ថ្ងៃទី៣០ ខែមិនា ឆ្នាំ២០១៩ ប្រជាពលរដ្ឋ ស្ថិតក្នុង ឃុំពាក់ស្នែង ស្រុកអង្គរធំ ខេត្តសៀមរាបប្រមាណ១ពាន់នាក់បានទទួលសេវា ពិនិត្យព្យាបាលមិនគិតថ្លៃ ក្រុមគ្រូពេទ្យស្ម័គ្រចិត្ត នៃមន្ទីរសុខាភិបាលខេត្តសៀមរាប ដឹកនាំដោយប្រធានមន្ទីរសុខាភិបាល រួមសហការជាមួយសហភាពសហព័ន្ធយុវជនកម្ពុជាខេត្តសៀមរាប និងមន្ទីរពេទ្យកុមារអង្គរ។
លោកវេជ្ផបណ្ឌិត ក្រុស សារ៉ាត់ ប្រធានមន្ទីរសុខាភិបាល និងជាប្រធានក្រុមគ្រូពេទ្យស្ម័គ្រចិត្ត ខេត្តសៀមរាប លើកឡើងថា ក្រុមការងារ នឹងចុះពិនិត្យ និងព្យាបាលជំងឺជូនប្រជាពលរដ្ឋគ្រប់ទីកន្លែងទូទាំងខេត្តសៀមរាប ដើម្បីជួយលើកកម្ពស់សុខុមាលភាពប្រជាពលរដ្ឋនៅតាមមូលដ្ឋាន ព្រោះសុខភាពរបស់ ប្រជាពលរដ្ឋម្នាក់ៗ ជាគ្រឹះជាសសរទ្រូង និងជាធាតុចូល ដ៏មានតម្លៃមិនអាចកាត់ថ្លៃបានចំពោះបុគ្គលផ្ទាល់ គ្រួសារ និង សម្រាប់ចូលរួមអភិវឌ្ឍន៍ប្រទេសជាតិ។
លោកវេជ្ជបណ្ឌិត បានបញ្ជាក់ថា គោលបំណងរបស់ក្រុមគ្រូពេទ្យស្ម័គ្រចិត្តនៃមន្ទីរសុខាភិបាលខេត្តសៀមរាប គឺផ្តល់ការព្យាបាលប្រជាពលរដ្ឋគ្រប់ស្រទាប់វណ្ណៈ ដោយមិនគិតថ្លៃ និងមិនប្រកាន់និន្នាការយោបាយ និងសាសនាអ្វីឡើយ។ ការព្យាបាលនេះ គឺជាការចូលរួមចំណែកជាមួយរាជរដ្ឋាភិបាល ក្នុងការបង្ខិតសេវាសុខាភិបាល និងផ្តល់ឱកាសគ្រូពេទ្យដែលមានវិជ្ជាជីវៈពេទ្យ និងកម្លាំងស្ម័គ្រចិត្ត ចូលរួមធ្វើសកម្មភាពសង្គមមួយនេះ។
ព័ត៌មានជាតិ ថ្មីៗ
លោក បានបញ្ជាក់ថា បេសកកម្មរបស់ក្រុមគ្រូពេទ្យស្ម័គ្រចិត្តនៃមន្ទីរសុខាភិបាលខេត្តសៀមរាប នឹងបានចុះព្យាបាលដោយឥតគិតថ្លៃជូនប្រជាពលរដ្ឋ នៅគ្រប់បណ្តាលស្រុកទូទាំងខេត្តសៀមរាប ហើយស្រុកអង្គរធំនេះ គឺជាស្រុកទី១០ហើយ។
បើតាមរបាយការណ៍ របស់មន្ទីរមន្ទីរសុខាភិបាលខេត្តសៀមរាប បានបង្ហាញថា យុទ្ធនាការក្នុងស្រុកអង្គរធំនេះ ចាប់ផ្ដើមពីម៉ោង ៨:០០ព្រឹក ដល់ ម៉ោង ៤:០០រសៀល ចំពោះសេវាពិនិត្យ និងព្យាបាលជំងឺនាពេលនោះ មានចំនួន ០៩ប្រភេទ រួមមាន៖
១- ជំងឺកុមារ ១០០ ករណី
២- រោគស្ត្រី ២៨ ករណី
៣- ជំងឺមនុស្សចាស់ ៣៣៤ករណី
៤- ជំងឺភ្នែក ៨៩ ករណី
៥- ព្យាបាលដោយចលនា ៣៥ករណី
៦- ជម្ងឺមាត់ធ្មេញ ២៣ ករណី
៧- អេកូសាស្ត្រ ៨៩ ករណី
៨- ថតអិចរ៉េ ២៥ករណី
៩- ពិនិត្យឈាម ១២៦ ករណី
អត្ថបទ និង រូបភាព៖ លោក អ៊ិន សីហរិទ្ធ
កែសម្រួលអត្ថបទ៖ លោក សេង ផល្លី
