ភ្ញៀវទេសចរជាតិ និងអន្ដរជាតិ ដែលបន្ដជ្រើសរើសប្រាង្គប្រាសាទនានា ក្នុងរមណីយដ្ឋានអង្គរ និងរមណីយដ្ឋានផ្សេងៗ នៅខេត្ដសៀមរាប ដែលជាកន្លែងដើរកំសាន្ដថ្ងៃពិធីបុណ្យចូលឆ្នាំថ្មីប្រពៃចិន និងវៀតណាម ក្នុងរយ:ពេល២ថ្ងៃមានចំនួនជាង៧ម៉ឺននាក់។
យោងតាមរបាយការណ៍របស់មន្ទីរទេសចរណ៍ខេត្ដសៀមរាប បានបង្ហាញថា ប្រជាពលរដ្ឋ និងភ្ញៀវទេសចរណ៍អន្តរជាតិ ដើរកម្សាន្តតាមរមណីយដ្ឋាននានា ក្នុងខេត្តនេះ គិតចាប់ពីថ្ងៃទី ២១-២២ ខែមករា ឆ្នាំ២០២៣ មានចំនួនប្រមាណ ៧២,៩១៥នាក់ ក្នុងនោះ ទេសចរជាតិ និងបងប្អូនប្រជាពលរដ្ឋ ក្នុងខេត្ត មានចំនួនប្រមាណ ៦៤,០០០នាក់ ដែលធ្វើដំណើរកម្សាន្តជាលក្ខណ:គ្រួសារទៅកាន់រមណីយដ្ឋាននានា ក្នុងនោះ រមណីដ្ឋានអង្គរ មានចំនួនប្រមាណ ៤២,៥០០នាក់, រមណីយដ្ឋានឧទ្យានជាតិភ្នំគូលែន មានចំនួប្រមាណ ៥,៦០០នាក់។ តំបន់ទន្លេសាប មានចំនួនប្រមាណ ២,៥០០នាក់។ សហគមន៍ទេសចរណ៍-អេកូទេសចរណ៍ និងតំបន់ផ្សេងៗទៀត មានចំនួនប្រមាណ ១៣,៤០០នាក់។ ជាមួយនោះ មានភ្ញៀវទេសចរបរទេសផ្ទៃក្នុង មានចំនួន ៨,៩១៥នាក់ផងដែរ។
អ្នកទេសចរ មកកំសាន្ដនៅប្រាសាទអង្គរ បានលើកឡើងថា ក្នុងរមណីយដ្ឋានអង្គរ ជាកន្លែងដើរកំសាន្ដមុនគេ នៅពេលទៅដល់ខេត្ដសៀមរាប មិនថាថ្ងៃពិធីបុណ្យចូលឆ្នាំថ្មីប្រពៃចិន និងវៀតណាម ឬចូលឆ្នាំខ្មែរនោះទេ ព្រោះពួកគាត់ចង់ឃើញ ចង់ដឹងពីការកសាងអង្គរនៃបុព្វបុរស់ខ្មែរ ខណ:ដែលប្រជាពលរដ្ឋមួយចំនួននៅតាមបណ្ដាខេត្ដឆ្ងាយៗ មិនទាន់ស្គាល់ប្រាសាទអង្គរនៅឡើយទេនោះ។ ពួកគាត់បានបន្ដថា ការបានទៅទស្សនាប្រាសាទអង្គរ ដែលជាំកេរតំណែលវប្បធម៌ប្រវត្ដិសាស្ដ្រដ៏អស្ចារ្យ គឺមិនអាចរលងបានឡើយ មានប្រាសាទចំនួនបីដែលអ្នកទេសចរណ៍ភាគច្រើនទៅកំសាន្ត រួមមានប្រាសាទអង្គវត្ដ ប្រាសាទបាយ័ន និងប្រាសាទតាព្រហ្ម។ ពួកគាត់បានសម្ដែងមោទកភាព ដែលបានទៅកំសាន្ដ នៅខេត្ដសៀមរាប ហើយបានលើកឡើងថា ប្រាសាទអង្គរ មានសោភណ្ឌភាពស្រស់ស្អាតទាំងបរិស្ថាន អនាម័យ ជាពិសេសប្រាង្គប្រាសាទបុរាណ។
ដោយឡែករបាយការណ៍របស់នាយកដ្ឋានទេសចរណ៍ និងវប្បធម៌របស់អាជ្ញាធរជាតិអប្សរា បង្ហាញថា ក្នុងរយ:ពេល ២ថ្ងៃមកនេះ មានចំនួនជាង ២ម៉ឺនាក់ ទៅមកទស្សនាក្នុងតំបន់អង្គរ ថ្ងៃសែនចិន ទី២១ ខែមករា ឆ្នាំ២០២៣ នៅតាមប្រាសាទនីមួយៗ មានចំនួន ៦,៤០២នាក់ ខណ:ដែលភ្ញៀវបរទេស ទិញសំបុត្រចូលតំបន់អង្គរ មាន ២,៨៧២នាក់។ នៅថ្ងៃចូលឆ្នាំចិនទី២២ ខែមករា ឆ្នាំ២០២៣ ភ្ញៀវខ្មែរ ចូលតាមប្រាសាទនីមួយៗសរុបមានចំនួន ១៩,៣៣៦នាក់ និងភ្ញៀវបរទេស ទិញសំបុត្រចូលតំបន់អង្គរ មាន ៣,៦២០នាក់ ដែលសរុបទាំង ២ថ្ងៃ មាន ២២,៩៥៦នាក់៕
អត្ថបទ និងរូបភាព: លោកបូ សាវី និងលោកជា ស្រស់ កែសម្រួលដោយ លីវ សុខុន!!!
