មន្ត្រីអង្គភាពការពារអ្នកប្រើប្រាស់ និងកិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) សាខាខេត្តសៀមរាបអំពាវនាវដល់អាជីករលក់ដូរទំនិញ ចំណីអាហារគ្រប់ប្រភេទ ត្រូវពិនិត្យទំនិញរបស់ខ្លួនមុននឹងដាក់លក់ ឯអ្នកប្រើប្រាស់ក៏ត្រូវពិនិត្យដែរមុននឹងទិញយកទៅប្រើប្រាស់ និងបរិភោគ ចៀសវាងទំនិញខូចគុណភាព នាំឱ្យប៉ះពាល់ដល់សុខភាព។
នៅថ្ងៃទី១៩ ខែមករា ឆ្នាំ២០២៣ មន្ត្រីអង្គភាពការពារអ្នកប្រើប្រាស់ និងកិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) សាខាខេត្ត សហការជាមួយមន្ត្រីមន្ទីរពាណិជកម្មខេត្ត និងគណ:កម្មការផ្សារលើធំថ្មី បានចុះត្រួតពិនិត្យសុវត្ថិភាពផលិតផលចំណីអាហារ ជាច្រើនមុខនៅផ្សារលើធំថ្មីក្នុងក្រុងសៀមរាប ដើម្បីការពារសុវត្ថិភាព និងទប់ស្កាត់ផលប៉ះពាល់ជាយថាហេតុដល់សុខភាពសាធារណ:ទាំងអស់គ្នា។ការចុះប្រតិបត្តិការពិនិត្យនេះធ្វើឡើង តាមរយ:រថយន្តមានម៉ាសុីនពិសោធន៍ចល័តផ្នែកម្ហូបអាហារ ១គ្រឿង ដើម្បីត្រួតពិនិត្យសុវត្ថិភាពចំណីអាហារ ក្នុងគោលបំណងរកគ្រឿងឧបភោគ-បរិភោគដែលមិនអនុលោមទៅនឹងបទបញ្ញត្តិសុវត្ថិភាពម្ហូបអាហារ។ ម្យ៉ាងទៀត ដើម្បីជាសារអំពាវនាវជូនដល់បងប្អូនអាជីវករនិងអ្នកប្រើប្រាស់ទំនិញម្ហូបអាហារឲ្យមានការប្រុងប្រយ័ត្ន ខណ:ដែលបុណ្យចូលឆ្នាំប្រពៃណីចិន ជិតមកដល់ និងដោយសារផ្សារលើធំថ្មី ជាមណ្ឌលចែកចាយផលិតផលគ្រឿងឧបភោគ-បរិភោគធំមួយ ដែលចែកចាយមុខទំនិញស្ទើរតែទូទាំងខេត្តសៀមរាប។ការចុះប្រតិបត្តការនេះបានផ្តោតការយកចិត្តទុកដាក់លើការចរាចរណ៍រាល់មុខទំនិញ ដែលមានសារធាតុគីមីហាមឃាត់លើម្ហូបអាហារ ទំនិញហួសថ្ងៃ ខែកំណត់ ការរក្សាទុកបទដ្ឋានព័ត៌មានលើសំបកវេចខ្ចប់។ ការចុះប្រតិបត្តិការជាក់ស្តែងបានត្រួតពិនិត្យមើលទៅលើទំនិញវិចខ្ចប់ស្រាប់ ទំនិញមិនមានវេចខ្ចប់ អាហារផ្អាប់ និងអប់រំណែនាំដល់អាជីវករអំពីការរក្សាទុក សណ្តាប់ធ្នាប់ក្នុងការតាំងលក់ ចំណេះដឹងអំពីបទដ្ឋានព័ត៌មាន និងការពិនិត្យមើលកាលបរិច្ឆេទ។
មន្ត្រីជំនាញបានដកយកគំរូផលិតផលម្ហូបអាហារ មកធ្វើតេស្តបឋម ចំនួន ២២គំរូ ដើម្បីរកសារធាតុគីមីហាមឃាត់ដូចជាសារធាតុ Borax ដែលធ្វើអោយម្ហូបអាហារស្វិត Salicylic Acid ដែលធ្វើអោយជ្រក់ឆាប់ជូរ Sodium Hydrosulfite ដែលធ្វើអោយផលិតផលម្ហូបអាហារសស្រស់ Fomaline ដែលធ្វើអោយម្ហូបអាហារស្រស់ល្អ ។
ក្នុងការធ្វើតេស្តបឋមរកសារធាតុគីមីនេះ មន្ត្រីជំនាញបានរកឃើញសារធាតុគីមីហាមឃាត់ (Borax) មួយគំរូ លើផលិតផលពពុះសណ្តែក។ សារធាតុ Borax ត្រូវបានបទបញ្ញត្តិ ស្តីពីសុវត្ថិភាពម្ហូបអាហារហាមឃាត់មិនអោយដាក់ចូលដាច់ខាតក្នុងម្ហូបអាហារទោះក្នុងគោលបំណងណាក៏ដោយ។ សារធាតុ Boraxនេះ ដែលអ្នកផលិតតែងតែប្រើប្រាស់វាក្នុងគោលដៅធ្វើអោយផលិតផលខ្លួនមានលក្ខណ:ស្វិតល្អ ដូចជាសសៃគុយទាវ សសៃមី ប្រហិតសាច់ នំលត នំចក័ក្កចាន់ ។ល។ សារធាតុនេះដែរ អាចបណ្តាលអោយពុលតម្រងនោម ខួរក្បាល រលាកប្រព័ន្ធក្រពះពោះវៀន ហើយបើស្រូបចូលក្នុងខ្លួនមនុស្សចាស់លើសពី១៥ក្រាម និងក្មេងលើសពី៥ក្រាម អាចបណ្តាលអោយក្អួតឈាមឬស្លាប់បាន។ នេះបើតាម ការឱ្យដឹងពីលោក ខៀវ បញ្ញាវឌ្ឍន៍ ប្រធានសាខាអង្គភាព ក.ប.ប. ខេត្តសៀមរាប។លោក ខៀវ បញ្ញាវឌ្ឍន៍ បានបញ្ជាក់ថា៖យោងលើលទ្ធផលនៃការធ្វើតេស្តបឋម និងយោងលើការត្រួតពិនិត្យជាក់ស្តែង បើប្រៀបធៀបនឹងដើមឆ្នាំ២០២២ ជាមួយដើមឆ្នាំ២០២៣ នេះ ឃើញថាការប្រើប្រាស់សារធាតុគីមីលើម្ហូបអាហារ ក្នុងខេត្តសៀមរាប មានការថយចុះ៧៥% ហើយការរៀបចំទុកដាក់ ក៏ដូចជាអនុលោមភាពទៅលើបទដ្ឋានព័ត៌មានលើសំបកវេចខ្ចប់ មានការរីកចំរើនគួរអោយកាត់សំគាល់ដែរ។
លោក ប្រធានសាខា ក.ប.ប. ខេត្ត បានសំណូមពរអោយអាជីវករចែកចាយម្ហូបអាហារទាំងអស់ មេត្តារួមចំណែកទទួលខុសត្រូវចំពោះមុខច្បាប់ និងសុខភាពសារធារណ: និងស្វែងយល់ពីវិធានការពារ ការថែរក្សា ការរកវិក័យបត្រច្បាស់លាស់ មុននឹងទទួលទិញម្ហូបអាហារយកមកចែកចាយដល់អ្នកប្រើប្រាស់។ លោកបន្តថា ផ្អែកទៅលើច្បាប់ ស្តីពីកិច្ចការពារអ្នកប្រើប្រាស់ មាត្រា៤១ អ្នកចែកចែកចាយម្ហូបអាហារ ដែលមិនអនុលោមនឹងបទបញ្ញត្តិសុវត្ថិភាពម្ហូបអាហារ ត្រូវពិន័យអន្តរការណ៍រហូតដល់ ២០លានរៀល និង១០លានរៀល ប្រសិនបើចែកចាយផលិតផលម្ហូបអាហារមិនអនុលោមនឹងបទដ្ឋានព័ត៌មាន។
លោក ខៀវ បញ្ញាវឌ្ឍន៍ថា៖ ដើម្បីរក្សាសុវត្ថិភាពម្ហូបអាហារ ត្រូវការការចូលរួមពីយើងទាំងអស់គ្នា ទាំងអ្នកម្ចាស់ផលិត អ្នកចែកចាយ រួមទាំងអ្នកប្រើប្រាស់ និងអង្គភាពជំនាញពាក់ព័ន្ធទាំងអស់ផងដែរ ពោលគឺអាជីវករលក់ចំណីអាហារ និងទំនិញគ្រប់ប្រភេទ ត្រូវពិនិត្យផលិតផលនិងទំនិញរបស់ខ្លួនមុននឹងដាក់លក់ ឯអ្នកប្រើប្រាស់ក៏ត្រូវពិនិត្យដែរមុននឹងទិញយកទៅប្រើប្រាស់ឬមុននឹងបរិភោគ ចៀសវាងទំនិញខូចគុណភាព នាំឱ្យប៉ះពាល់ដល់សុខភាព៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
