សៀមរាប៖ នៅថ្ងៃទី២៩ ខែធ្នូ ឆ្នាំ២០២២នេះ រដ្ឋបាលឃុំទាំង២ គឺរដ្ឋបាលឃុំស្វាយចេក ក្នុងស្រុកនគរធំ និងរដ្ឋបាលឃុំចាន់ស ក្នុងស្រុកសូទ្រនិគម ខេត្តសៀមរាប បានបើកការដេញថ្លៃមន្ទីរពេទ្យឃុំស្វាយចេក ១ខ្នង និងធ្វើប្រឡាយ ១ខ្សែ ស្ថិតនៅក្នុងឃុំចាន់សរបស់រដ្ឋបាលឃុំសង្កាត់ ដោយមានគណៈកម្មការលទ្ធកម្មឃុំទាំង២ និងអាជ្ញាធរពាក់ព័ន្ធជាច្រើននាក់បានចូលរួមផងដែរ។
កិច្ចលទ្ធកម្មគម្រោងមូលនិធិឃុំសង្កាត់ឆ្នាំ២០២២នេះ គឺចាប់ផ្តើមទទួលសំណើរដេញថ្លៃនៅម៉ោង ០៩:០០នាទីព្រឹក និងពេលវេលាឈប់ទទួលសំណើរដេញថ្លៃនៅម៉ោង ០៩:១០នាទីព្រឹក និងពេលរសៀល ចាប់ពីម៉ោង ០២:៣០នាទី និងពេលវេលាឈប់ទទួលសំណើរដេញថ្លៃនៅម៉ោង ០២:៤០នាទីរសៀល (ដែលមានរយៈពេលទទួលសំណើរដេញថ្លៃ១០នាទីដូចៗគ្នា) ទើបឈប់ទទួលសំណើរដេញថ្លៃ ក្នុងនោះ ក៏មានក្រុមហ៊ុនបានដាក់សំណើរដេញថ្លៃគម្រោងមូលនិធិឃុំឆ្នាំ២០២២ នៅឃុំស្វាយចេក និងឃុំចាន់ស ត្រូវបានទទួលសំណើរដេញថ្លៃចំនួន ២១ ក្រុមហ៊ុន ឃុំស្វាយចេក ទទួលបានសំណើរដេញថ្លៃមន្ទីរពេទ្យចំនួន ០៨ ក្រុមហ៊ុន និងឃុំចាន់ស ទទួលបានសំណើរដេញថ្លៃប្រឡាយមានចំនួន ១៣ ក្រុមហ៊ុនផងដែរ។
បន្ទាប់មកគណៈកម្មការលទ្ធកម្មទាំង២ឃុំ បានធ្វើការបើកស្រង់តម្លៃដាក់លើក្រដាសផ្ទាំងឆាតដែលក្រុមហ៊ុននីមួយៗ បានដាក់ក្នុងសំណើរដេញថ្លៃ ហើយគណៈកម្មការលទ្ធកម្មឃុំបានពិនិត្យ និងវាយតម្លៃទៅលើសំណើររបស់ក្រុមហ៊ុននីមួយៗ ដែលមានតម្លៃទាបជាងគេទើបជ្រើសរើសយក ដោយមានការចូលរួមពីតំណាងទីចាត់ការផែនការ និងវិនិយោគខេត្ត មន្ត្រីបច្ចេកទេសស្រុក និងការិយាល័យផែនការ និងគាំទ្រឃុំ ក្នុងការបើកសំណើរដេញថ្លៃនោះ ចំពោះការដេញថ្លៃគម្រោងរបស់ថ្នាក់មូលដ្ឋាន ដែលមានឃុំខាងលើបានដំណើរការល្អប្រសើរទៅតាមគោលការសៀវភៅភីមរបស់ឃុំសង្កាត់ ពុំមានអ្វីគួរឲ្យកត់សម្គាល់ឡើយ។
លោក ឈួន ឯម ប្រធានគណ:កម្មការលទ្ធកម្មឃុំស្វាយចេក មានប្រសាសន៏ថា នៅឃុំយើងឃើញថា គណៈកម្មការបានធ្វើការត្រឹមត្រូវមិនមានការខ្សឹបខ្សៀវ មិនហួសម៉ោង មិនមានការលាក់លៀមខ្សឹបខៀវ ដើម្បីកេញប្រវ៉ាញ់ថវិការដ្ឋនោះទេ គឺធ្វើទៅតាមច្បាប់ ទៅតាមគោលការរបស់រដ្ឋត្រឹមត្រូវ ។
លោក បានបង្ហាញទៀតថា ក្រោយពីយើងបានពិនិត្យធ្វើការវាយតម្លៃរួចមក ពាក់ព័ន្ធសំណើរដេញថ្លៃនីមួយៗ គឺមានសុពលភាពគ្រប់គ្រាន់ដែលអាចទទួលយកបាន ហើយគណៈកម្មលទ្ធកម្មឃុំបានធ្វើការប្រកាសលទ្ធផលដល់ក្រុមហ៊ុន ដែលទទួលបានជោគជ័យក្នុងការដាក់សំណើរដេញថ្លៃនេះតែម្តង ។
លោក សួន ជំនិត ប្រធានគណ:កម្មការលទ្ធកម្មឃុំចាន់ស បានលើកឡើងថា រាល់គណៈកម្មការលទ្ធកម្មឃុំទាំងអស់ នៅក្នុងកិច្ចដំណើរការនៃការអនុវត្តនីតិវិធីនៃកិច្ចលទ្ធកម្ម ចាប់តាំងពីពេលដំណើរការរហូតដល់ការប្រកាសលទ្ធផល នៃការដេញថ្លៃ គឺពុំមានបាតុភាពអសកម្មណាមួយមិនប្រក្រតីឡើយ នៅក្នុងបរិវេននិងទីកន្លែងនៃកិច្ចប្រជុំបើកសំណើដេញថ្លៃនោះទេ ដោយពុំមានការរារាំងការបង្ខិតបង្ខំដល់អ្នកទទួលការឬក្រុមហ៊ុន ដែលបានចូលរួមដាក់សំណើរដេញថ្លៃនោះដែរ។
ដោយឡែក ការពិនិត្យរបស់គណៈកម្មការលទ្ធកម្មឃុំ និងការអនុត្តនិតិវិធីលទ្ធកម្ម ជាទូទៅយើងតែងតែអនុវត្តកិច្ចលទ្ធកម្មដោយសន្តិវិធី ដោយជោគជ័យ និងតម្លាភាពខ្ពស់ ។ ប្រសិនបើយើងត្រួតពិនិត្យឃើញថា អ្នកទទួលការអនុវត្តមិនត្រឹមត្រូវទៅតាមលក្ខណៈបច្ចេកទេសនិងកិច្ចសន្យានានានោះ គឺយើងតម្រូវអោយអ្នកទទួលការអនុវត្តគម្រោងនោះត្រូវតែធ្វើការឡើងវិញតាមលក្ខណៈបច្ចេកទេស ដែលបានចុះក្នុងកិច្ចសន្យាទើបរដ្ឋបាលសង្កាត់សម្រេចទូទាត់ថវិកា ក្នុងការអនុវត្តគម្រោងដល់អ្នកទទួលការដែលបានអនុវត្តនោះជាដើម៕
អត្ថបទ និង វីដេអូ ៖ លោកស៊ាន សុផាត
