ប្រជាពលរដ្ឋ និងមេភូមិពួកចាស់ ឃុំពួក ស្រុកពួក បានអំពាវដល់សប្បុរសជន ឱ្យជួយឧបត្ថម្ភថិកា សាងសង់ផ្លូវមួយខ្សែ ដើម្បីជួយសម្រួលដល់ការធ្វើដំណើរ ការដឹកជញ្ជូនផលិតផលកសិកម្ម ព្រមទាំងជួយសម្រួលផ្លូវទឹក សម្រាប់ធ្វើកកសិកម្មរបស់ពួកគាត់ ខណៈដែលផ្លូវនេះ ជាផ្លូវរទេះគោ មានភាពតូចចង្អៀតពិបាកធ្វើដំណើរ។
លោក ព្រហ្ម មេត្ដា ជាអ្នកមើលការខុសត្រូវ និងជាសប្បុរសជនមួយរូប លោកបានឱ្យដឹងថា ដោយមើលឃើញពីការលំបាកធ្វើចរាចរណ៍ ពិបាកការដឹកជញ្ជូនផលិតផលកសិកម្ម ក៍ដូចជាការបង្ហូទឹកធ្វើកសិកម្មរបស់ប្រជាពលរដ្ឋ លោកនិងអាជ្ញាធរភូមិបានសហការគ្នារៃអង្គាសប្រាក់ពីប្រជាពលរដ្ឋក្នុងភូមិ និងសប្បុរសជនជាច្រើននាក់ទៀត កសាងផ្លូវមួយខ្សែប្រវែង៩៨០ម៉ែត្រ ចេញពីភូមិពួកចាស់ ឃុំពួក ទៅកាន់ភូមិដូនស្វា ឃុំសំរោងយា ស្រុកពួក ។លោកបន្ដថា ផ្លូវមួយខ្សែនេះ កន្លងមកជាផ្លូវរទេះគោ ពិបាកធ្វើចរាចរណ៍ ដោយសារផ្លូវតូចចង្អៀត គ្មានប្រព័ន្ធលូ ប្រឡាយទឹក បង្គោលភ្លើង ធ្វើឱ្យការលំបាកដល់ការរស់នៅរបស់ប្រជាពលរដ្ឋ ទើបពួកគាត់នាំគ្នាប្រមូលថវិកាពីសប្បុរសជន ព្រមទាំងប្រជាពលរដ្ឋក្នុងភូមិផង ពង្រីផ្លូវនោះឡើងវិញ សម្រាប់ប្រជាពលរដ្ឋដឹកជញ្ជូនផលិតផលកសិកម្ម។លោកបន្ដថា ផ្លូវនេះពង្រីកថ្មីមានទំហំទទឹង៧ម៉ែត្រ ក្នុងទំហំសរុប១២ម៉ែត្រ មានប្រឡាយទឹកសងខាង សម្រាប់យកទឹកស្រោចស្រប់ដំណាំកសិកម្មផងដែរ។លោកបន្ដថា កាសាងសង់ថ្មីឡើងវិញ បានចាប់ផ្ដើមធ្វើឡើងមួយសប្ដាហ៍មកហើយ ដែលការសាងសង់នេះ លោកត្រូវចំណាយថវិកាផ្ទាល់ខ្លួន និងបានជំនួយពីសប្បុរសជនខ្លះៗ។លោកថា គម្រោងធ្វើផ្លូវនេះ ក្នុងទំហំទឹកប្រាក់ប្រមាណជិតមួយម៉ឺនដុល្លា ខណៈដែលបានទទួលថវិកាពីសប្បុរសជនបានប្រមាណ៦លានរៀលប៉ុណ្ណោះ។ លោកក៍ដូចជាប្រជាពលរដ្ឋអំពាវនាវដល់សប្បុរសជន ឱ្យជួយចូលរួមឧត្ថម្ភថវិកាជួយកសាងផ្លូវនេះ ដើម្បីជាប្រយោជនរបស់ប្រជាពលរដ្ឋផងដែរ ។
លោក ប៊ុន គឿម មេភូមិពួកចាស់ ឃុំពួក ស្រុកពួក ខេត្ដសៀមរាប លោកមានប្រសាសន៍ថា ផ្លូវគមនាគមន៍នេះ មានសារៈសំខាន់សម្រាប់ប្រជាពលរដ្ឋនៅទីនោះ ដែលពង្រីទំហំធំ មានប្រឡាយទឹក សម្រាប់រក្សាទឹកធ្វើដំណាំកសិកម្មពេលរដូវប្រាំង និងងាយស្រួលអ្នកភូមិបានធ្វើដំណើរទៅមកផងដែរ ជាពិសេសអាចស្រោចស្រូវដំណាំកសិកម្មអ្នកភូមិពួកចាស់ ព្រោះទឹកនេះបានហូរចេញពីទំនប់បារាណ៍ទឹកថ្លាខាងលិចអង្គរវត្ដ។ លោកបានបន្ដថា ការពង្រីកផ្លូវបានប៉ះពាល់ខ្លះ ប៉ន្ដែត្រូវតែពង្រីអោយធំ ដើម្បីយស្រួលធ្វើដំណើរទាំងអស់គ្នា និងទុកជាប្រយោជន៍រួមសម្រាប់ទៅថ្ងៃមុខ។លោកបានអំពាវដល់ក្រុមហ៊ុន អង្គការនានា ព្រមទាំងសប្បុរជនជួយជ្រោមជ្រែងថវិកាសាងសង់ផ្លូវមួយខ្សែនេះឱ្យរួចរាល់ជាស្ថាពរដើម្បីកាត់បន្ថយភាពក្រីក្ររបស់ប្រជាពលរដ្ឋ។
ព័ត៌មានជាតិ ថ្មីៗ
បើតាមលោកមេភូមិ ផ្លូវ និងប្រឡាយទឹកនេះ មានការលំបាកធ្វើចរាចរណ៍ជាច្រើនឆ្នាំហើយ និងមិនដែលមានអ្នកណាស្ដារវានោះទេ ទើបតែប្រជាពលរដ្ឋសហការជួយចេញថវិកាគ្នានាពេលនេះ ដើម្បីងាយស្រួលធ្វើចរាចរណ៍ និងសម្រាប់ប្រព័ន្ធទឹកស្រោចស្រប់ដំណាំកសិកម្ម ខណៈដែលប្រជាពលរដ្ឋនៅតំបន់នោះស្ទើរ១០០ភាគរយជាអ្នកធ្វើស្រែចំការឆ្លងកាត់តាមផ្លូវនោះ៕
