សិក្ខាសាលាបំប៉នគ្រូបង្រៀនថ្នាក់ទី១ ធ្វើឡើងដើម្បីលើកកម្ពស់គុណភាព ការបង្រៀនរបស់លោកគ្រូ-អ្នកគ្រូ និងលើកកម្ពស់ការរៀនសូត្ររបស់សិស្សនៅថ្នាក់ដំបូងនៃការអប់រំបឋមសិក្សា តាមរយៈប្រើសៀវភៅអាន-សរសេរភាសាខ្មែរថ្នាក់ទី១ និងសម្ភារៈអំណានបន្ថែមផ្សេងៗជាច្រើនទៀត។
គោលដៅនៃវគ្គបំប៉ននៃអង្គសិក្ខាសាលនេះ មាន២គឺ ទី១/ ជាការជួបជុំរបស់គ្រូបង្រៀន ដើម្បីពិនិត្យឡើងវិញលើបញ្ហាប្រឈម ដែលលោកគ្រូ-អ្នកគ្រូ បានអនុវត្តមួយរយៈពេលកន្លងមកនេះ និង ពិភាក្សារកដំណោះស្រាយ ទី២ / ដើម្បីបំប៉នបន្ថែមលើខ្លឹមសារមេរៀនថ្មីសម្រាប់ឆមាសទី២ ដោយផ្តោតទៅលើការបង្រៀនសញ្ញាមូសិកទន្ត និង ត្រីសព្ទ មេរៀនប្រកប មេរៀនស្រៈពេញតួ មេរៀនផ្ញើជើង និង ព្យាង្គតម្រួត ៕
ឯកឧត្តម ចាន់ សុភា ប្រធាននាយកដ្ឋានបឋមសិក្សារបស់ក្រសួងអប់រំ បង្ហាញឲ្យដឹងយ៉ាងដូច្នេះ នារសៀលថ្ងៃទី៣០ ខែមីនា ឆ្នាំ២០១៩កន្លងមកនេះ នៅសាលាបឋមសិក្សាស្វាយធំ ឃុំកណ្តែក ស្រុកប្រាសាទបាគង ខេត្តសៀមរាប ក្នុងពិធីបើកអង្គសិក្ខាសាលាបំប៉ន ស្តីពីការណែនាំប្រើប្រាស់សាកល្បង កញ្ចប់សម្ភារៈអំណានថ្នាក់ដំបូង ដល់គ្រូបង្រៀនថ្នាក់ទី១ ដំណាក់កាលទី៣ ។
ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំយុវជននិងកីឡា រំលឹកថា ៖ មុននឹងមានការអនុវត្តកម្មវិធីថ្មីសម្រាប់បង្រៀនសិស្សថ្នាក់ទី១ ក្រសួងអប់រំត្រូវបានសិក្សាស្រាវជ្រាវដោយផ្ទាល់នៅតាមសាលារៀន ជាលទ្ធផលបានរកឃើញថា ៖ អត្រាសិស្សដែលចេះអានអក្សចាប់ពីថ្នាក់ទី៥ចុះ គឺមានកម្រិតទាបបំផុត ។
ឯកឧត្តមរដ្ឋមន្ត្រី បង្ហាញនូវការកត់សម្គាល់ថា ៖ នៅក្នុងខេត្តគោលដៅចំនួន២ គឺខេត្តកំពង់ធំ និង ខេត្តសៀមរាប រយៈពេល២ឆ្នាំមកនេះ ឃើញថា បន្ទាប់ពីក្រសួងអប់រំបានផ្តល់នូវវិធីសាស្ត្រីថ្មីៗក្នុងការបង្រៀន និងផ្តល់កញ្ចប់សម្ភារៈអំណានថ្នាក់ដំបូង ជាមួយនឹងសមត្ថភាពគ្រូបង្រៀនតាមរយៈនៃការបំប៉នបន្ថែមនោះ ជាលទ្ធផល សិស្សមានការប្រែប្រួលពីការមិនចេះអាន ឈានទៅឈោងចាប់បាននូវសមត្ថភាព ឆាប់ចេះអាន និង មានអត្រាចេះអាន ប្រសើរជាងមុនគួរកត់សម្គាល់ ។
ឯកឧត្តមរដ្ឋមន្ត្រីក្រសួងអប់រំ បានសង្តត់ធ្ងន់ថា ៖ ការធ្វើឲ្យប្រសើរឡើងគុណវុឌ្ឍរបស់គ្រូបង្រៀន ជាពិសេសបច្ចេកទេសបង្រៀន និងរៀន ជាកត្តាអាទិភាព ដែលក្រសួងអប់រំកំពុងយកចិត្តទុកដាក់ ។ គ្រូបង្រៀនដែលបានចេញបម្រើការងារយូរឆ្នាំមកហើយ ចាំបាច់ក្រសួងត្រូវរៀបចំឲ្យមានកម្មវិធីបំប៉នច្បាស់លាស់ មានសម្ភារៈនិងឯកសារបំប៉នប្រកបដោយគុណភាព និង មានគ្រូឧទ្ទេសប្រកបដោយសមត្ថភាពនិងបំណិនខ្ពស់ ។
វគ្គបំប៉នគ្រូថ្នាក់ទី១ ដំណាក់កាលទី៣ ស្តីពីការណែនាំប្រើប្រាស់សាកល្បង កញ្ចប់សម្ភារៈអំណានថ្នាក់ដំបូងនេះ បានធ្វើឡើងនៅសាលាបឋមសិក្សាស្វាយធំ មានរយៈពេល២ថ្ងៃ ក្រោមការចូលរួមពីសំណាក់គ្រូបង្រៀនថ្នាក់ទី១ មកពីស្រុកប្រាសាទបាគង សូទ្រនិគម ជីក្រែង ស្វាយលើ អង្គរធំ បន្ទាយស្រី និង ស្រុកវារិន្ទ ប្រមាណជា ជាង៤០០នាក់ ក្នុងនេះ ចំនួនអ្នកគ្រូមានប្រមាណជាង៣០០នាក់ ។
អត្ថបទ និង រូបភាព៖ លោក ងិន គឹមឡេង
កែសម្រួលអត្ថបទ៖ លោក សេង ផល្លី
