អ្នកទេសចរមកពីខេត្ដកំពង់ធំ និងខេត្ដបន្ទាយមានជ័យ ដែលមកកំសាន្តក្នុងខេត្តសៀមរាប បានបង្ហាញការពេញចិត្ត និងកោតសរសើរ ដល់អាជ្ញាធរខេត្ដសៀមរាប ក្នុងការតុបតែលំអរតាមដងផ្លូវ និងកន្លែងកំសាន្តមួយចំនួន ដែលពោរពេញទៅដោយភ្លើងពណ៌ ការបង្កើតកម្មវិធីកំសាន្ដជាច្រើន ដូចជាជិះទូកកំសាន្ដនៅក្នុងស្ទឹង ការប្រគំតន្ដ្រី ការតាំងពិព័រណ៌ម្ហូបអាហារ ជាមួយនឹងផ្លូវថ្នល់ដ៏មានភាពស្រស់ស្អាត ទាក់ទាញអ្នកទេសចរខុសប្លែកពីឆ្នាំមុនៗ។
ពួកគាត់បន្តថា មិនត្រឹមតែប៉ុណ្ណោះសម្រាប់ពិធីអបអរឆ្នាំថ្មីនេះ ហាក់មានសណ្ឋានភាពធំជាងឆ្នាំមុនៗ ហើយមានសុខសុវត្ថិភាព សណ្ដាប់ធ្នាប់ល្អ និងបរិស្ថានអនាម័យស្អាត និងអភិវឌ្ឍន៍ផ្លូវថ្នល់ឱ្យងាយស្រួលធ្វើដំណើរ សាកសមជាប្រទេសមានសន្ដិភាពពេញលេញ។
សូមជម្រាបថា ដើម្បីអបអរសាទរព្រឹត្តិការណ៍ឆ្លងឆ្នាំសកល២០២៣ រដ្ឋបាលខេត្តសៀមរាប បានសហការជាមួយរដ្ឋបាលក្រុង មន្ទីរ អង្គភាព សមត្ថកិច្ច សហភាពសហព័ន្ធយុវជនកម្ពុជាខេត្ត រៀបចំកម្មវិធីជាច្រើនដើម្បីអបអរពិធីឆ្លងឆ្នាំសកលខាងមុខ រួមមាន៖ ការជិះទូកកម្សាន្ត តាំងពិព័រណ៍ ផ្សារទឹក បាញ់កាំជ្រួច និងប្រគំតន្ត្រី នៅទីតាំងសំខាន់ៗមួយចំនួន ចាប់ពីថ្ងៃទី៣០ ខែធ្នូ ឆ្នាំ២០២២ ដល់ថ្ងៃទី០១ ខែមករា ឆ្នាំ២០២៣ ដើម្បីជាការទាក់ទាញភ្ញៀវទេសចរជាតិ-អន្តរជាតិ មកទស្សនាខេត្តសៀមរាបឱ្យបានច្រើនកុះករថែមទៀត៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
