អគារសិក្សាមួយខ្នង មាន៤បន្ទប់ ដែលជាអំណោយរបស់អង្គការអើសទ្រី នៃសប្បុរសជនប្រទេសជប៉ុន ផ្ដល់ជូនដល់វិទ្យាល័យរើស ស្រុកពួក ខេត្តសៀមរាប ត្រូវបានសម្ភោធដាក់ឱ្យប្រើប្រាស់ជាផ្លូវការ នៅព្រឹកថ្ងៃទី២៣ ខែមករា ឆ្នាំ២០២៣នេះ ដើម្បីជាការចូលរួមចំណែកក្នុងការអភិវឌ្ឍវិស័យអប់រំកម្ពុជា ក៏ដូចជាកសាងធនធានមនុស្សក្នុងសហគមន៍ឱ្យកាន់តែរីកចំរើនថែមទៀត។
លោក មាន ល្វៃ នាយកវិទ្យាល័យរើល មានប្រសាសន៍ថា ជារៀងរាល់ឆ្នាំសិស្សានុសិស្សនៅវិទ្យាល័យនេះ មានការកើនឡើងជាបន្ដបន្ទាប់ ដែលធ្វើឱ្យខ្វះបន្ទប់សិក្សា ទើបអង្គការមនុស្សធម៌នៃប្រទេសជប៉ុន បានផ្ដល់អគារសិក្សា ១ខ្នង មានបន្ទប់ ដើម្បីឱ្យពួកគាត់បន្ដការសិក្សាបញ្ចប់ថ្នាក់ទី១២ នៅមូលដ្ឋាន។ ជាមួយគ្នានោះការផ្ដល់អគារសិក្សានេះ ក៏ជាការចូលរួមអភិវឌ្ឍន៍ធនធានមនុស្សនៅក្នុងសហគមន៍ ជាពិសេសបានបង្ហាញពីមិត្ដភាពរវាងប្រទេសទាំងពីរ កម្ពុជា-ជប៉ុន កាន់តែជិតស្និត។ ជាមួយគ្នានោះលោក ក៏បាននជម្រុញឱ្យសិស្សានុសិស្សខិតខំសិក្សាឱ្យមានប្រសិទ្ធិភាព ដើម្បីចូលរួមអភិវឌ្ឍន៍ឱ្យកាន់តែរីកចំរើនបន្ថែមទៀតនៅក្នុងសហគម៍។
ជាមួយគ្នានោះលោក ខាតូ ដាយឆិ (Kato Daichi) តំណាងអង្គការអើសទ្រី នៃសប្បុរសជនប្រទេសជនប៉ុន បានឲ្យដឹងថា ដោយសារស្រលាញ់ប្រជាជនកម្ពុជា ជាពិសេសមើលឃើញសិស្សានុសិស្សកំពុងខ្វះអគារសិក្សា ទើបពួកគាត់ខិតខំស្វែងរកជំនួយពីសប្បរស់ជនពីប្រទេសរបស់ខ្លួនកសាងអគារសិក្សានេះឡើង ដើម្បីងាយស្រួលសិក្សារៀនសូត្រនៅជិតផ្ទះ។ ក្នុងនោះដែរក្រុមការងារនឹងបន្ដខិតខំស្វែងរកនូវមូលនិធិពីសប្បុរសជនបន្ថែមទៀត ដើម្បីចូលរួមអភិវឌ្ឍន៍វិស័យអប់រំឱ្យកាន់តែរីកចំរើននៅកម្ពុជា ព្រោះប្រជាជនជប៉ុន និងប្រជាជនកម្ពុជា ជាមិត្ដភាពជាអមតៈ។
បើតាមលោក កែ វណ្ណនី ប្រធានការិយាល័យអប់រំយុវជន និងកីឡា ស្រុកពួក មានប្រសាសន៍ថា ការផ្ដល់អគារសិក្សាពីសប្បុរសជនប្រទេសជប៉ុននេះ បានបង្ហាញពីចំណងមិត្ដភាពរវាងប្រទេសពីរកាន់តែប្រសើរថែមទៀត ជាពិសេសញ្ជាក់ពីការយកចិត្តទុកដល់កូនចៅប្រជាពលរដ្ឋខ្មែរនៅក្នុងតំបន់នេះ ឲ្យចាកផុតពីគ្រោះមិនចេះអក្សរ ហើយអគារសិក្សាមួយខ្នងនេះ ពិតជាមានសារៈសំខាន់ក្នុងកសាងធនធានមនុស្ស។ លោកថា ប្រជាពលរដ្ឋប្រទសជប៉ុន តាមរយៈអង្គការមនុស្សធម៌ បានជួយសាងសង់សមិទ្ធផលច្រើនលើវិស័យអប់រំនៅក្នុងស្រុកពួក ដូចជា៖ សាងសង់អគារសិក្សានៅត្រពាំងធំ នៅសាលាត្រពាំងឬស្សី នៅសាលាសសរស្តម្ភ នៅសាលារៀនពោធិទ្រាយ និងនៅឃុំព្រៃជ្រូកផងដែរ។
លោក កែ វណ្ណនី សង្ឃឹមថា លទ្ធផលសិក្សាឆ្នាំនេះ ពិសេសលទ្ធផលប្រឡងសញ្ញាបត្រមធ្យមសិក្សាទុតិយភូមិ នឹងបានល្អប្រសើរ ហើយអាចឈានដល់បាននិទ្ទេស A ទៀតផង។ ក្នុងនោះលោកក៏បានណែនាំឱ្យសិស្សានុសិស្ស ត្រូវជួយថែរក្សាការពារអាគារសិក្សា និងសម្ភារៈនៅក្នុងសាលាដែលបានដាក់ឲ្យប្រើប្រាស់នៅពេលនេះឲ្យបានល្អ ដើម្បីប្រើប្រាស់បានយូរអង្វែងបន្តដល់ប្អូនៗជំនាន់ក្រោយ។ ជាពិសេសត្រូវខិតខំគោរពនូវច្បាប់វិន័យ ក្រមសីលធម៌ នៅក្នុងសាលា កូនល្អក្នុងគ្រួសារ និងជាពលរដ្ឋល្អក្នុងសង្គម ព្រោះយុវជនជាទំពាំងស្នងប្ញស្សីរបស់ប្រទេសជាតិ។ ជាមួយនោះលោកក៏បានស្នើរឱ្យប្រធានមូលនិធិជប៉ុន និងប្រធានសហគមន៍ជប៉ុន សូមបន្តជួយដល់វិស័យអប់រំនៅក្នុងស្រុកពួក បន្តទៀត ខណៈដែលសាលាជាច្រើនទៀតនៅខ្វះអគារសិក្សានៅឡើយ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
