សាខាកាកបាទក្រហមកម្ពុជា ខេត្តសៀមរាប បានរៀបចំពិធីជួបសំណេះសំណាល ជាមួយសមាជិកយុវជនកាកបាទក្រហមកម្ពុជា ក្រុង/ស្រុក ក្នុងខេត្តសៀមរាប ក្រោមអធិបតី ឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប រួមជាមួយ លោកគ្រូ-អ្នកគ្រូជាទីប្រឹក្សា និងយុវជនកាកបាទក្រហមកម្ពុជា មកពី១៨គ្រឹះស្ថានសិក្សា ក្នុងខេត្តសៀមរាប សរុប៤៩៩នាក់ នៅសាលមហោស្រព អង្គរ ខេត្តសៀមរាប ។
បើតាមរបាយការណ៍អានដោយលោក លោក ស៊ុ សំអន នាយកសាខាកាកបាទក្រហកម្ពុជា ខេត្តសៀមរាប បានឲ្យដឹងថា ក្នុងដើមឆ្នាំ២០១៩នេះ យុវជនសាខាកាកបាទក្រហមកម្ពុជា ខេត្តសៀមរាប មាននៅ ២៤សាលាគោលដៅ ក្នុងនោះមាន វិទ្យាល័យចំនួន១៨ និង អនុវិទ្យាល័យចំនួន៦ សរុប៧៣០នាក់ ក្នុងនោះស្រី៣៨៥នាក់។ ទន្ទឹមនឹងនោះ សាខាកាកបាទក្រហកម្ពុជា ខេត្តសៀមរាប ក៏មានលោកគ្រូ អ្នកគ្រូ ជាទីប្រឹក្សាយុវជនសរុប ៣៨នាក់ ក្នុងនោះស្រី១៨នាក់។
មានប្រសាសន៍សំណេះសំណាលនាឱកាសនោះ ឯកឧត្តម ទៀ សីហា មានប្រសាសន៍ថា តាមរយៈពិធីនេះ ថ្នាក់ដឹកនាំ នៃ កាកបាទក្រហកម្ពុជា ជាពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាប្រធានក្រុមការងារយុវជនកាកបាទក្រហមកម្ពុជា បានផ្ញើជូននូវសេចក្ដីស្រឡាញ់ នឹករលឹកជូនដល់ ប្រជាពលរដ្ឋ និង សមាជិកកាកបាទក្រហមកម្ពុជា ក្រុង/ស្រុក ទាំងអស់ ក្នុងខេត្តសៀមរាប។
ព័ត៌មានជាតិ ថ្មីៗ
ឯកឧត្តមបន្តថា បច្ចុប្បន្នកាកបាទក្រហមកម្ពុជា ដែលមានសម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គល ជាព្រះប្រធានកិត្តិយស និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន គឺជាស្ថាប័នមនុស្សធម៌ធំជាងគេក្នុងប្រទេស ដែលធ្វើប្រតិបត្តិការមនុស្សធម៌ ជួយសម្រាលទុក្ខលំបាកប្រជាពលរដ្ឋរងគ្រោះ និងងាយរងគ្រោះ ដោយមិនប្រកាន់និន្នាការនយោបាយ ពណ៌សំបុរ និងសាសនាឡើយ ក្នុងនោះសមាគមជាតិមួយនេះ ក៏ជាជំនួយការអាជ្ញាធរសាធារណៈក្នុងវិស័យមនុស្សធម៌ ដែលស្របតាមបាវចនាជាសកលរបស់ចលនាអន្តរជាតិកាកបាទក្រហម អឌ្ឍចន្ទក្រហម គឺ៖ “សង្គ្រោះជីវិត ផ្លាស់ប្តូរផ្នត់គំនិត” ហើយសកម្មភាពមនុស្សធម៌ទាំងអស់នេះ មិនអាចកាត់ផ្ដាច់បានពីការចូលរួមរបស់យុវជនកាកបាទក្រហមកម្ពុជា ដែលជាឆ្អឹងខ្នងរបស់សមាគមជាតិនេះបានឡើយ ព្រោះថា យុវជន ជាភ្នាក់ងារនៃការផ្លាស់ប្ដូរឥរិយាបថ ៕
បើតាមរបាយការណ៍ដដែលនេះ បានបញ្ជាក់ថា បើគិតចាប់ពីឆ្នាំ២០០៩មក សាខាកាកបាទក្រហមកម្ពុជាខេត្តសៀមរាប បានបំពាក់កន្សែង ជូនដល់យុវជនកាកបាទក្រហមកម្ពុជា ចំនួន ២៨លើក យុវសិស្សចំនួន ៣,៤៥៧នាក់
នៅក្នុងសកម្មភាពមនុស្សធម៌ យុវជនកាកបាទក្រហមកម្ពុជាទាំងអស់ក្នុងខេត្តសៀមរាប សុទ្ធតែបានចូលរួមយ៉ាង សកម្ម នៅក្នុងសាលារបស់ខ្លួន ក៏ដូចជាសកម្មភាពមនុស្សធម៌ក្នុងសង្គមផងដែរ។
អត្ថបទ និង រូបភាព៖ លោក ទ្រា ពន្លឺ
កែសម្រួលអត្ថបទ៖ លោក សេង ផល្លី
