នៅរសៀលថ្ងៃទី២៩ ខែមីនាឆ្នាំ២០១៩មន្ទីរព័ត៌មានខេត្តសៀមរាបបានរៀបចំកិច្ចប្រជុំជាមួយនាយកអ្នកសារព័ត៌មាន កាសែត ទស្សនាវដ្ដី ព្រឹត្តបត្រ គេហទំព័រ និងអ្នកពាក់ព័ន្ធក្នុងវិស័យព័ត៌មាន ក្នុងខេត្តសៀរាបទាំងអស់ ដើម្បីប្រមូលមតិយោបល់សំខាន់ៗ បញ្ហាប្រឈមនានា និងសំណូមពររបស់អ្នកសារព័ត៌មាននាពេលកន្លងមក ដើម្បីដាក់បញ្ចូលទៅក្នុងសិក្ខាសាលាស្ដីអំពី “តួនាទីអ្នកសារព័ត៌មាន” ដែលនឹងប្រព្រឹត្តទៅនៅដើមឆមាសទី២ ឆ្នាំ២០១៩ខាងមុខ។
បើតាមរបាយការណ៍មន្ទីរព័ត៌មានខេត្តសៀមរាប កិច្ចប្រជុំនេះមានអ្នកសារព័ត៌មានក្នុងខេត្ត ចូលរួមសរុប ៧៥នាក់ ស្រី៤នាក់ ដែលមកពី៥៩អង្គភាព។
ថ្លែងបើកក្នុងកិច្ចប្រជុំនេះ លោក លីវ សុខុន ប្រធានមន្ទីរព័ត៌មានខេត្តសៀមរាប បានមានប្រសាសន៍ថា ការចូលរួមរបស់បងប្អូនអ្នកព័ត៌មាននាពេលនេះ បានបង្ហាញពីកិច្ចសហការយ៉ាងស្អិតរមួត រវាងអាជ្ញាធរ ជាមួយអ្នកសារព័ត៌មានឯកជនក្នុងខេត្ត ។ ពីមួយឆ្នាំទៅមួយឆ្នាំ វិស័យព័ត៌មានក្នុងប្រទេសកម្ពុជា កាន់តែមានអភិវឌ្ឍន៍ប្រសើរឡើងជាលំដាប់ ដោយប្រមុខរាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ជានាយករដ្ឋមន្ត្រី បានផ្ដល់សិទ្ធពេញលេញ ដល់អ្នកសារព័ត៌មានជាតិ និងអន្តរជាតិ គ្រប់និន្នាការ (ប្រឆាំង ស្រប និងឯករាជ្យ) ដែលទទួលស្គាល់ដោយក្រសួងព័ត៌មាន ធ្វើប្រតិបត្តិការចុះយក ព័ត៌មាននៅទូទាំងប្រទេស។ ជាមួយគ្នានោះ អ្នកសារព័ត៌មាន មានតួនាទីជាកញ្ចក់ឆ្លុះបញ្ចាំងអំពីតថភាពដល់សង្គម រាជរដ្ឋាភិបាល និងប្រជាពលរដ្ឋ ហើយអ្នកសារព័ត៌មានមិនមែនជាសមត្ថកិច្ច អាជ្ញាធរ ឬតុលាការឡើយ មួយវិញទៀត អ្នកសារព័ត៌មាន ដែលទទួលសំណូកពីជនល្មើស ជាថ្នូរនឹងការលាក់បាំងមិនចេញផ្សាយព័ត៌មានបទល្មើសនោះ ក៏មិនសាកសមជាអ្នកសារព័ត៌មានដែរ ។ ដូច្នេះសូមអ្នកសារព័ត៌មានទាំងអស់ សរសេរព័ត៌មានប្រកបដោយក្រមសីលធម៌ វិជ្ជាជីវៈ គុណភាព តម្លាភាព និងប្រភពពិតគ្រប់ជ្រុងជ្រោយ។
ក្នុងកិច្ចប្រជុំនេះ លោកលីវ សុខុន ក៏បានលើកទឹកចិត្តដល់អ្នកសារព័ត៌មានទាំងអស់ធ្វើចំណាប់អារម្មណ៍ ឲ្យ បានផុសផុលជុំវិញចំណុចវិជ្ជមាន អវិជ្ជាមានសំណូមពរ និងលើកនូវបញ្ហាប្រឈមនានា ដែលពួកគាត់បានជួប ប្រទះនាពេលកន្លងមក ។ ក្នុងនោះ ជាមតិប្រហាក់ប្រហែលៗគ្នា ដែលអ្នកសារព័ត៌មានមួយចំនួនក្នុងខេត្ត សៀមរាប បានលើកយកបញ្ហាបទល្មើសព្រៃឈើ បទល្មើសនេសាទ គឺជាបញ្ហាប្រឈមខ្ពស់ ដោយសមត្ថកិច្ចពាក់ព័ន្ធបានគំរាមគំហែងតាមគ្រប់រូបភាពផ្សេងៗ និងពុំអាចសុំធ្វើការទំនាក់ទំនងព័ត៌មានបាន ដើម្បីឲ្យពួកគាត់អាចសរសេរព័ត៌មាន មានតុល្យភាពប្រភពគ្រប់ជ្រុងជ្រោយ។
ទន្ទឹមនឹងនោះ អ្នកសារព័ត៌មានក៏បានលើកនូវបញ្ហាប្រឈមមួយទៀតថា នាពេលកន្លងមកក្នុងខេត្តសៀមរាប អាជ្ញាធរមូលដ្ឋាន រួមនឹងមន្ត្រីមានសមត្ថកិច្ច បានណែនាំ ឲ្យអ្នកសារព័ត៌មានដែលទទួលស្គាល់ដោយក្រសួងព័ត៌មាន (មានបណ្ណសំគាល់ខ្លួន មិនហួសសុពលភាព)ហើយត្រូវសុំការ អនុញ្ញាត មុននឹងចុះយកព័ត៌មាន(បើពួកគេអនុញ្ញាត ទើបចូលយកបាន)នៅតាមទីសាធារណក្នុងមូលដ្ឋាននោះ។ ក្នុងនោះ មានអ្នកសារព័ត៌មានមួយចំនួនទទួលស្គាល់ថា កន្លងមក មានអ្នកសារព័ត៌មានមួយចំនួនក្នុងខេត្ត បានសរសេរព័ត៌មានមិនមានវិជា្ជជីវៈ និងវាយ ប្រហារមក លើអាជ្ញាធរខេត្តសៀមរាប មិនមានមូលដ្ឋានពិតប្រាកដមែន ដែលព័ត៌មានប្រភេទនេះ ត្រូវបានរាប់បញ្ចូលជាព័ត៌មានមិនពិត ដូចនេះពួកគាត់មិនគាំទ្រព័ត៌មានប្រភេទនេះឡើយ។
ដោយឡែក ជាសំណូមពរ របស់អ្នកសារព័ត៌មាន បានស្នើសុំដល់អាជ្ញាធរខេត្ត សូមឲ្យមានអ្នកនាំពាក្យប្រចាំមន្ទីរអង្គភាពរៀងៗខ្លួន ដើម្បីផ្ដល់ភាពងាយស្រួល ដល់អ្នកសារព័ត៌មានសុំទំនាក់ទំនងព័ត៌មាន ខណៈថ្នាក់ដឹកនាំមន្ទីរ អង្គភាព ក្រុង ស្រុក ព្យាយាមបដិសេធ គិចវេសថា បេសកកម្ម មិនអាចផ្ដល់ព័ត៌មានបាន។ ជាមួយគ្នាដែរនោះ ពួកគាត់បានស្នើសុំ ឲ្យមានវគ្គ បណ្តុះបណ្ដាលបន្ថែមអំពីការផលិតព័ត៌មាន វិជ្ជាជីវៈ និងក្រមសីលធម៌ ដល់អ្នកសារព័ត៌មាន និងអ្នកពាក់ព័ន្ធក្នុងវិស័យព័ត៌មាន ក្រៅរាជរដ្ឋាភិបាល ដើម្បីឲ្យពួក គាត់យល់ច្បាស់ថា អ្វីជាព័ត៌មានប្រកបដោយវិជ្ជាជីវៈ និងចូលរួមប្រឆាំងរាល់ការផ្សព្វផ្សាយព័ត៌មានមិនពិត ។
មានមតិយោបល់ឆ្លើយតបអ្នកសារព័ត៌មានលោកប្រធានមន្ទីរ បានសម្ដែងនូវការពេញចិត្ត និងទទួលយកនូវបញ្ហាប្រឈមនានា សំណួរ និងសំណូមពរទាំងអស់ ដើម្បីជាធាតុចូល សម្រាប់បញ្ចូលទៅក្នុងអង្គសិក្ខា សាលា ស្ដីអំពី “តួនាទីអ្នកសារព័ត៌មាន” ដែលនឹងប្រ ព្រឹត្ត ទៅនៅដើមឆមាសទី២ ឆ្នាំ២០១៩ខាងមុខ ។ ក្នុងនោះដែរមន្ទីរព័ត៌មានខេត្តសៀមរាប គ្រោងនឹងអញ្ជើញឯកឧត្តម ខៀវ កាញារីទ្ធ រដ្ឋមន្ត្រីក្រសួង ព័ត៌ មាន រួមជាមួយឯកឧត្តម ទៀ សីហា អភិបាលខេត្តសៀមរាប អញ្ជើញជាអធិបតីក្នុងអង្គសិក្ខាសាលានោះផងដែរ។
គួររំលឹកថា នេះជាលើកទី៣ ហើយ ដែល មន្ទីរព័ត៌មានខេត្ត បានរៀបចំ កិច្ចប្រជុំ និងសំណេះ សំណាលជាមួយអ្នកសារព័ត៌មាន និង អ្នកពាក់ព័ន្ធនឹងវិស័យព័ត៌មាន ក្នុងខេត្តសៀមរាប។ ដោយលើកទីមួយ នៅថ្ងៃទី ២៩ ខែ មករា ឆ្នាំ២០១៨ មន្ទីរព័ត៌មានខេត្ត សៀមរាប បានសហការជាមួយវិទ្យាស្ថានសារគមនាគមន៍កម្ពុជា(CCI) នៃសកលវិទ្យាល័យភូមិន្ទ ភ្នំពេញ ស្ដីអំពី« ការផ្សព្វផ្សាយបទពិសោធន៍ និងចំណេះដឹងក្នុងការបង្កើតវគ្គបណ្ដុះបណ្ដាល ស្ដីពីសិទ្ធិទទួលព័ត៌មាន » ក្រោមអធិបតីភាព ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន ដែលរៀមចំ ដោយវិទ្យាស្ថានសារគមនាគមន៍កម្ពុជា សហការរៀបចំ ដោយមន្ទីរព័ត៌មានខេត្តសៀមរាប ក្នុងមាន ខេត្ត កំពង់ធំ ខេត្តបាត់ដំបង ខេត្តបន្ទាយមានជ័យ ខេត្តឧត្តរមាន ជ័យ និងបណ្ដាសារព័ត៌មានក្នុងខេត្តសៀមរាប សរុប ៦០នាក់ ។ លើកទី២ ថ្ងៃទី២២ ខែមិថុនា ឆ្នាំ២០១៨ មន្ទីរព័ត៌មានខេត្តសៀមរាប បានរៀបចំកម្មវិធីជួបសំណេះ សំណាល និងកិច្ចប្រជុំ ជាមួយអ្នកសារព័ត៌មាន និង អ្នកពាក់ព័ន្ធនឹងវិស័យព័ត៌មាន ក្នុងខេត្តសៀមរាប សរុបប្រមាណ៥០នាក់។
អត្ថបទ៖ លោក សេង ផល្លី
រូបភាព៖ លោក វ៉ាន់ លីហួង
