កិច្ចប្រជុំរដ្ឋមន្ដ្រីការពារជាតិអាស៊ានចង្អៀត និងកិច្ចប្រជុំរដ្ឋមន្ដ្រីការពារជាតិអាស៊ានបូកលើកទី៩ (9th ADMM-Plus) ដែលធ្វើឡើងនៅខេត្ដសៀមរាប ចាប់ផ្តើមពីថ្ងៃ ទី២១ ដល់ថ្ងៃទី២៣ ខែវិច្ឆិកា ឆ្នាំ២០២២ នៅក្រុងសៀមរាប ត្រូវបានគណៈបញ្ជាការឯកភាពរដ្ឋបាលខេត្ដ រៀបចំរួចរាល់ហើយ រួមមានទាំងការរៀបចំកម្លាំងសមត្ថកិច្ចការពារសន្ដិសុខ សុវត្ថិភាពជូនគណៈប្រតិភូ ដែលរៀបចំឡើងនៅសណ្ឋាគារ សុខាសៀមរាប ។
អភិបាលខេត្តសៀមរាប ឯកឧត្ដម ទៀ សីហា មានប្រសាសន៍ថា នេះជាមោទនៈរបស់ខេត្ដសៀមរាប ដែលមានកិត្ដិយស បានធ្វើជាម្ចាស់ផ្ទះរៀបចំកិច្ចប្រជុំរដ្ឋមន្រ្តីការពារជាតិអាស៊ានចង្អៀត និងកិច្ចប្រជុំរដ្ឋមន្ដ្រីអាស៊ានបូកលើកទី៩ ខណៈកិច្ចប្រជុំនេះ នឹងប្រព្រឹត្តទៅក្រោមវត្តមានដ៏ខ្ពង់ខ្ពស់របស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនៃព្រះរាជាណាចក្រកម្ពុជា ។
គួររំលឹកថា កាលពីរសៀលថ្ងៃទី២១ ខែវិច្ឆិកាម្សិលមិញនេះ សម្តេចពិជ័យសេនា ទៀ បាញ់ បានអញ្ជើញជួបជាមួយគណៈប្រតិភូរដ្ឋមន្ដ្រីការពារជាតិអាស៊ាន មកពីបណ្តាប្រទេសនានា និងក្នុងតំបន់អាស៊ាន មានរដ្ឋមន្ត្រីក្រសួងការពារជាតិប្រទេសហ្វីលីពីន ,អូស្ត្រាលី ,ម៉ាឡេស៊ី និង អគ្គលេខាធិការអាស៊ាន ហើយកិច្ចប្រជុំចង្អៀតរដ្ឋមន្ត្រីការពារជាតិអាស៊ាននេះ នឹងផ្តោតជាសំខាន់លើការផ្លាស់ប្តូរទស្សនៈ ស្តីពី «ការលើកកម្ពស់កិច្ចសហប្រតិបត្តិការការពារជាតិ ដើម្បី ពង្រឹងសាមគ្គីភាពសម្រាប់សន្តិសុខប្រកប ដោយភាពសុខដុម» ។
ក្នុងជំនួបទ្វេរភាគីនោះសម្តេចពិជ័យសេនា ទៀ បាញ់ ក៏បានសម្តែងនូវសេចក្តីស្វាគមន៍ចំពោះគណៈប្រតិភូ ដែល បានអញ្ជើញចូលរួមនៃកិច្ចប្រជុំរដ្ឋមន្ដ្រីការពារជាតិអាស៊ានចង្អៀត និងកិច្ចប្រជុំរដ្ឋមន្ដ្រីការពារជាតិអាស៊ានបូកលើកទី៩ (9th ADMM-Plus) នៅលើទឹកដីប្រវត្តិសាស្ត្រខេត្តសៀមរាប ដែលជាតំបន់សម្បូរទៅដោយសម្បត្តិវប្បធម៌ ដែលមានប្រាសាទអង្គរជាសម្បត្តិបេតិកភ័ណ្ឌពិភពលោករបស់មនុស្សជាតិ ក្នុងនោះ ដោយសារការឆ្លងរាលដាលជាសកលនៃកូវីដ-១៩ ក្នុងរយៈពេលជិត៣ឆ្នាំមកនេះ ការជួបប្រជុំប្រទេសក្នុងតំបន់អាស៊ាន ក៏ត្រូវបានខកខាន ។
សម្តេចពិជ័យសេនា បញ្ជាក់បន្ថែមថា កិច្ចប្រជុំរដ្ឋមន្ដ្រីការពារជាតិអាស៊ានចង្អៀត និងកិច្ចប្រជុំរដ្ឋមន្ដ្រីការពារជាតិអាស៊ានបូកលើកទី៩នេះ និង នាំមកនូវផលប្រយោជន៍យ៉ាងធំ ចំពោះបញ្ហាសន្តិសុខ សន្តិភាព របស់ប្រជាជាតិតំបន់អាស៊ាន ក៏ដូចនៅលើពិភពលោកទាំងមូល ដែលបានមកជួប ធ្វើការពិភាក្សាផ្លាស់ប្តូរមតិយោបល់គ្នា ហើយនៅក្នុងកិច្ចប្រជុំនេះដែរ ក៏មានកិច្ចប្រជុំក្រៅផ្លូវការរដ្ឋមន្ត្រីការពារជាតិសហរដ្ឋអាមេរិក និង សាធារណរដ្ឋប្រជាមានិតចិននិងធ្វើការជួបគ្នា នៅលើទឹកដីខេត្តសៀមរាបនេះ។
សម្តេចពិជ័យសេនា បន្តថា នេះជាព្រឹត្តិការណ៍ដ៏កម្រមួយក្នុងរយៈពេលប៉ុន្មានឆ្នាំចុងក្រោយនេះ ទៅលើបញ្ហាខ្លះៗ ហើយក្នុងនាមកម្ពុជាធ្វើជាម្ចាស់ផ្ទះ នៅលើទឹកដីខេត្តសៀមរាបនេះ យើងនឹងទទួលនូវផលប្រយោជន៍ជាច្រើន ចំពោះតំបន់ និង ពិភពលើកផងដែរ ខណៈសម្រាប់កិច្ចប្រជុំរដ្ឋមន្ត្រីការពារជាតិអាស៊ាន-បូក សម្តេចតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា នឹងអញ្ជើញជាអធិបតី ដើម្បីថ្លែងសុន្ទរកថាគន្លឹះ ក្នុងពិធីបើកជាផ្លូវការ នៃកិច្ចប្រជុំរដ្ឋមន្ត្រីការពារជាតិអាស៊ានបូក លើកទី៩ ហើយនឹងទទួលការចូលជួបសម្ដែងការគួរសមរួមគ្នា ដោយរដ្ឋមន្ត្រី ការពារជាតិអាស៊ានបូក និង អគ្គលេខាធិការអាស៊ាន ។ នៅក្នុងកិច្ចប្រជុំរដ្ឋមន្ត្រីការពារជាតិអាស៊ានបូក ក៏នឹងស្តាប់របាយការណ៍ នៃការអភិវឌ្ឍន៍ថ្មីៗ នៅក្នុងអាស៊ាន ការផ្លាស់ប្តូរទស្សនៈ ស្តីពី «បរិយាកាសសន្តិសុខតំបន់ និងអន្តរជាតិ និងកិច្ចសន្ទនាជាយុទ្ធសាស្ត្រ ដើម្បីលើកកម្ពស់កិច្ចសហប្រតិបត្តិការការពារជាតិក្នុងតំបន់ ។
សូមបញ្ជាក់ថា បន្ទាប់ពីបញ្ចប់កិច្ចប្រជុំ សម្ដេចពិជ័យសេនា ទៀ បាញ់ នឹងធ្វើពិធីផ្ទេរតំណែងជាប្រធានកិច្ចប្រជុំ រដ្ឋមន្ត្រីការពារជាតិអាស៊ាន និងកិច្ចប្រជុំពាក់ព័ន្ធ ជូនឯកឧត្តម ប្រាបូវូ ស៊ូប៊ីយ៉ានតូ រដ្ឋមន្ត្រីការពារជាតិ នៃសាធារណរដ្ឋឥណ្ឌូណេស៊ី ដែលជាប្រធានប្តូរវេនសម្រាប់ឆ្នាំ២០២៣៕
អត្ថបទ និងរូបភាព៖ លោក យូ វង្ស និង លោក បូ សាវី
កែសម្រួល៖ លោក លីវ សាន្ត
