សម្តេចព្រះអគ្គមហាសង្ឃរាជធិបតី កិត្តិឧទ្ទេសបណ្ឌិត ទេព វង្ស សម្តេចព្រះសង្ឃរាជ គណៈមហានិកាយនៃព្រះរាជាណាចក្រកម្ពុជា បាននិមន្តយាងជាអធិបតី ក្នុងពិធីស្រោចព្រះសុគន្ធវារី ចម្រើនព្រះជន្ម ៨៣វស្សា ឈានចូល ៨៤វស្សា ប្រគេនព្រះមហាវិមលធម្ម ពិន សែម សិរីសុវណ្ណោ ព្រះរាជាគណៈថ្នាក់ទោ គណៈមហានិកាយ ឧត្តមទីប្រឹក្សាសម្តេចព្រះសង្ឃនាយក សមាជិកថេរសភាក្នុងព្រះពុទ្ធសាសនា នៃព្រះរាជាណាចក្រកម្ពុជា ព្រះនាយកពុទ្ធិកវិទ្យាល័យរាជបូណ៌ និងជាព្រះគ្រូចៅអធិការវត្តរាជបូណ៌។
ពិធីនេះបានប្ររព្ភទៅនារសៀលថ្ងៃទី២៧ ខែធ្នូ ឆ្នាំ២០២២នេះ ក្នុងបរិវេនវត្តរាជបូណ៌ សង្កាត់សាលាកំរើក ក្រុងសៀមរាប ខេត្តសៀមរាប ដោយមានវត្តមានចូលរួមពីសំណាក់សម្ដេចព្រះពុទ្ធជ័យមុនីបណ្ឌិត ឃឹម សន ព្រះសង្ឃ សិស្សគណ និងលោក សុខ ថុល អភិបាលរងខេត្តសៀមរាប ឯកឧត្តមលោកជំទាវសមាជិកក្រុមប្រឹក្សាខេត្ត ថ្នាក់ដឹកនាំមន្ត្រីរាជការមន្ទីរអង្គភាពក្នុងខេត្ត ព្រមទាំងពុទ្ធបរិស័ទជាច្រើនផងដែរ។
សម្តេចព្រះពុទ្ធជ័យមុនីបណ្ឌិត ឃឹម សន ព្រះមេគណរាធានីភ្នំពេញ បានប្រគេនព្រះពរព្រះមហាវិមលធម្ម ពិន សែម សិរីសុវណ្ណោ ព្រមទាំងបានកោតសរសើរអំពីស្នាព្រះហត្ថរបស់ព្រះមហាវិមលធម្ម ក្នុងការបង្កើតឱ្យមានកម្មវិធីសិក្សាសម្រាប់ព្រះសង្ឃ និងពុទ្ធបរិស័ទ យុវជន យុវតី ព្រមទាំងកសាងនូវសមទ្ធិផលធំៗក្នុងទីវត្តរាម ក៏ដូចនៅលើទឹកដីសៀមរាបអង្គរ សំដៅបណ្តុះបណ្តាលនូវធនធានមនុស្សលើការអភិវឌ្ឍសង្គមជាតិ និងធ្វើការផ្សព្វផ្សាយព្រះពុទ្ធសាសនាឱ្យកាន់តែមានវិសាលភាពតទៅអនាគត។
ក្នុងនោះព្រះមហាវិមលធម្ម ពិន សែម ព្រះអង្គបានដើរតាមព្រះពុទ្ធដិកា ដែលទ្រង់សំដែងថា ព្រះស្ឃក្នុងព្រះពុទ្ធសាសនា ត្រូវមានធុរៈចម្បង ពីរយ៉ាង នោះគឺគន្ថធុរៈ និងវិបស្សនាធុរៈ ជាមេរៀនដែលធ្វើឱ្យព្រះអង្គមានគោលបំណង ៣យ៉ាង គឺកសាងសាលាបាលី កសាងស្ថានីយ៍វិទ្យុ កសាងមណ្ឌលវិបស្សនា។ សម្តេចព្រះពុទ្ធជ័យមុនីបណ្ឌិត ក៏បានផ្តល់នូវពុទ្ធឱវាទប្រគេនជូនដល់ព្រះភិក្ខុសង្ឃពុទ្ធបរិស័ទទាំងឡាយ យកទៅគោរពបដិបត្តិ ទៅតាមគន្លងនៃវិន័យព្រះសម្មាសម្ពុទ្ធ ដែលជាព្រះបរម្យគ្រូនៃយើង បានចងក្រងជាគម្ពីបិដកឱ្យគោរព ទៅតាមព្រះធម៌វិន័យរបស់ព្រះពុទ្ធសាសនា៕
អត្ថបទ និងរូបភាព៖ លោក ហ៊ុន ឆៃលាង ,លោក ឃុត សៅ
កែសម្រួល៖ លោក អ៊ុន ណារាជ្យ
