កីឡាករ ភ្ញៀវទេសចរអន្តរជាតិលំដាប់សេដ្ឋី-មហាសេដ្ឋី និងអ្នកវិនិយោគធំៗលើវិស័យទេសចរណ៍ ៥៦២នាក់ មកពី៤៥ប្រទេស នឹងចូលរួមប្រកួត «កីឡាវាយកូនហ្គោលអាស៊ី» លើកទី៨ នៅលើទឹកដីសៀមរាប-អង្គរ ដែលនឹងចាប់ពីថ្ងៃទី០៣ ដល់ទី០៥ ខែមេសា ឆ្នាំ២០១៩ ដែលរៀបចំឡើងដោយក្រសួងទេសចរណ៍ សហការជាមួយអង្គការទេសចរណ៍កីឡាវាយកូនហ្គោលពិភពលោក។
នេះបើយោងតាម សន្និសីទសារព័ត៌មាន នៅថ្ងៃទី៣០ ខែមីនា ឆ្នាំ២០១៩ ដែលអញ្ជើញជាអធិបតីដោយ ឯកឧត្តម ជា បូរ៉ា រដ្ឋលេខាធិការក្រសួងទេសចរណ៍ និងជាអគ្គលេខាធិការសហព័ន្ធវាយកូលគោលកម្ពុជា។
ឯកឧត្តម ជា បូរ៉ា បានឲ្យដឹងថា ទេសចរណ៍កីឡាវាយកូនហ្គោលនេះ ជាប្រភេទទេសចរណ៍មួយ ដែលភ្ញៀវទេសចរមានការចំណាយច្រើនជាងដំណើរកម្សាន្តផ្សេងៗ ពីព្រោះអ្នកចូលលេងភាគច្រើនជាអ្នកវិនិយោគ ម្ចាស់ក្រុមហ៊ុន មហាសេដ្ឋី ឬក៏អ្នកដែលមានជីវភាពធូរធាណាស់។ ក្រៅពីការប្រកួតនេះ ក៏មានពិធីជួបជុំដ៏ធំមួយរវាងអ្នកលក់ និងអ្នកទិញប្រមាណជាង ៤០០នាក់ ដើម្បីពិភាក្សាគ្នាលើកិច្ចសហការ ទិញ-លក់កញ្ចប់ទស្សនកិច្ចទេសចរណ៍ផងដែរ។
ព័ត៌មានជាតិ ថ្មីៗ
ឯកឧត្តម អះអាងថា ការរៀបចំព្រឹត្តិការណ៍កីឡានេះ គឺស្របទៅនឹងគោលនយោបាយរបស់រាជរដ្ឋាភិបាលកម្ពុជា ក៏ដូចជាក្រសួងទេសចរណ៍ ដែលកំពុងខិតខំជម្រុញវិស័យទេសចរណ៍កីឡាវាយកូនហ្គោល នេះ ឲ្យរីកដុះដាលឡើង ដើម្បីផ្សព្វផ្សាយពីវិស័យទេសចរណ៍នៅកម្ពុជាផង និងដើម្បីត្រៀមខ្លួនក្នុងការប្រកួតកីឡាស៊ីហ្គេម ឆ្នាំ២០២៣ ដែលកម្ពុជានឹងទទួលធ្វើម្ចាស់ផ្ទះ។
នាពេលកន្លងមក ព្រឹត្តិការណ៍កីឡានេះ បានរៀបចំឡើងនៅ ប្រទេសថៃ ម៉ាឡេស៊ី ចិន ឥណ្ឌូនេស៊ី វៀតណាម ហ្វីលីពីន និងនៅឆ្នាំ២០១៩នេះ ខេត្តសៀមរាបជាកន្លែង ដ៏មានប្រជាប្រិយភាពក្នុងការទទួលព្រឹត្តិការណ៍នេះ។
អត្ថបទ និង រូបភាព៖ លោក យូ វង្ស
កែសម្រួលអត្ថបទ៖ លោក សេង ផល្លី
