ដោយទទួលបានការឧបត្ថម្ភថវិកាប្រកបដោយចិត្តសប្បុរសពីសាកលវិទ្យាល័យពោធិសាស្រ្ត លោកបណ្ឌិត សាក់ប្រាសាន់ឌី លោក អាន់ឌ្រាស់ និងភរិយា ពីរសៀលថ្ងៃទី២៣ ខែមករា ឆ្នាំ២០២៣ បាននាំយកអំណោយជាស្បៀង ចែកជូនដល់ប្រជាពលរដ្ឋក្រីក្រ និងចាស់ជរា ចំនួន ៦០គ្រួសារ រស់នៅភូមិពោធ៍រីង ឃុំខ្វាវ ស្រុកជីក្រែង ខេត្តសៀមរាប ដោយមានការនិមន្ត និងអញ្ជើញចូលរួមពីសំណាក់ ព្រះរាជាគណកិត្តិយស ព្រះគ្រូ ព្រះថេរានុត្ថេរៈ លោកមេឃុំ សមាជិកក្រុមប្រឹក្សាឃុំ និងលោកមេប៉ុស្តិ៍ផងដែរ។
បើតាមលោក ធិន ភី មេឃុំខ្វាវ ស្រុកជីក្រែង ខេត្តសៀមរាប បានបង្ហាញការសប្បាយចិត្ត នៅពេលដែលបានឃើញសកម្មភាពរបស់សប្បុរស់ជន រួមជាមួយព្រះសង្ឃនៅក្នុងសៀមរាប បានមកជួយដល់ប្រជាពលរដ្ឋនៅក្នុងតំបន់របស់លោក ជាពិសេសគឺការផ្តល់ជាស្បៀងដល់ប្រជាពលរដ្ឋក្រីក្រ និងចាស់ជរានៅពេលនេះ។ សកម្មភាពនៃការចូលរួមបែបនេះ គឺពិតជាសំខាន់ ដោយទី១ បានមកដល់ដៃអ្នកខ្វះខាត និងកំពុងមានតម្រូវការដោយផ្ទាល់នៅតំបន់ជនបទដាច់ស្រយ៉ាល ទី២ជាចំណែកមួយក្នុងការចូលរួមជាមួយអាជ្ញាធរឃុំជួយដល់ប្រជាពលរដ្ឋដែលកំពុងខ្វះខាតបានទាន់ពេលវេលា។ ជាមួនោះលោកបានថ្លែងអំណរគុណដល់សប្បុរសជន និងព្រះសង្ឃនៅក្នុងក្រុងសៀមរាប ដែលបានផ្តល់ស្បៀងរដល់គ្រួសារក្រីក្រ និង ចាស់ជរានាពេលនេះ។
ព្រះធម្មានុរក្ខញាណ ស៊ុម ពិសិទ្ធិ ព្រះរាជាគណកិត្តិយស ព្រះសមុហ៌គណខេត្តសៀមរាប បានមានសង្ឃដីការថា ទេយ្យវត្ថុប៉ុននេះ បើធៀបទៅនឹងអ្នកមាន ឬឧកញ៉ា វាមិនបានស្មើនឹងអាហារមួយពេលរបស់គេផង ប៉ុន្តែវាមានន័យណាស់សម្រាប់មនុស្សដែលរកព្រឹកខ្វះល្ងាច ឬរកថ្ងៃនេះខ្វះស្អែក។ ព្រះតេជគុណបន្តថា កន្លងមកព្រះសង្ឃជាចៅអធិការវត្តមួយចំនួននៅក្នុងក្រុងសៀមរាប តែងតែបាននាំយកទេយ្យវត្ថុ ទៅផ្តល់ជូនដល់ប្រជាពលរដ្ឋដែលកំពុងខ្វះខាត នៅតាមមូលដ្ឋាន ដើម្បីជាការចូលរួមជាមួយអាជ្ញាធរក្នុងជួយអ្នកខ្វះខាតឱ្យបានទាន់ពេលវេលា។
សូមបញ្ជាក់ថា អំណោយដែលបានចែកជូននៅពេលនេះក្នុងមួយគ្រួសារទទួលបាន៖ អង្ករ ១៥គីឡូក្រាម ទឹកត្រី១យួរ ទឹកស៊ីអ៊ីវ១យួរ មី១កេស សារុង១ ថ្នាំទម្លាក់សត្វស្អិត៣ប្រអប់ និង ថវិកា២ម៉ឺនរៀល៕
អត្ថបទ និងរូបភាព៖ លោក ឃុត សៅ
កែសម្រួល៖ លោក អ៊ុន ណារាជ្យ
