នៅដល់២សប្ដាហ៍ទៀតទេ ព្រឹត្តិការណ៍សៀមរាបសង្ក្រាន្តឆ្នាំ២០១៩ នឹងប្រារព្ធឡើងក្នុងក្រុងសៀមរាប ស្របពេលនឹងពិធីបុណ្យចូលឆ្នាំថ្មីប្រពៃណីជាតិខ្មែរ ដែលបត្រូវនឹងថ្ងៃទី១៤ ដល់ ទី១៦ ខែមេសា ឆ្នាំ២០១៩។
នាព្រឹកថ្ងៃទី០១ ខែមេសា ឆ្នាំ២០១៩ រដ្ឋបាលខេត្តសៀមរាប បានប្រារព្វពិធីក្រុងពាលី ក្នុងបរិវេណសួនព្រះរាជដំណាក់ (ជាប់បរិវេណអាស្រមព្រះនាងចេក ព្រះនាងចម) ក្នុងក្រុងសៀមរាប ដើម្បីបួងសួងសុំសេចក្តីសុខ សម្រាប់ព្រឹត្តិការណ៍សៀមរាបសង្ក្រាន្តទាំងមូល ក្រោមអធិបតីភាព ឯកឧត្តម ទៀ សីហា អភិបាលនៃគណៈអភិបាលខេត្ត ឯកឧត្តម អ៊ឹង ហឿន ប្រធានក្រុមប្រឹក្សាខេត្ត ឯកឧត្តម ប្រាក់ សុភ័ណ ប្រធានស្តីទីសហភាពសហព័ន្ធយុវជនកម្ពុជាខេត្តសៀមរាប រួមនឹងប្រធានមន្ទីរ អង្គភាពពាក់ព័ន្ធជាច្រើនរូប។
លោក ឃឹម ហ្វីណង់ អនុប្រធានសហភាពសហព័ន្ធយុវជនកម្ពុជា ខេត្តសៀមរាប បានឲ្យដឹងថា ព្រឹត្តិការណ៍សៀមរាបសង្ក្រាន្តឆ្នាំថ្មីនេះ មានកម្មវិធីសំខាន់ៗ ដែលគ្រោងនឹងរៀបចំនៅក្នុងព្រឹត្តិការណ៍នេះ រួមមាន ភូមិអាហារនៃក្តីស្រលាញ់ ដែលបាននាំយកអាហារ និងបង្អែមប្រចាំតំបន់នានា ក្នុងខេត្តសៀមរាបមកដាក់បង្ហាញ និង ឲ្យអ្នកចូលរួមបានស្គាល់ និងភ្លក្សរសជាតិ នៃបង្អែមខ្មែរ ។ កម្មវិធី ភូមិខ្ញុំ តោះតោះលេងទឹក ការដាក់តាំងបង្ហាញរូបសំណាកជ្រូកយក្ស ការតាំងបង្ហាញនូវការត្បាញក្រមា ផលិតផលស្នាដៃស្ត្រីខ្មែរ ដែលកើតចេញកម្លាំងប្រាជ្ញារបស់បងប្អូនស្ត្រីខ្មែរ រួមនិងកម្មវិធីសប្បាយៗជាច្រើនទៀត។ លើសពីនោះ ក៏មានការរៀបចំសកម្មភាពផ្សេងៗ ដែលបានធ្វើការដកស្រង់ទៅតាមលំអាន នៃព្រឹត្តិការណ៍អង្គរសង្ក្រាន្ត ដែលមានក្រុមយុវជនបង្ហាញពីសិល្បៈ ការត្រៀមបង្ហាញល្បែងប្រជាប្រិយ សម្រាប់ណែនាំដល់បងប្អូនប្រជាពលរដ្ឋ ដែលបានចូលរួមកម្មវិធីលេងកំសាន្ត ផងដែរ។
អត្ថបទ និង រូបភាព៖ លោក គឿន វេត និង អ៊ិន សីហរិទ្ធ
កែសម្រួលអត្ថបទ៖ លោក សេង ផល្លី
