យោងតាមរបាយការណ៍របស់មជ្ឈមណ្ឌលជាតិសម្រាប់កុមារបាត់ខ្លួន និងត្រូវបានកេងប្រវ័ញ្ច (NCMEC) របស់សហរដ្ឋអាមេរិកបានបង្ហាញថា គិតត្រឹមឆ្នាំ២០២១ នៅទូទាំងពិភពលោក ករណីកេងប្រវ័ញ្ចផ្លូវភេទកុមារតាមអនឡាញ មានចំនួនកើនឡើងដល់ជាង ២៩,៣លានករណី ឬកើន៣៥% ធៀបនឹងឆ្នាំ២០២០ ក្នុងនោះ ៨១% នៃកុមាររងគ្រោះពីរូបភាពរំលោភបំពានផ្លូវភេទ មានអាយុពី ៣ ទៅ ១៣ឆ្នាំ, ១%ជាកុមារមានអាយុក្រោម ២ឆ្នាំ និង ៩៦%ជាក្មេងស្រី។
ថ្លែងក្នុងសិក្ខាសាលាពិគ្រោះយោបល់ស្តីពីការប្រមូលធាតុចូលការអនុវត្តល្អៗ កត្តាប្រឈម និងអនុសាសន៍សម្រាប់ការឆ្លើយតបទៅនឹងអំពើកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ នៅខេត្តសៀមរាប នៅថ្ងៃទី២៧ ខែធ្នូ ឆ្នាំ២០២២ លោក ខឹម វ៉ាន់ដូ ប្រធានបច្ចេកទេសផ្នែកកិច្ចការពារកុមារ នៃអង្គការសកម្មភាពដើម្បីកុមារ មានប្រសាសន៍ថា សម្រាប់ការរៀបចំសិក្ខាសាលានាពេលនេះដែរ គឺមានសារៈសំខាន់ណាស់ក្នុងការពិភាក្សាលើចំណុចល្អៗ ដែលបានអនុវត្តកន្លងមក ការលើកយកចំណុចប្រឈម និងចន្លោះខ្វះខាតនានា ជាពិសេសពិភាក្សាស្វែងរកអនុសាសន៍នានា ក្នុងគោលដៅគិតគូរពិចារណា បន្តការគាំទ្រទៅវិញទៅមក។ ជាពិសេសសិក្ខាសាលានេះ ក៏បានជម្រុញឱ្យមានការប្រើប្រាស់អនុសាសន៍ទាំងនោះ ក្នុងការគិតពិចារណានៅពេលរៀបចំ គោលនយោបាយ ផែនការសកម្មភាព បទដ្ឋានគតិយុទ្ធ ឬគោលនយោបាយនានាសំដៅពង្រឹងការការពារកុមារឱ្យកាន់តែមានប្រសិទ្ធភាពពីការកេងប្រវ័ញ្ចផ្លូវភេទតាមអនឡាញ ខណៈដែលការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញជាបញ្ហាសកល និងកំពុងបង្កហានិភ័យដល់កុមារ គួរឱ្យព្រួយបារម្ភ។
លោកវរសេនីយ៍ឯក ជា ហេង នាយការិយាល័យប្រឆាំងការជួញដូរមនុស្ស និងការពារអនីតិជននៃស្នងការនគរបាលខេត្តសៀមរាប បានមានថ្លែងថា ការកេងប្រវ័ញ្ចផ្លូវភេទលើកុមារតាមអនឡាញកំពុងក្លាយជាក្ដីព្រួយបារម្ភសម្រាប់ពិភពលោកទាំងមូល និយាយជារួម និងនិយាយឡែកសម្រាប់ប្រទេសកម្ពុជាជាពិសេសកុមារដែលជួបប្រទះបញ្ហានេះរួចទៅហើយ។ នៅក្នុងបរិបទនៃការរីកចម្រើនខាងផ្នែកបច្ចេកវិទ្យា ព័ត៌មាន និងទូរគមនាគមន៍ និងកំណើននៃការប្រើប្រាស់ កម្ពុជាបានបោះជំហាន ទៅមុខក្នុងការប្រយុទ្ធប្រឆាំងការកេងប្រវ័ញ្ចផ្លូវភេទកុមារតាមប្រព័ន្ធអនឡាញនិងខិតខំប្រឹងប្រែងធ្វើឱ្យកាន់តែប្រសើរឡើងនូវសុវត្ថិភាពអ៊ីនធឺណិតដើម្បីផ្ដល់បិរយាកាសឌីជីថលវិជ្ជមាន និងប្រកបដោយសុវត្ថិភាពដល់អ្នកប្រើប្រាស់។
លោកវរសេនីយ៍ឯក បន្តថា ដើម្បីបង្ការទប់ស្កាត់ និងឆ្លើយតបការកេងប្រវ័ញ្ចផ្លូវភេទ លើកុមារតាមប្រព័ន្ធអនឡាញនេះ អ្នកពាក់ព័ន្ធទាំងអស់ត្រូវពង្រឹងប្រសិទ្ធភាពការអនុវត្តគោលនយោបាយ និងអភិបាលកិច្ច លើកកម្ពស់យុត្តិធម៌ព្រហ្មទណ្ឌ លើកកម្ពស់វិធានការបង្ការទប់ស្កាត់ និងស្តារនីតិសម្បទាជនរងគ្រោះដោយអំពើកេងប្រវ័ញ្ចផ្លូវតាមប្រព័ន្ធអនឡាញ ពង្រឹងសុវត្ថិភាពសហគមន៍ពីការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ រួមនឹងការពង្រឹងលក្ខន្តិកៈសម្រាប់ការផ្តល់សេវាអ៊ីនធឺណិត និងបង្កើនការផ្សព្វផ្សាយ និងការយល់ដឹងត្រឹមត្រូវអំពីបញ្ហាការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ។
សូមជម្រាបថា យោងតាមការសិក្សាស្រាវជ្រាស្តីពីការវិភាគស្ថានភាពដំបូងនៃការកេងប្រវ័ញ្ចផ្លូវភេទកុមារតាមអនឡាញនៅកម្ពុជាឆ្នាំ២០២០ ដែលក្រុមប្រឹក្សាជាតិកម្ពុជាដើម្បីកុមារ (ក.ជ.ក) បានដឹកនាំ និងសម្របសម្រួលប្រមាណ៦០% នៃកុមារកម្ពុជាដែលបានចូលរួមក្នុងដំណើរការអង្កេតត្រូវបានរាយការណ៍ថា ធ្លាប់បានជួបប្រទះហានិភ័យនៃការកេងប្រវ័ញ្ចផ្លូវភេទតាមអនឡាញ នៅពេលពួកគេប្រើប្រាស់អ៊ីនធឺណិតដូចជាការលួងលោមក្នុងគោលបំណងផ្លូវភេទ និងការបង្ខំផ្ញើរូបអាក្រាតរបស់កុមារជាដើម។ ឆ្លើយតបនឹងបញ្ហាខាងលើ ពិភពលោកក៏ដូចជាប្រទេសកម្ពុជា បានកំពុងយកចិត្តទុកដាក់ និងរួមកម្លាំងគ្នា ដើម្បីបង្ការ ទប់ស្កាត់ និងឆ្លើយតបប្រកបដោយប្រសិទ្ធភាព៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ អ៊ុន ណារាជ្យ
