សាលាឆទាន ១ខ្នង បន្ទប់ទឹក២ និងអណ្តូងទឹក១ ត្រូវបានប្រគល់ជូនប្រជាពលរដ្ឋក្នុងឃុំខ្នារពោធិ៍ ស្រុកសូទ្រនិគម ខេត្តសៀមរាប ប្រើប្រាស់ជាផ្លូវការ ដែលសរុបថវិកា ៣៦,៥៧៣ដុល្លារ (គិតទាំងថ្លៃទិញដី) ដែលជាការឧបត្ថម្ភរបស់ក្រុមការងារថ្នាក់កណ្តាលចុះជួយឃុំខ្នារពោធិ៍។
មានប្រសាសន៍ក្នុងពិធីសម្ពោធនេះ ឯកឧត្តម គុជ ស៊ីនិត អនុប្រធានក្រុមការងារថ្នាក់កណ្តាលចុះជួយឃុំខ្នារពោធិ៍ និងជាប្រធានក្រុមការងារចុះជួយភូមិឈូក មានប្រសាសន៍ថា សមិទ្ឋផលថ្មីទាំងនេះគឺជាសម្បត្តិសាធារណៈ ក្នុងមូលដ្ឋាន ហើយវាត្រូវបានកសាងឡើងតាមបទដ្ឋានប្រពៃណីពុទ្ឋសាសនា និងរចនាបទតាមលំអានសិល្បៈបុរាណខ្មែរ ដោយមានរំលេចនូវគំនូរពុទ្ឋប្រវត្តិចម្លងចេញពីរចនាបទ នៃគំនូរព្រះវិហារចាស់ នៃប្រាសាទបាគង ក្នុងន័យអភិរក្ស ព្រោះគំនូរបុរាណបែបនេះកាន់តែខ្សត់ៗហើយ។ ហើយសលាឆទាននេះដែរ នឹងផ្តល់ប្រយោជន៍ដល់សាធារណៈជនធ្វើដំណើរឆ្លងកាត់អាចឈប់សំចតបណ្តោះអាសន្ន និងសម្រាប់ការជួបជុំប្រារព្ឋពិធីផ្សេងៗ ជាកន្លែងសម្រាប់អ្នកសហគមន៍ក្នុងមូលដ្ឋានជួបជុំពិភាក្សាការងារអភិវឌ្ឍក្នុងមូលដ្ឋាន ជាកន្លែងសម្រាប់យុវជននិងកុមារា កុមារីជួបជុំដើម្បីធ្វើស្វ័យសិក្សា ។ល។
ឯកឧត្តម គុជ ស៊ីនិត បានគូសបញ្ជាក់ថា ក្រោមដឹកនាំដោយសម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រី សម្ដេចខិតខំស្ដារប្រទេសជាតិ តាំងពីបាតដៃទទេ រហូតមានការអភិវឌ្ឍដូចសព្វថ្ងៃ ក្នុងនោះគន្លឺះទ្រទ្រង់កិច្ចអភិវឌ្ឍគឺសន្តិភាព និងស្ថេរភាពនយោបាយ បើសិនគ្មានធាតុចូលទាំងនេះទេ គឺពិតជាគ្មានទេការអភិវឌ្ឍ និងវិនិយោគបរទេស រកស៊ីក្នុងប្រទេសកម្ពុជាឡើយ។
ក្នុងឱកាសនោះដែរ ឯកឧត្តម គុជ ស៊ីនិត បញ្ជាក់ថា ឯកឧត្តមបានជួយស្ដារ ស្រះជំរកត្រីមេពូជក្នុងភូមិឈូក ឃុំខ្នារពោធិ៍នេះ បានប្រមាណ៥០ភាគរយហើយ និងសន្យាថា នឹងពិនិត្យលទ្ឋភាព ដើម្បីជួយកសាងផ្លូវដីក្រហម១ខ្សែប្រវែងជាង៥០០ម ដែលនៅសល់ពាក់កណ្តាលទៀតមិនទាន់ចាក់ដីធ្វើ។
អត្ថបទ និង រូបភាព៖ លោក យូ វង្ស
កែសម្រួលអត្ថបទ៖ លោក សេង ផល្លី
