អគារសិក្សាថ្មីចំនួន ៣ខ្នង ស្មើនឹង២៥បន្ទប់ ដែលជាអំណោយរបស់សមាគម ជួយប្រជាពលរដ្ឋកម្ពុជាលើផ្នែកអប់រំ និងសុខភាព នៃប្រទេសជប៉ុន ហៅកាត់ថាសិក (SCHEC) ត្រូវបានកាត់ខ្សែបូរសម្ពោធដាក់ឱ្យប្រើប្រាស់ជាផ្លូវការណ៍នៅព្រឹកថ្ងៃទី២១ ខែវិច្ឆិកា ឆ្នាំ២០២២ ក្រោមអធិបតីភាព ឯកឧត្តម អ្នកឧកញ៉ា សៀង ណាំ តំណាងរាស្រ្តមណ្ឌលសៀមរាប រួមនឹងតំណាងសមាគម អាជ្ញាធរមូលដ្ឋាន លោកគ្រូអ្នកគ្រូ មាតាបិតាអាណាព្យាបាល និងសិស្សានុសិស្សជាច្រើនរូប។
គួរឲ្យដឹងថា អគារសិក្សាទាំងបីនេះ ត្រូវបានសាងសង់រួចរាល់តាំងពីខែវិច្ឆិកា ឆ្នាំ២០២០មកម្ល៉េះ ប៉ុន្តែដោយសារតែវិបត្តិនៃជំងឺកូវីដ-១៩ ទើបមានការយឺតយូរក្នុងការសម្ពោធដាក់ឱ្យប្រើប្រាស់ជាផ្លូវការ។ អគារសិក្សាទាំង៣ ស្ថិតក្នុងអនុវិទ្យាល័យកំពង់ថ្កូវ ឃុំកំពង់ថ្កូវ មួយខ្នង មាន ១០បន្ទប់, អនុវិទ្យាល័យខ្នារ ឃុំក្រូចគរ មួយខ្នង មាន១០បន្ទប់ និងមួយខ្នងទៀត មាន៥បន្ទប់ នៅក្នុងសាលាបឋមសិក្សាស្រណាល ឃុំស្រណាល ស្រុកក្រឡាញ់ ខេត្តសៀមរាប។
ឯកឧត្តម អ្នកឧកញ៉ា សៀង ណាំ មានប្រសាសន៍ថា ការផ្តល់អគារសិក្សាទាំង៣នេះ គឺជាការឆ្លើយតបតាមការសំនូមពររបស់មាតាបិតាអាព្យាបាលសិស្ស លោក គ្រូអ្នកគ្រូ ដែលចង់បាននូវអគារសិក្សាសំរាប់ការសិក្សារបស់ក្មួយៗ ព្រោះបច្ចុប្បន្នចំនួនសិស្សបានកើនឡើងជារៀងរាល់ឆ្នាំហើយសាលាពុំមានអគារសិក្សាគ្រប់គ្រាន់សម្រាប់សិស្សបានចូលរៀនគ្រប់គ្នានៅឡើយ។
ព័ត៌មានជាតិ ថ្មីៗ
ក្នុងឱកាសនោះដែរ អ្នកឧកញ៉ា សៀង ណាំ ក៏បានជំរាបជូនតំណាងសមាគម SCHEC ព្រមទាំងសហការីទាំងអស់ដែលបានមកកម្ពុជា អំពីការអប់រំនៅកម្ពុជានិងគោលនយោបាយរបស់រាជរដ្ឋាភិបាលលើវិស័យអប់រំ ដើម្បីកសាងមូលដ្ឋានគ្រឹះនៃចំណេះដឹងអោយបានរឹងមាំសំរាប់អោយកុមារ និងយុវជនកម្ពុជាទាំងអស់មានឪកាសស្មើៗគ្នាក្នុងការទទួលបានការអប់រំប្រកបដោយគុណភាពខ្ពស់ តាមរយៈការធ្វើអោយសាលារៀនកាន់តែខិតជិតលំនៅដ្ឋានរបស់ប្រជាពលរដ្ឋ។ ឯកឧត្តម ក៏បានថ្លែងអំណរគុណចំពោះថ្នាក់ដឹកនាំ និងប្រតិភូសមាគទាំងអស់ ដែលបានផ្តល់អគារសិក្សាទាំង៣ខ្នងនេះ ដើម្បីរួមចំណែកជាមួយរាជរដ្ឋាភិបាលកម្ពុជាក្នុងការលើកកំពស់វិស័យអប់រំ។
ឯកឧត្តម បញ្ជាក់ថា សម្រាប់សមិទ្ឋផលដែលបានសម្ពោធដាក់ឲ្យប្រើប្រាស់ជាផ្លូវការនាពេលនេះដែរ គឺជាអំណោយដ៍ថ្លៃថ្លារបស់លោកស្រី ស៊ីប៊ូយ៉ា ហ៊ីសាយ៉ុ ផ្តល់តាមរយៈសមាគមជួយប្រជាពលរដ្ឋកម្ពុជា លើផ្នែកអប់រំ និងសុខភាព នៃប្រទេសជប៉ុន ហៅកាត់ថា SCHEC ។ ហើយថ្វីត្បិតតែលោកស្រី បានលាចាកលោកដោយរោគាពាធទៅហើយក្តី តែទឹកចិត្តមនុស្សធម៌ និងទឹកចិត្តស្រឡាញ់ប្រជាជនកម្ពុជា ដោយមុននឹងមរណភាពលោកស្រីបានផ្តាំថា ទ្រព្យសម្បត្តិដែលលោកស្រីមាននៅសល់ គឺឱ្យយកមកជួយប្រជាជនកម្ពុជា ជាពិសេសជួយកសាងអគារសិក្សា ដើម្បីឱ្យកុមារកម្ពុជាបានសិក្សារៀនសូត្រឲ្យក្លាយជាធនធានមនុស្សប្រកបដោយសីលធម៌ មានចំណេះដឹង និងចំណេះធ្វើ រួមចំណែកក្នុងការកសាងសង្គមជាតិឱ្យមានការរីកចម្រើនជាលំដាប់។
សូមបញ្ជាក់ថា ក្នុងរយៈពេល ២២ឆ្នាំកន្លងមកនេះ សមាគមជួយប្រជាពលរដ្ឋកម្ពុជាលើផ្នែកអប់រំ និងសុខភាព នៃប្រទេសជប៉ុន ហៅកាត់ថា SCHEC បានជួយឧបត្ថម្ភយ៉ាងធំធេងដល់ប្រជាជនកម្ពុជាតាមបណ្តាស្រុកមួយចំនួនក្នុងខេត្តសៀមរាប។ ក្នុងនោះរួមមាន៖ អគារសិក្សាចំនួន ៣៦ខ្នង ស្មើនឹង ១៩៨បន្ទប់ ព្រមទាំងសម្ភារៈសិក្សា សម្ភារៈកីឡា សម្ភារៈបង្រៀន អណ្តូងទឹកស្នប់ចំនួន ៣៦៤៦អណ្តូង ម៉ាស៊ីនបូមទឹក អាងទឹក និងបណ្តាញចែកចាយទឹកស្អាត ២កន្លែង នៅឃុំសង្វើយ ស្រុកជីក្រែង និងឃុំតាយ៉ែក ស្រុកសូទ្រនិគម។ ជាមួយគ្នានោះក៏មានក្រុមគ្រូពេទ្យធ្មេញ ចុះជួយព្យាបាលធ្មេញ និងចែកថ្នាំ និងច្រាសដុសធ្មេញជារៀងរាល់ឆ្នាំផងដែរ៕
អត្ថបទ៖ លោក យូ វង្ស ,រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
