្រជាការពារភូមិ គឺបានចូលរួមចំណែកយ៉ាងច្រើនក្នុងការការពារសន្តិសុខ និងសុវត្ថិភាពនៅក្នុងមូលដ្ឋាន បើទោះជាពួកគាត់មិនបានទទួលប្រាក់ខែក៏ដោយ ក៏ឆន្ទៈ និងទឹកចិត្តរបស់ពួកគាត់ នៅតែឈរលើជំហរសាមគ្គីភាព ស្រឡាញ់រាប់អានគ្នា ចេះជួយទុកធុរៈគ្នាទៅវិញទៅមក ចូលរួមបញ្ចៀសនូវបទល្មើសផ្សេងៗដែលកើតឡើងជាយថាហេតុក្នុងមូលដ្ឋាន។
ឯកឧត្តម លីវ សុខុន មានប្រសាសន៍ទៀតថា ការចូលរួមដ៏សកម្មរបស់កម្លាំងប្រជាការពារភូមិនេះដែរ គឺអាចចាត់ទុកថា ជាកម្លាំងស្នូលដ៏សំខាន់នៅមូលដ្ឋានដោយផ្ទាល់ មិនថាស្ថិតនៅក្នុងកាលៈទេសៈលំបាកយ៉ាងណាក៏ដោយ ប៉ុន្តែប្រការសំខាន់នោះ សូមឲ្យបន្តស្មារតីជួយគ្នាទៅវិញទៅមក ក្នុងការការពារសន្ថិសុខ និង សុវត្ថិភាពជូនបងប្អូនប្រជាពលរដ្ឋក្នុងឃុំ ស្របតាមគោលនយោបាយភូមិឃុំមានសុវត្ថិភាព ដើម្បីសេចក្ដីសុខក្សេមក្សាន្តរបស់បងប្អូនប្រជាពលរដ្ឋយើង ពីព្រោះសេចក្ដីសុខនេះហើយ ដែលជាចំណែកមួយយ៉ាងសំខាន់ក្នុងការលើកកម្ពស់ជីវភាពរបស់ប្រជាពលរដ្ឋយើង ឲ្យកាន់តែមានការរីកចម្រើនឡើងជាំលំដាប់។
មានប្រសាសន៍ក្នុងឱកាសនោះដែរ លោក ហ៊ន់ ឬទ្ធិ អភិបាលស្រុកស្រីស្នំ បានថ្លែងអំណរគុណចំពោះឯកឧត្តមប្រធានមន្ទីរព័ត៌មានខេត្តសៀមរាប រួមនឹងក្រុមការងារទាំងអស់ ដែលតែងតែមានការយកចិត្តទុកដាក់ខ្ពស់ពីសុខទុក្ខរបស់បងប្អូនប្រជាការពារក្នុងមូលដ្ឋានឃុំស្លែងស្ពាន ដោយបានធ្វើការឧបត្ថម្ភនូវរាល់សម្ភារៈ ថវិការ រួមនឹងគ្រឿងឧបភោគបរិភោគជូនដល់កងកម្លាំងប្រជាការពារភូមិយើងជាបន្តបន្ទាប់ ដែលជាក់ស្ដែងថ្ងៃនេះ សម្រាប់ការប្រគល់ជូននូវឯកសណ្ឋានថ្មីបន្ថែមដល់បងប្អូនប្រជាការពារភូមិនាពេលនេះដែរ គឺជាការបង្ហាញឲ្យឃើញពីការយកចិត្តទុកបន្ថែមទៀតដល់កម្លាំងយើង ហើយជាការផ្ដល់នូវកម្លាំងចិត្ត និងពង្រឹងស្មារតីបន្ថែមទៀតដល់កងកម្លាំងទាំងអស់ ដើម្បីមានទំនុកចិត្ត និងទឹកចិត្តក្នុងការពារបំពេញភារកិច្ចការងារ ការពារសន្ថិសុខ សុវត្តិភាពក្នុងមូលដ្ឋាន ធ្វើយ៉ាងឲ្យមូលដ្ឋានមានភាពសុខដុមរមនា ភូមិឃុំមានសុវត្ថិភាព មានការរីកចម្រើនលើគ្រប់វិស័យ លុបបំបាត់រាល់ភាពអសន្តិសុខ ករណីគ្រឿងញៀន ករណីចោរកម្ម និងករណីផ្សេងៗទៀត។
សូមជម្រាបថា អំណោយដែលបាននាំយកមកប្រគល់ជូនកងកម្លាំងប្រជាការពារភូមិនាពេលនេះដែរ មានឯកសណ្ឋានប្រជាការពារចំនួន ៤២សម្រាប់ រួមទាំងគ្រឿងឧបភោគបរិភោគ និងថវិកាមួយចំនួន។ ជាមួយគ្នានេះដែរ លោក ហ៊ន់ ឬទ្ធិ អភិបាលស្រុកស្រីស្នំ ក៏បានឧបត្ថម្ភបន្ថែមនូវ អង្ករចំនួន ១ការុង, ត្រីខ ៥យួរ, ទឹកត្រី-ទឹកស៊ីអ៊ីវ ៤យួរ និងភេសជ្ជៈមួយចំនួនទៀតផង ៕
អត្ថបទ និងរូបភាព៖ លោក អ៊ុន ណារាជ្យ
កែសម្រួល៖ លោក លីវ សាន្ត
