ការរំលោភបំពានផ្លូវភេទលើអនីតិជននៅតែជាក្តីព្រួយបារម្ភ ជាមួយនឹងការកើតឡើងថ្មី នូវអំពើជួញដូរទារក តាមរូបភាព នៃការពពោះជំនួស ខណៈពេលជារួមនៃអំពើជួញដូរមនុស្សនៅកម្ពុជា មានថយចុះ !
របាយការណ៍របស់លោកស្រី យូ សុភា អភិបាលរងខេត្ត ប្រធានលេខាធិការដ្ឋាន គណកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប បានបង្ហាញនៅក្នុងកិច្ចប្រជុំបូកសារុបលទ្ធផលការងារឆ្នាំ២០១៨ និងលើកទិសដៅបន្តឆ្នាំ២០១៩ របស់គណកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប នាព្រឹកថ្ងៃទី២៩ ខែមីនា ឆ្នាំ២០១៩នេះថា ៖ ថ្មីៗនេះ នៅក្នុងប្រទេសកម្ពុជា កើតមាននូវអំពើជួញដូរមនុស្សមួយបែបទៀត គឺការជួលពពោះជំនួស ដើម្បីជួញដូរទារកនិងនាំចេញទៅក្រៅប្រទេស ដែលនេះគឺជាសកម្មភាពខុសច្បាប់ ហើយបានជះឥទ្ធិពលមិនល្អដល់វប្បធម៌-ប្រពៃណី សីលធម៌រស់នៅ និង ជាការបង្កផលប៉ះពាល់ដល់សុខភាពនិងអាយុជីវិតស្ត្រីជាមាតានិងទារក ផងដែរ ។
លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទែ អនុប្រធានអចិន្ត្រៃយ៍ គណកម្មាធិការជាតិ ប្រយុទ្ធប្រឆាំងអំពើជួញដូរមនុស្ស មានប្រសាសន៍ថា ៖ នេះគឺជាបញ្ហាដែលត្រូវគិត ការជួញដូរទារកតាមរូបភាពនៃការពពោះជំនួស វាខុសនឹងច្បាប់និងប្រពៃណី ។ អ្នកបង្កើតកូនហើយលក់ ឬក៏នាំឆ្លងដែនទៅក្រៅប្រទេសដើម្បីធ្វើអាជីវកម្ម តាមផ្លូវច្បាប់ស្តីពីការបង្ក្រាបអំពើជួញដូរមនុស្សនិងការធ្វើអាជីវកម្មផ្លូវភេទនៅកម្ពុជា គឺត្រូវទទួលទោសជាប់ពន្ធនាគារ ពី១៥ឆ្នាំ ទៅ ២០ឆ្នាំ ។ អ្នកជួញដូរអនីតិជនឆ្លងដែន និង អ្នកដែលឃុបឃិតគឺមានទោសទណ្ឌដូចគ្នា ។
លោកជំទាវ ក៏បានបង្ហាញផងដែរនូវការសោកស្តាយ ដែលមកទល់នឹងបច្ចុប្បន្ននេះ ការរំលោភបំពានផ្លូវភេទទៅលើអនីតិជននៅតែជាបញ្ហា ។ ការស្ទាបស្ទង់ប៉ាន់ប្រមាណលើការរំលោភបំពានផ្លូវភេទលើអនីតិជន ភាគច្រើនជាទូទៅមានពីអាយុ១២ ទៅ ១៣ឆ្នាំ និងក្នុងអាយុក្រោមនេះក៏មានដែរ ហើយការកើតឡើងនៃអំពើរំលោភផ្លូវភេទលើអនីតិជន វាគឺជាសញ្ញាមួយបង្ហាញអំពីការធ្លាក់ចុះនៃសីលធម៌សង្គម ។
លោកជំទាវបញ្ជាក់ថា ៖ ទោះជាយ៉ាងណាដោយ ជារួម អំពើជួញដូរមនុស្សនៅកម្ពុជាត្រូវបានថយចុះ និងស្ថិតក្រោមនៃការគ្រប់គ្រងរបស់សមត្ថកិច្ចជំនាញ ។ គ្រប់ប្រភេទនៃបទល្មើសជួញដូរមនុស្ស ត្រូវបានបង្ក្រាបស្ទើរគ្រប់ករណី ជាមួយនឹងការជួយសង្គ្រោះជនរងគ្រោះ និង បានបញ្ជូនជនល្មើសទៅតុលាការ ។ ទោះបីថា នៅមានបញ្ហាជាច្រើនទៀតដែលត្រូវអនុវត្តដោះស្រាយ ក៏ប៉ុន្តែអ្វីដែលត្រូវបានដឹង គឺមិនត្រូវបានព្រងើយកន្តើយនោះទេ គឺត្រូវបានបង្ក្រាប ជាមួយនឹងការធ្វើសកម្មភាពផ្សព្វផ្សាយអប់រំប្រជាពលរដ្ឋផងដែរ ។ បើគិតជារួម មកទល់ពេលនេះ មានប្រជាពលរដ្ឋប្រមាណជា ជាង ៥លាននាក់ហើយ ដែលនទទួលយកនូវការអប់រំ ស្តីអំពីការប្រយុទ្ធប្រឆាំងអំពើជួញមនុស្ស តាមរយៈនៃកម្មភាពរបស់ភ្នាក់ងារដែលជាមន្ត្រីឬក៏ជាដៃគូ និង អ្នកចូលរួមអនុវត្តការងារនេះ ទាំងជាតិនិងអន្តរជាតិ ៕
អត្ថបទ និងរូបភាព៖ លោក ងិន គឺមឡេង
