ដោយមានការទ្រុឌទ្រោមខ្លាំងដែលអាចប្រឈមនឹងការបាក់ស្រុត ជាហេតុនាំគ្រោះហានិភ័យដល់ព្រះសង្ឃនិងប្រជាពុទ្ឋបរិស័ទ ព្រះវិហារវត្តអារញ្ញាសាគរ ស្ថិតក្នុងសង្កាត់សៀមរាប ក្រុងសៀមរាប ខេត្តសៀមរាប ចៅអធិការនិងគណៈកម្មការវត្តបានព្រមព្រៀងជាឯកច្ឆ័ន្ទ រៀបចំស្នើច្បាប់និងជួសជុលឡើងវិញ ដោយរក្សានូវរចនាបទដើមទាំងស្រុង ចំណាយពេលជួសជុលអស់រយៈពេលពីរឆ្នាំ ចំណាយថវិកាអស់១៦ម៉ឺនដុល្លារសហរដ្ឋអាមេរិក ដែលថវិកាចំណាយទាំងអស់នេះ បានមកពីការចូលរួមបរិច្ចាកដោយទឹកចិត្តសប្បុរសធម៌ របស់ថ្នាក់ដឹកនាំក្នុងជួររាជរដ្ឋាភិបាល ក្រុមហ៊ុនឯកជន អាជ្ញាធរខេត្តក្រុងសង្កាត់និងប្រជាពុទ្ឋបរិស័ទជិឆ្ងាយទាំងក្នុងនិងក្រៅប្រទេសផងដែរ។
ក្រោយពីដំណើរការរៀបចំជួសជុលកែលម្អ រួចរាល់ជាស្ថាពរ អារាមនេះត្រូវបានកាត់ខ្សែបូរ សម្ពោធឆ្លងដាក់ឱ្យប្រើប្រាស់ នៅថ្ងៃទី២៩ ខែមីនា ឆ្នាំ២០១៩ក្រោមព្រះរាជអធិបតីព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជា និងអធិបតីភាព ឯកឧត្តម អ្នកឧកញ៉ា សៀង ណាំ សមាជិកសភា និងជាតំណាងរាស្ត្រមណ្ឌលសៀមរាប លោកជំទាវឧកញ៉ា សៀង ចាន់ហេង អគ្គនាយិកាក្រុមហ៊ុន ហេងអភិវឌ្ឍន៍និងព្រះវត្តមានព្រះមេគណខេត្ត ព្រះសុមង្គលសិលាចារ្យ អាភាករោ ជុំ គឹមឡេង និងព្រះវត្តមាន មន្ត្រីសង្ឃមួយចំនួន ព្រមទាំងវត្តមាន អាជ្ញាធរមូលដ្ឋាន ប្រជាពុទ្ឋបរិស័ទយ៉ាងច្រើនកុះករ។
លោកជំទាវឧកញ៉ា សៀង ចាន់ហេង ក្នុងនាមសាសនូបត្ថម្ភមានប្រសាសន៍ថា៖ ក្រុមហ៊ុនហេងអភិវឌ្ឍន៍ជានិច្ចកាលតែងតែជួយជ្រោមជ្រែងឧបត្ថម្ភគាំទ្រលើវិស័យព្រះពុទ្ឋសាសនានៅទូទាំងប្រទេសកម្ពុជា។ទឹកចិត្តសប្បុរសនេះ គឺផ្តើមចេញពីទឹកចិត្តជ្រះថ្លាស្រឡាញ់និងជឿជាក់លើគុណព្រះពុទ្ឋព្រះធម៌ព្រះសង្ឃក៍ដូចជាចូលរួមថែរក្សាព្រះពុទ្ឋសាសនា ប្រពៃណីវប្បធម៌ទំនៀមទំលាប់របស់បុព្វបុរសដូនតាខ្មែរដែលមានតាំងពីយូរលង់ណាស់មកហើយៗបានបន្សល់កេរដំណែលលស្នាដៃជាច្រើនទុកឱ្យខ្មែរជំនាន់ក្រោយជាអ្នកថែរក្សាបន្ត ឱ្យស្ថិតស្ថេររីកចម្រើនរុងរឿង។
ឯកឧត្តម អ្នកឧកញ៉ា សៀងណាំ បានមានប្រសាសន៍ថា៖នៅកម្ពុជាវិស័យពុទ្ឋចក្រនិងវិស័យអាណាចក្របានដើរទន្ទឹមគ្នាពុំអាចខ្វះមួយណាបានឡើយ ក្នុងការចូលរួមជួយស្តារនិងអភិវឌ្ឍន័សង្គមជាតិឱ្យបានរីកចំរើន។ ឯកឧត្តមឧកញ៉ា សៀង ណាំក៏បានរំលឹកឡើងដែរក្នុងសម័យកាលដែលប្រទេសកម្ពុជា ធ្លាក់ចូលទៅក្នុងរបប្រល័យពូជជសាសន៏ ៣ឆ្នាំ៨ខែ២០ថ្ងៃ បណ្តាឱ្យហេដ្ឋារចនាសម្ព័ន្ធសង្គមជាតិ វត្តអារាមសាលារៀន ទ្រព្យសម្បត្តិសាធារណៈរបស់រដ្ឋ ត្រូវទទួលរងនូវការបំផ្លិចបំផ្លាញស្ទើរតែសូន្យ សូម្បីតែព្រះសង្ឃ វត្តអារាម និងសាសនាផ្សេងៗទៀត ក៏ត្រូវទទួលរងនូវការកាប់សំលាប់ និងបំផ្លិចបំផ្លាញស្ទើរតែផុតពូជដែរ។ អាស្រ័យដោយមានជ័យជំនៈ ៧ មករា ឆ្នាំ១៩៧៩ ប្រជាជនកម្ពុជាបានរំដោះរួចផុតពីគ្រោះប្រល័យពូជសាសន៏ និងទទួលបានសិទ្ធិសេរីភាព រួមគ្នាកសាងសង្គមជាតិឡើងវិញរហូតមានការរីកចំរើនជាលំដាប់ទាំងពុទ្ធចក្រ និងអាណាចក្រដូចឃើញជាក់ស្តែងក្នុងបច្ចុប្បន្ន។
ឯកឧត្តមបានបញ្ជាក់ថា៖ទីវត្តអារាមដែលមានការរីកចំរើនគឺជាកត្តាឆ្លុះបង្ហាញឲ្យឃើញអំពីជីវភាពប្រសើរឡើងនៃប្រជាពុទ្ធបរិស័ទនៅក្នុងតំបន់ចំណុះជើងវត្តជាមួយនឹងទេព្យកោសល្យដឹកនាំនៃព្រះគ្រូចៅអធិការវត្តព្រមទាំងការផ្តល់ជំនឿទុកចិត្តពីសំណាក់ក់ព្រះសង្ឃ ផងដែរ ក្រោមគោលការណ៍ជាមូលដ្ឋាន ព្រះពុទ្ធសាសនា ផ្សារភ្ជាប់ នឹងសង្គម ហើយសមិទ្ឋិផលទាំងនេះកើតឡើងដោយសារប្រទេសជាតិយើងមានសន្តិភាពគ្រប់គ្រាន់ក្រោមការដឹកនាំរបស់សម្តេចអគ្គមហាសេនាបតីតេជោហ៊ុនសែននាយករដ្ឋមន្ត្រី នាំឱ្យប្រទេសជាតិយើងមានសុខសន្តិភាពស្ថេរភាពនិងភាពរីកចំរើនសម្បូរសប្បាយ។
ព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជា បានមានព្រះរាជឱង្កា កោតសរសើរចំពោះព្រះចៅអធិការ ព្រះសង្ឃ គណៈកម្មការ អាចារ្យវត្ត អាជ្ញាធរដែនដី បងប្អូនប្រជាពលរដ្ឋ និងពុទ្ធបរិស័ទគ្រប់មជ្ឈដ្ឋានដែលបានសាមគ្គី ចូលរួមចំណែកជាកម្លាំងកាយ កម្លាំងចិត្ត និងទ្រព្យធនធ្វើឲ្យការជួសជុលព្រះវិហាររួមជាមួយនឹងសមិទ្ឋផលមួយចំនួននៅទីនេះបានសម្រេចរួចរាល់ជាស្ថាពរ។
សម្តេចព្រះមហាសង្ឃរាជ មានថេរដីកាថា៖ សមិទ្ធិផលថ្មីនេះ ជាផ្នែកមួយដ៏សំខាន់រួមចំណែកក្នុងការរីកចំរើននៃវិស័យពុទ្ធចក្រ ដែលត្រូវបានកំណត់ដោយរដ្ឋធម្មនុញ្ញនៃព្រះរាជាណាចក្រកម្ពុជាយើងព្រះពុទ្ឋសាសនាជាសាសនារបស់រដ្ឋ។ព្រះអង្គថែមទាំងជម្រុញដល់មាតាបិតាអាណាព្យាបាលគ្រប់រូបត្រូវអប់រំបុត្រធីតាប្រុសស្រីកុំឱ្យសេពសុរានិងចៀសវាងនូវគ្រឿងញៀនគ្រប់ប្រភេទ ផ្តល់ដំបូន្មានដល់យុវវ័យជំនាន់ក្រោយត្រូវចេះគោរពឱនលំទោនដល់ចាស់ព្រឹទ្ឋាចារ្យ គ្រូបាធ្យាយនិងអ្នកមានគុណមាតាបិតាជីដូនជីតាផងទាំងឡាយនិងចេះប្រព្រឹត្តកាតព្វកិច្ចនិងពង្រីកចំណេះដឹងឱ្យក្លាយទៅជាបញ្ញាវន្តពិតប្រាកដនៅក្នុងសង្គមកម្ពុជា ដើម្បីថែរក្សាការពារ សេចក្តីសុខសាន្ត របស់សង្គមជាតិ ដោយប្រកាន់យកមាគ៌ាព្រះពុទ្ធ ជាប្រទីបបំភ្លឺផ្លូវ ក្នុងការអប់រំសីលធម៌ ចរិយាធម៌ សេចក្តីថ្នៃថ្នូរ សមនឹងទស្សនៈដែលថា ព្រះពុទ្ធសាសនាជាកម្លាំងដឹកនាំចរិយាធម៌ ក្នុងការលុបបំបាត់អំពើហិង្សាសង្គម។
អត្តបទនិងរូបភាព៖លោក យូ វង្ស
