នៅព្រឹកថ្ងៃទី២០ ខែមករា ឆ្នាំ២០២៣នេះ សមាគមន៍វិទ្យុ និងទូរស្សន៍កម្ពុជា បើកកិច្ចប្រជុំស្តីពីការស្នើសុំសហការផ្សព្វផ្សាយកីឡាស៊ីហ្គេម អាស៊ានប៉ារ៉ាហ្គេមលើកទី៣២ ក្នុងនាមកម្ពុជាជាម្ចាស់ផ្ទះ និងព្រឹត្តិការណ៍អង្គរសង្រ្កាន្តឆ្នាំ២០២៣ ដោយកិច្ចប្រជុំនេះធ្វើឡើងតាមប្រព័ន្ធវីដេអូ Zoom នៅទីស្តីការក្រសួងព័ត៌មាន រាជធានីភ្នំពេញ ក្រោមអធិបតីភាពឯកឧត្តម កឹម គុណវឌ្ឍន៍ រដ្ឋលេខាធិការក្រសួងព័ត៍មាន និង ឯកឧត្តម សុខ សប្បាយណា អនុប្រធានសហភាពសហព័នយុវជនកម្ពុជា និងជាប្រធានក្រុមប្រតិបត្តិព្រឹត្តិការណ៍អង្គរសង្ក្រាន្ត ព្រមទាំងវត្តមានឯកឧត្តម លោកជំទាវ លោកលោកស្រីតំណាងអង្គភាពសារព័ត៍មានជាច្រើននាក់ទៀត។
ឯកឧត្តម សុខ សប្បាយណា មានប្រសាសន៍ថា នៅឆ្នាំ២០២៣នេះ ស.ស.យ.ក.បានគ្រោងនឹងរៀបចំព្រឹត្តិការណ៍អង្គរសង្ក្រាន្ត ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ក៏ដូចជាប្រាព្ធខួបទី១០ របស់អង្គរសង្ក្រាន្ត ក្រោមប្រធានបទ “ក្តីស្រមៃ និងក្តីសង្ឃឹម” ដែលនឹងនាំយកនូវសម្បត្តិវប្បធម៌ ទំនៀមទំលាប់ និងស្នាដៃរបស់បុព្វបុរសខ្មែរមកសម្តែងនៅទឹកដីដ៏ពិសិដ្ឋនៃតំបន់ឧទ្យានអង្គរ។ ទន្ទឹមនឹងនោះ អង្គរសង្រ្កាន្ត ២០២៣ ក៏គ្រោងនឹងនាំយកកម្មវិធីរំលឹកអនុស្សាវរីយ៍សំខាន់ៗជាច្រើន រំលេចឡើងនូវខួប ១០ឆ្នាំរបស់ខ្លួនផងដែរ។ ដើម្បីចូលរួមផ្តល់កិច្ចសហការ និងសម្របសម្រួលអោយព្រឹត្តិការណ៍អង្គរសង្រ្កាន្តនេះ បានប្រព្រឹត្តទៅដោយជោគជ័យ។ ព្រឹត្តិការណ៍នេះនឹងផ្តល់ជាឱកាសចូលរួមដ៏អធិកអធម និងសប្បាយរីករាយ សម្រាប់ប្រជាពលរដ្ឋក្នុងខេត្តក្រៅខេត្ត នឹងជួយទាក់ទាញភ្ញៀវទេសចរណ៍ទាំងជាតិ និងអន្តរជាតិឲ្យកាន់តែច្រើនថែមទៀត។ ឯកឧត្តម បានបញ្ជាក់ថា អង្គរសង្ក្រាន្តជានិមិត្តរូបដែលជំរុញឱ្យមានការរៀបចំសង្ក្រាន្ដតាមបណ្តារាជធានី/ខេត្ត ស្រុក/ខណ្ឌ ឃុំ/ សង្កាត់ វត្តអារាម សាលារៀន ព្រមទាំងនៅក្រៅប្រទេស ដូចជាសាធារណរដ្ឋប្រជាមានិតចិន សាធារណរដ្ឋកូរ៉េ និងជប៉ុនជាដើម។
នៅក្នុងកិច្ចប្រជុំនោះដែរ ឯកឧត្តម សុខ សប្បាយណា ក៏បានស្នើសុំបង្កើតក្រុមការងារបច្ចេកទេស និងចាត់តាំងជនបង្គោលពីក្រសួង ដើម្បីសហការ និងសម្របសម្រួលការងារជាមួយក្រុមការងាររៀបចំព្រឹត្តិការណ៍អង្គរសង្រ្គាន្ត។ ស្នើសុំជំរុញឱ្យស្ថាប័នផ្សព្វផ្សាយក្នុងស្រុក និងមន្ទីរព័ត៌មានខេត្តក្រុងនានា ចូលរួមផ្សព្វផ្សាយអំពីព្រឹត្តិការណ៍ទាំងមុន និងអំឡុងពេលព្រឹត្តិការណ៍ ស្នើសុំកិច្ចសហការពីមន្ទីរព័ត៌មាននត្តសៀមរាបក្នុងការសម្របសម្រួលរៀបចំ និងផ្តល់ទីតាំងសម្រាប់កិច្ចជំនួបរវាងអ្នកសារព័ត៌មាន និងក្រុមការងារៀបចំព្រឹត្តិការណ៍ ដើម្បីត្រៀមសម្រាប់ការផ្សព្វផ្សាយអំពីព្រឹត្តិការណ៍។ ស្នើសុំកិច្ចសហការសម្របសម្រួលលើការចុះឈ្មោះអ្នកសារព័ត៌មានជាតិ និងអន្តរជាតិ ដើម្បីចូលរួមយកព័ត៌មានអំឡុងពេលព្រឹត្តិការណ៍។ ស្នើសុំអ្នកបច្ចេកទេសដើម្បីរៀបចំប្រព័ន្ធផ្សព្វផ្សាយនៅក្នុងបរិវេណទីតាំងកម្មវិធី។ ស្នើសុំជួយសម្របសម្រួលជាមួយស្ថាប័នសារព័ត៌មានក្នុងស្រុកនៅក្រោមឱវាទរបស់ក្រសួង ក្នុងការចូលរួមរៀបចំ និងជួយផ្សព្វផ្សាយឱ្យបានទូលំទូលាយពីព្រឹត្តិការណ៍អង្គរសង្រ្កាន្តរួមមាន៖ សមាគមទូរទស្សន៍កម្ពុជា ទស្សនាវដ្ដី ការសែត រួមជាមួយនឹងការស្នើសុំផ្សព្វផ្សាយស្អតវីដេអូ បទសម្ភាន៍ កម្រងវិដេអូឯកសារ និងអក្សរត់តាមអេក្រង់ តាមរយៈស្ថានីយ៍ទូរទស្សន៍កម្ពុជា និងវិទ្យុកម្ពុជាពីព្រឹត្តិការណ៍ចំនួន ១២ដងក្នុងមួយថ្ងៃចាប់ពីថ្ងៃទី ១២ ខែមីនា ដល់ថ្ងៃទី១៦ ខែមេសា ឆ្នាំ២០២៣។ នឹងអញ្ជើញអ្នកសារព័ត៍មានចូលរួមយកព័ត៌មាន ធ្វើបទយកការណ៍ បទសម្ភាសន៍ និងផ្សព្វផ្សាយឱ្យបានទូលំទូលាយផងដែរ៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ស៊ាន សុផាត
