ដើម្បីជាការចូលរួមក្នុងសកម្មភាពមនុស្សធម៌ជាមួយរាជរដ្ឋាភិបាលកម្ពុជា នៅព្រឹកថ្ងៃទី២៧ ខែធ្នូ ឆ្នាំ២០២២ សមាគមមិត្តយើង បានសម្រេចជ្រើសរើសខេត្តសៀមរាប ដើម្បីបន្តសកម្មភាពមនុស្សធម៌របស់ខ្លួន ដោយសហការជាមួយអាជ្ញាធរសង្កាត់សាលាកំរើក រៀបចំកម្មវិធី “សក់ និងសម្រស់របស់មិត្តយើង“ លើកទី៤ និងជាលើកទី១ សម្រាប់ខេត្តសៀមរាប ក្នុងបរិវេនសាលាមត្តេយ្យសហគមន៍ ភូមិតាវៀន ដោយមានការចូលរួមពីបងប្អូនប្រជាពលរដ្ឋមានជីវភាពខ្វះខាត់សរុបជាង ៣០០នាក់ មកពីសង្កាត់សាលាកំរើក និងស្រុកបន្ទាយស្រី ខេត្តសៀមរាប។
បើតាម លោក ឡា វិបុល អនុប្រធានក្រុមប្រក្សាភិបាលសមាគមមិត្តយើង បានបញ្ជាក់ថា នេះជាលើកទី៤ ហើយ ដែលសមាគមមិត្តយើង បានរៀបចំកម្មវិធី “សក់ និងសម្រស់របស់មិត្តយើង” នេះឡើង ក្នុងគោលបំណងផ្សព្វផ្សាយឲ្យបានទូលំទូលាយអំពីចំណេះដឹងផ្នែកវិជ្ជាជីវៈសក់ និងសម្រស់ទៅដល់បងប្អូនដែលមានបំណងចង់ចាប់យកជំនាញផ្នែកនេះ ក៏ដូចជាការផ្តល់សេវាកម្មថែរក្សាសក់ និងសម្រស់ទៅដល់អ្នកដែលមានកង្វះខាត និងកម្មករនិយោជិតនៃវិស័យសេដ្ឋកិច្ចក្រៅប្រព័ន្ធទាំងអស់ ដែលពុំមានឱកាស ឬជួបការលំបាកក្នុងការទទួលបាននូវសេវាកម្មមួយនេះ។ ជាមួយនឹងកម្មវិធីថ្ងៃនេះ ក្រុមការងារក៏បានដឹកនាំក្រុមសាឡន និងជាងកាត់សក់ល្បីៗ ជាង៤០នាក់ នៅក្នុងខេត្តសៀមរាប និងមកពីខេត្តបន្ទាយមានជ័យ ដើម្បីចូលរួមជាមួយសមាគមមិត្តយើង ក្នុងការផ្តល់នូវសេវាកម្មកាត់ដោយឥតគិតថ្លៃ ជូនដល់អ្នករកស៊ីក្រៅប្រព័ន្ធ និងអ្នកដែលមានជីវភាពខ្វះខាតក្នុងជីវភាពប្រចាំថ្ងៃផងដែរ។
ព័ត៌មានជាតិ ថ្មីៗ
លោក កែវ សុធារ៉ា ប្រធានសាខាសមាគមមិត្តយើងប្រចាំខេត្តសៀមរាប មានប្រសាសន៍ថា កន្លងមក សមាគមមិត្តយើង ប្រចាំខេត្តសៀមរាប តែងតែរៀបចំនូវកម្មវិធីសប្បុរសធម៌ជាច្រើន ក្នុងការជួយដល់អ្នកដែលមានជីវភាពខ្វះខាត។ ប៉ុន្តែសម្រាប់ថ្ងៃនេះដែរ គឺជាលើកទី១ សម្រាប់កម្មវិធី “សក់ និងសម្រស់របស់មិត្តយើង” ដែលយើងបានផ្តល់ជូនសេវាកាត់សក់ដល់បងប្អូនដែលមានជីវភាពខ្វះខាត។ ជាមួយគ្នានោះ យើងមិនត្រឹមតែផ្តល់ការកាត់សក់ដល់ពួកគាត់ប៉ុណ្ណោះទេ យើងក៏មានកញ្ចប់ជំនួយដូចជា អង្ករ និងសម្ភារៈមួយចំនួន ជូនដល់ពួកគាត់ក្នុងការជួយសម្រួលលើការដោះស្រាយជីវភាពប្រចាំថ្ងៃទៀតផង។
ក្នុងនាមអាជ្ញាធរមូលដ្ឋាន និងតំណាងឲ្យប្រជាពលរដ្ឋ លោកស្រី នួន គឹមសួរ ចៅសង្កាត់រងទី១ សង្កាត់សាលាកំរើក បានសម្ដែងការអរគុណ និងកោតសរសើរចំពោះថ្នាក់ដឹកនាំ រួមនឹងក្រុមការងារទាំងអស់ នៃសមាគមមិត្តយើង ដែលជ្រើសរើសយកសង្កាត់សាលាកំរើក ដើម្បីរៀបចំកម្មវិធី “សក់ និងសម្រស់របស់មិត្តយើង” នេះឡើង ដែលសកម្មភាពនេះវាពិតជាបានចូលរួមយ៉ាងសំខាន់ ក្នុងការជួយសម្រួលដល់ទុកលំបាក និងជីវភាពមួយកម្រិតដល់បងប្អូនប្រជាពលរដ្ឋដែលមានជីវភាពខ្វះខាត មិនមានលទ្ធភាពគ្រប់គ្រាន់ក្នុងការស្វែងរកសេវាមួយនេះ (កាត់សក់)។ លោកស្រីសង្ឃឹមថា សមាគមមិត្តយើង នៅតែបន្តនូវកម្មវិធីនេះនាពេលខាងមុខទៀត នៅក្នុងមូលដ្ឋានសង្កាត់សាលាកំរើក ក៏ដូចជាមូលដ្ឋានផ្សេងៗទៀតក្នុងខេត្តសៀមរាប ធ្វើយ៉ាងណាជួយសម្រួលទុកលំបាករបស់បងប្អូនប្រជាពលរដ្ឋក្រីក្រ ដែលគ្មានលទ្ធភាពគ្រប់គ្រាន់ក្នុងការរកសេវាទាំងនេះតទៅមុខទៀត៕
អត្ថបទ និងរូបភាព៖ លោក អ៊ុន ណារាជ្យ
