ក្រុងសៀមរាប គឹក្លាយជាក្រុងដំបូងគេ ក្នុងប្រទេសកម្ពុជា ក្នុងការរៀបចំបណ្ដាញលូប្រមូលទឹកកខ្វក់ ក្នុងនោះថ្លៃសេវាប្រមូលទឹកកខ្វក់នេះដែរ នឹងត្រូវបញ្ចូលក្នុងវិក្ក័យបត្រទឹកស្អាត។
នៅក្នុងកិច្ចប្រជុំ “ពិគ្រោះយោបល់លើកចុងក្រោយ លើផែនការបណ្ដាញលូប្រមូលទឹកកខ្វក់ ក្នុងក្រុងសៀមរាប ខេត្តសៀមរាប “ ថ្ងៃទី២៩ ខែមីនា ឆ្នាំ២០១៩ ឯកឧត្តម ហេង រត្នពិសិដ្ឋ អគ្គនាយកនៃអគ្គនាយកដ្ឋាន សាធារណការ នៃក្រសួងសាធារណការ និងដឹកជញ្ជូន បានមានប្រសាសន៍ថា គម្រោងនេះ ត្រូវក្រុមការងារជំនាញ ចុះសិក្សាអស់រយៈ៩ខែមកហើយ ពោលគឺក្នុងឆ្នាំ២០១៨ ហើយគម្រោងនេះ នឹងចាប់ផ្ដើមអនុវត្តន៍ក្នុងឆ្នាំ២០១៩នេះ និងបញ្ចប់នៅឆ្នាំ២០៣០។ គម្រោងនេះ នឹងសាងសង់បណ្តាញលូខ្នែង និង ខ្នែងរងក្នុងក្រុងសៀមរាប ត្រូវចំណាយថវិកាប្រមាណ ២៤លាន ដុល្លារសហរដ្ឋអាមេរិក រួមទាំងការចំណាយលើការសាងសង់បណ្តាញលូ ការកែលម្អស្ថានីយបូម ដែលមានស្រាប់ទាំងបីទីតាំង ការកែលម្អស្ថានីយប្រព្រឹត្តិកម្មទឹកកខ្វក់ ការកសាងសមត្ថភាពមន្ត្រី និង រៀបចំផែនការតភ្ជាប់បណ្តាញលូ និង ការងារពាក់ព័ន្ធមួយចំនួនទៀត។
ឯកឧត្តម ហេង រត្នពិសិដ្ឋ បន្តទៀតថា ការរៀបចំបណ្តាញលូខ្នែង និង ខ្នែងរងនេះ មានប្រវែងប្រមាណ ៦២គីឡូម៉ែត្រ ដែលមានទំហំមុខកាត់ ចន្លោះពី១៥០មីលីម៉ែត្រ ទៅ៤០០មីលីម៉ែត្រ ដោយចែកចេញជាពីរតំបន់ គឺតំបន់ខាងលិច ៣០គីឡូម៉ែត្រ តំបន់ខាងកើត ៣២គីឡូម៉ែត្រ ។ ម្យ៉ាងទៀតនៅពេលថ្មីៗនេះក្រសួងសេដ្ឋកិច្ច និង ហិរញ្ញវត្ថុ បានទទួលឥណទាន ចំនួន ៥៥លានដុល្លារសហរដ្ឋអាមេរិក ពីធនាគារពិភពលោក សម្រាប់គម្រោងលើកកម្ពស់ការផ្គត់ផ្គង់ទឹកស្អាត និង អនាម័យនៅប្រទេសកម្ពុជា ក្នុងនោះក៏មានការគ្រប់គ្រង់ទឹកកខ្វក់ក្នុងខេត្តសៀមរាបមួយផ្នែក នៃគម្រោងនេះផងដែរ។
ព័ត៌មានជាតិ ថ្មីៗ
ឯកឧត្តមក៏បានរំពឹងផងដែរថា ទឹកកខ្វក់ដែលបញ្ចេញចោលដោយផ្ទាល់ ទៅកាន់ប្រភពទឹកសាធារណៈ នឹង ត្រូវបានកាត់បន្ថយតាមរយៈបណ្តាញលូប្រមូលទឹកកខ្វក់នេះ ក្នុងនោះអាជ្ញាធរមូលដ្ឋានត្រូវចូលរួមសហការ ជម្រុញឲ្យប្រជាពលរដ្ឋតភ្ជាប់បំពង់លូពីផ្ទះរបស់ពួកគាត់ ចូលទៅកាន់បណ្តាញលូសាធារណៈ ដើម្បីពង្រីកតំបន់សេវាឲ្យកាន់តែធំថែមទៀត សំដៅធ្វើឲ្យខេត្តប្រវត្តិសាស្ត្រមួយ កាត់បន្ថយនូវផលប៉ះពាល់ដោយការបង្ហូរទឹកកខ្វក់ និងធ្វើឲ្យសុខភាពរបស់ប្រជាពលរដ្ឋ និង ភ្ញៀវទេសចរណ៍ ដែលមកទស្សនានៅក្នុងខេត្តនេះ កាន់តែល្អប្រសើរថែមទៀត ៕
អត្ថបទ និង រូបភាព៖ លោក គឿន វេត
កែសម្រួលអត្ថបទ៖ លោក សេង ផល្លី
