សហព័ន្ធខ្មែរកីឡាទោចក្រយាន និងអាជ្ញាធរខេត្តសៀមរាប នៅព្រឹកថ្ងៃទី២៧ ខែធ្នូ ឆ្នាំ២០២២ បានរៀបចំការប្រកួតកីឡាទោចក្រយានជ្រើសរើសជើងឯក ឆ្នាំ២០២២ នៅមុខប្រាសាទអង្គរវត្ត ក្រោមអធិបតីភាពឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានសហព័ន្ធខ្មែរកីឡាទោចក្រយាន រួមនឹងវត្តមានលោក យុន លីណេ អភិបាលរងខេត្ត និងវត្តមានឯកឧត្តម លោកជំទាវ លោក លោកស្រីប្រតិភូក្រសួងពាណិជ្ជកម្ម អគ្គលេខាធិការ នៃសហព័ន្ធកីឡាខ្មែរទោចក្រយាន ថ្នាក់ដឹកនាំមន្ទីរ អង្គភាពពាក់ព័ន្ធ និងកីឡាករកីឡាការិនីជាច្រើនរយនាក់។
មានប្រសាសន៍ក្នុងឱកាសនោះ ឯកឧត្តម ប៉ាន សូរស័ក្តិ បានជំរុញដល់កីឡាករត្រូវប្រឹងប្រែងប្រកួតឲ្យអស់ពីសមត្ថភាព ហើយត្រូវចាត់ទុកថា ទោះចាញ់ ឬឈ្នះត្រូវឈរភាពស្មោះត្រង់។ ឯកឧត្តមក៏បានជំរុញដល់មន្ត្រីគណៈកម្មការ ត្រូវធ្វើយ៉ាងណាឈរនៅលើភាពសុចរិត មិនលម្អៀង និងសំណូមពរដល់ក្រុមការងារគណ:កម្មការសហព័ន្ឋកីឡាប្រណាំងទោចក្រយាន សហការឱ្យបានស្អិតរមួតជាមួយសមត្ថកិច្ច អាជ្ញាធរដែនដី និងអង្គភាពស្ថាប័ន មន្ទីរពាក់ព័ន្ឋគ្រប់ជាន់ថ្នាក់ពិនិត្យមើលស្ថានភាពភូមិសាស្ត្រនៃបណ្តាផ្លូវគោលដៅ ដែលបានកំណត់រួចហើយ ដូចជាចំណុចតំបន់ផ្លូវឡើងភ្នំ សំដៅរក្សាបាននូវសន្តិសុខ សុវត្ថិភាពដល់កីឡាករ កីឡាការិនី និងភ្ញៀវ ដែលចូលរួមប្រកួត និងចូលរួមទស្សនា។
ឯកឧត្តមបន្តថា ព្រឹត្តិកាណ៍នាឱកាសនេះដែល វាក៏ជាឱកាសមួយដែលសហព័ន្ធខ្មែរកីឡាទោចក្រយាន ចាប់ផ្តើមពង្រឹងគុណភាពបច្ចេកទេស និងមន្ត្រីគណ:កម្មការតាមទម្រង់ស្តង់ដារអន្តរជាតិ ដើម្បីសម្រួចគោលដៅឆ្ពោះទៅទទួលធ្វើម្ចាស់ផ្ទះស៊ីហ្គេម លើកទី៣២ ឆ្នាំ២០២៣ ហើយការប្រកួតឆ្នាំនេះ គឺជាការអនុវត្តការងារបច្ចេកទេស វាស់ស្ទង់សមត្ថភាពកីឡាករ កីឡាការីនី ដើម្បីត្រៀមលក្ខណៈឆ្ពោះទៅការប្រកួតកីឡាស៊ីហ្គេមលើកទី៣២ ឆ្នាំ២០២៣ផងដែរ។
បើយោងតាមរបាយការណ៍របស់អគ្គលេខាធិការសហព័ន្ធខ្មែរកីឡាទោចក្រយាន បានឲ្យដឹងថា សម្រាប់ការប្រកួតថ្នាក់ជាតិនេះមានប្រតិភូ គ្រូបង្វឹក កីឡាករ កីឡាការិនី សរុបចំនួន ២៨៧នាក់ មកពី១៥ក្រុម នៃរាជធានី-ខេត្ត ចំនួន១៤ រួមនឹងក្រសួងការពារជាតិ និងគណៈកម្មការបច្ចេកទេស ៣ក្រុមចំនួន ៦០នាក់។ ហើយការប្រកួតបានកំណត់យកវិញ្ញាសារចំនួនបីប្រភេទរួមមាន៖ ប្រណាំងកង់គួក និងកង់ភ្នំបុរស និងកង់ភ្នំនារី។ ក្នុងនោះការប្រណាំងកង់កួកបុរសអាយុក្រោម ១៨ឆ្នាំ កង់កួកបុរសអាយុ ១៨ឆ្នាំឡើង និងកង់គួកបុរសអាយុ ៤០ឆ្នាំឡើង ស្ថិតនៅលើចម្ងាយផ្លូវ ១៦០គីឡូម៉ែត្រដូចៗគ្នា៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
