នៅរសៀលថ្ងៃទី ២៩ ខែមីនា ឆ្នាំ២០១៩ លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប អមដំណើរជាមួយមន្ត្រីខណ្ឌរដ្ឋបាលជលផល និងគណៈកម្មការសហគមន៍នេសាទចុងឃ្នៀសបានចុះពិនិត្យ និងពង្រឹងការគ្រប់គ្រង និងយាមល្បាតកន្លែងអភិរក្សជលផលអតីតឡូត៏នេសាទលេខ៤ ស្ថិតក្នុង ឃុំកំពង់ភ្លុក ស្រុកប្រាសាទបាគង ខេត្តសៀមរាប ។
មានប្រសាសន៍សំណេះសំណាល ក្នុងឱកាសនោះ លោក ទា គឹមសុទ្ធ ណែនាំដល់ដល់កម្លាំងអនុរក្សប្រចាំការនៅទីនោះដោយបានផ្តាំផ្ញើ ដល់មន្ត្រីប្រចាំការតាមគោលដៅ ទាំងអស់ ត្រូវយកចិត្តទុកដាក់ចូលរួមយាម ល្បាតកន្លែងអភិរក្សត្រីពូជនារដូវប្រាំងនេះអោយបានគង់វង្ស ដើម្បីត្រីសាយពូជ ធារ កើនឡើងនៅក្នុងដែននេសាទសហគមន៍ របស់យើង ក្រៅពីនេះសូមកម្លាំងយើងខិតខំចូលរួមទប់ស្កាត់ បង្ក្រាបបទល្មើសនេសាទទាំងឡាយ ក្នុងតំបន់គោលដៅជាដាច់ខាត ។ ជាពិសេសក្នុងឱកាសចូលឆ្នាំថ្មីប្រពៃណីជាតិខ្មែរខាងមុខនេះ ក្រុមអនុរក្ស ទាំងអស់ ត្រូវធ្វើការបែងចែកកម្លាំងគ្នាយាមល្បាតឲ្យបានជាប្រចាំ និងជាប់លាប់ ជៀសវាងការលួចចូលមកធ្វើនេសាទ។
បន្ទាប់លោកប្រធានបានចុះពិនិត្យតាមព្រំប្រទល់កន្លែងអភិរក្ស និងការធ្វើនេសាទនេសារជាលក្ខណៈគ្រួសារដោយឌបករណ៍អួនអូសដៃនៅសង្កាត់ចុងឃ្នៀស ។ ដើម្បីជាការលើកទឹកចិត្ត និងជៀសវាងអវត្តមានពីចំណុចប្រចាំការ នៅក្នុងឱកាសបុណ្យចូលឆ្នាំប្រពៃណីជាតិខ្មែរនាខាងមុខ លោក ទា គឹមសុទ្ឋ បាននាំយកនូវម្ហូបអាហារ និងភេសជ្ជៈមួយចំនួន ជូនដល់ក្រុមអនុរក្ស សម្រាប់ទទួលទានក្នុងឱកាសពិធីបុណ្យចូលឆ្នាំនេះផងដែរ ។
អត្ថបទ និង រូបភាព៖ លោក យូ វង្ស
កែសម្រួលអត្ថបទ៖ លោក សេង ផល្លី
