មានប្រសាសន៍ ក្នុងពិធី បិទវគ្គបណ្តុះបណ្តាល ស្តីពី ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១៩ នាពេលថ្មីៗនេះ លោក នឹម វ៉ាន់សំ ប្រធានលេខាធិការដ្ឋាន រៀបចំការបោះឆ្នោតខេត្តសៀមរាប បានអំពាវនាវ ដល់ប្រជាពលរដ្ឋខ្មែរទាំងពីរភេទ ដែលមានអាយុចាប់ពី១៨ឆ្នាំឡើងទៅចុះឈ្មោះបោះឆ្នោត និងទៅពិនិត្យបញ្ជីឈ្មោះនៅតាមសាលាឃុំ-សង្កាត់របស់ខ្លួន ឬតាមគេហទំព័ររបស់ គណៈកម្មាធិការរៀបចំការបោះឆ្នោត ដែលមានអាស័យដ្ឋាន www.voterlist.org.kh ឲ្យបានគ្រប់ៗគ្នា ។
លោក នឹម វ៉ាន់សំ បានបន្តថា ការចុះឈ្មោះបោះឆ្នោត គឺមានសារៈសំខាន់ណាស់សម្រាប់ប្រជាពលរដ្ឋកម្ពុជាទាំងពីរភេទ ដែលមានចែងក្នុងរដ្ឋធម្មនុញ្ញដែលជាច្បាប់កំពូលរបស់ប្រទេស និង ដើម្បីមានឈ្មោះបោះឆ្នោតជ្រើសរើសអ្នកដឹកនាំរបស់ខ្លួនផងដែរ ។
លោកប្រធានលេខាធិការដ្ឋាន រៀបចំការបោះឆ្នោតខេត្តសៀមរាប បានបន្ថែមថា ដើម្បីចុះឈ្មោះបាន ពលរដ្ឋទាំងពីរភេទ ត្រូវទៅបង្ហាញខ្លួន នៅការិយាល័យចុះឈ្មោះបោះឆ្នោត ដែលមានទីតាំងនៅតាមសាលាឃុំ-សង្កាត់ ឬនៅតាមភូមិមួយចំនួនក្នុងឃុំ-សង្កាត់ ដែលខ្លួនត្រូវចុះឈ្មោះបោះឆ្នោត ត្រូវមានសញ្ចាតិខ្មែរ និងត្រូវមានអាយុចាប់ពី១៨ឆ្នាំឡើងទៅគិតត្រឹមថ្ងៃទី ៣១ ខែ កក្កដា ឆ្នាំ២០១៩ ហើយត្រូវមានលំនៅដ្ឋាន ឬទីសំណាក់នៅក្នុងឃុំ-សង្កាត់ ដែលសាមីខ្លួនត្រូវចុះឈ្មោះ ។
ចំពោះការពិនិត្យឈ្មោះ និងចុះឈ្មោះបោះឆ្នោត នឹងធ្វើនៅតាមសាលាឃុំ-សង្កាត់ ឬតាមភូមិមួយចំនួនក្នុងឃុំសង្កាត់ ចាប់ពីថ្ងៃទី ០១ ដល់ថ្ងៃទី ២២ ខែឧសភា ឆ្នាំ២០១៩ខាងមុខនេះ៕
អត្ថបទ៖ លោក បុង ឆវ័ន
រូបភាព៖ លោក ធន់ ពូថេ
