ដើម្បីត្រៀមខ្លួនធ្វើជាម្ចាស់ផ្ទះក្នុងព្រឹត្តិការណ៍កីឡាស៊ីហ្គេម (SEA Games 32) នាឆ្នាំ២០២៣ ខាងមុខនេះ ទាំងគ្រូបង្វឹក កីឡាករកីឡាការិនី មន្ត្រីរៀបចំការប្រកួតទាំងអស់ ត្រូវតែខិតខំពង្រឹងសមត្ថភាពបន្ថែមទៀត ទាំងបរិមាណ និងគុណភាព ដើម្បីអាចម្ចាស់ការរៀបចំការប្រកួតគ្រប់កម្រិតទាំងនៅថ្នាក់ជាតិ និងអន្តរជាតិ។ ជាពិសេសត្រូវបន្តជម្រុញឱ្យមានការហ្វឹកហាត់ជាប្រចាំ និងប្រកួតវាស់ស្ទង់កម្រិតសមត្ថភាពឱ្យបានច្រើន នៅតាមបណ្តាក្លិប-សមាគម នៅទូទាំងប្រទេស តាមភូមិភាគ និងនៅថ្នាក់ជាតិ ពង្រឹងរចនាសម្ព័ន្ធគ្រប់គ្រងផ្ទៃក្នុងរបស់សហព័ន្ធ និងទំនាក់ទំនងល្អ រវាងក្លឹប-សមាគមទូទាំងប្រទេស ប្រឹងប្រែងស្វែងរកដៃគូអភិវឌ្ឍបន្ថែមទៀត ដើម្បីបង្កើនព្រឹត្តិការណ៍ប្រកួតឲ្យបានច្រើនក្នុងមួយឆ្នាំៗ តាមដែលអាចធ្វើបាន។
ថ្លែងក្នុងពិធីបិទការប្រកួតកីឡាទោចក្រយាន ជ្រើសរើសជើងឯកថ្នាក់ជាតិ ប្រចាំឆ្នាំ២០២២ នៅខេត្តសៀមរាប នារាត្រីថ្ងៃទី២៧ ខែធ្នូ ឆ្នាំ២០២២ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានសហព័ន្ធខ្មែរកីឡាទោចក្រយាន បានមានប្រសាសន៍ថា ដើម្បីឱ្យវិស័យកីឡាទោចក្រយាននៅកម្ពុជា កាន់តែមានការរីកចម្រើនទាំងបរិមាណ និងគុណភាព សម្រាប់ចូលរួមក្នុងព្រឹត្តិការណ៍កីឡាស៊ីហ្គេម (SEA Games 32) នាឆ្នាំ២០២៣ និងទទួលបានលទ្ធផលល្អប្រសើរ អ្នកពាក់ព័ន្ធទាំងអស់ត្រូវខិតខំបណ្តុះបណ្តាលថ្នាក់ថ្នាល បង្កើនបរិមាណកីឡាករ-កីឡាការិនី តាមបណ្តាក្លិប-សមាគម កីឡាទោចក្រយាន រាជធានី-ខេត្ត ក្រសួង-ស្ថាប័ន ឱ្យបានកាន់តែទូលំទូលាយ មានធនធានមនុស្ស និងសម្ភារហ្វឹកហាត់ឱ្យបានគ្រប់គ្រាន់ និងត្រូវជុំរុញបង្កើនការចូលរួមប្រកួតពីថ្នាក់ភូមិភាគ និងថ្នាក់ជាតិឱ្យបានច្រើន ព្រោះកីឡាទោចក្រយានទាំង២ប្រភេទនេះ ត្រូវបានរាជរដ្ឋាភិបាល និងគណៈកម្មាធិការជាតិរៀបចំកីឡាស៊ីហ្គេម ដាក់បញ្ជូលក្នុងវិញ្ញសាប្រកួតកីឡាស៊ីហ្គេមឆ្នាំ២០២៣ ដែលប្រទេសកម្ពុជានឹងធ្វើជាម្ចាស់ផ្ទះនាឆ្នាំក្រោយនេះ។
ឯកឧត្តម ប៉ាន សូរសក្តិ បញ្ជាក់ថា សម្រាប់ការប្រកួតកីឡាទោចក្រយានរយៈពេលពេញ ១ថ្ងៃនៅខេត្តសៀមរាបនាពេលនេះ គឺជាការផ្តល់ឱកាសមួយបន្ថែមដល់កីឡាករកីឡាការិនីយើង បានបញ្ចេញនូវទេពកោសល្យ ក៏ដូចជាវាស់ស្ទង់សមត្ថភាពបច្ចេកទេសដែលពួកគេម្នាក់ៗបានប្រឹងប្រែងហ្វឹកហាត់កន្លងមក។ ហើយចំពោះលទ្ធផលរបស់កីឡាករ-កីឡាការិនី ដែលទទួលជ័យលាភីនាពេលនេះដែរ វាពិតជាបានមកពីការខិតខំហ្វឹកហាត់ជាប្រចាំ មានការយកចិត្តទុកដាក់ តស៊ូព្យាយាម គោរពវិន័យបានល្អ និងគោរពបានតាមបទបញ្ជាបច្ចេកទេសនៃការប្រកួតដែលសហព័ន្ធខ្មែរកីឡាទោចក្រយាន បានរៀបចំផងដែរ។
បើតាមរបាយការណ៍របស់លោក នូ ចំរើន អគ្គលេខាធិការសហព័ន្ធខ្មែរកីទ្បាទោចក្រយាន បានឱ្យដឹងថា យោងតាមកម្មវិធីប្រកួតប្រចាំឆ្នាំរបស់សហព័ន្ធខ្មែរកីឡាទោចក្រយាន និងយោងតាមកម្មវិធីប្រកួតប្រចាំឆ្នាំ របស់ក្រសួងអប់រំយុវជន និងកីឡា ក្រោមគម្រោងថវិកាគាំទ្រសហព័ន្ធរបស់ក្រសួងអប់រំ យុវជន និងកីឡា សម្រាប់ពន្លឿនការអភិវឌ្ឍសហព័ន្ធកីឡាជាតិ សហព័ន្ធខ្មែរកីឡាទោចក្រយាន បានរៀបចំការប្រកួតកីឡាទោចក្រយានជ្រើសរើសជើងឯកថ្នាក់ជាតិប្រចាំឆ្នាំ២០២២ ចាប់ពីថ្ងៃទី២៦-២៧ ខែធ្នូ ឆ្នាំ២០២២ នៅខេត្តសៀមរាប។ សម្រាប់ការប្រកួតថ្នាក់ជាតិនេះមានប្រតិភូ គ្រូបង្វឹក កីឡាករ កីឡាការិនី សរុបចំនួន ២៨៧នាក់ មកពី១៥ក្រុម នៃរាជធានី-ខេត្ត ចំនួន១៤ រួមនឹងក្រសួងការពារជាតិ និងគណៈកម្មការបច្ចេកទេស ៣ក្រុមចំនួន ៦០នាក់។ ហើយការប្រកួតបានកំណត់យកវិញ្ញាសារចំនួនបីប្រភេទរួមមាន៖ ប្រណាំងកង់គួក និងកង់ភ្នំបុរស និងកង់ភ្នំនារី។ ក្នុងនោះការប្រណាំងកង់កួកបុរសអាយុក្រោម ១៨ឆ្នាំ កង់កួកបុរសអាយុ ១៨ឆ្នាំឡើង និងកង់គួកបុរសអាយុ ៤០ឆ្នាំឡើង ស្ថិតនៅលើចម្ងាយផ្លូវ ១៦០គីឡូម៉ែត្រដូចៗគ្នា៕
អត្ថបទ និងរូបភាព៖ លោក យូ វង្ស
កែសម្រួល៖ អ៊ុន ណារាជ្យ
