ក្រុមមគ្គុទេសក៍ទេសចរណ៍មុខប្រាសាទអង្គរវត្ត បានអំពាវនាវដល់ប្រជាពលរដ្ឋខ្មែរ ដើរទស្សនាប្រាសាទបុរាណ ជាពិសេសទស្សនាប្រាសាទអង្គរ ជួយទទួលយកមគ្គុទេសក៍នាំផ្លូវ ដើម្បីឱ្យបានដឹងពីប្រវត្ដិសាស្ដ្រអង្គរច្បាស់លាស់ ខណៈដែលអ្នកទេសចរខ្មែរមួយចំនួននៅមិនទាន់ស្គាល់ច្បាស់ពីប្រវត្ដិសាស្ដ្រខ្មែរនៅឡើយ។
លោក វ៉ា បូរី ជាមគ្គុទេសក៍ទេសសចរណ៍ ប្រចាំតំបន់ប្រាសាទអង្គរ បានឱ្យដឹងថា នាពេលបច្ចុប្បន្ននេះ មានភ្ញៀវទេសចរជាតិកំពុងទៅទស្សនាអង្គរកើនឡើងជាបន្ដបន្ទាប់ ប៉ុន្ដែមានប្រជាពលរដ្ឋខ្មែរមួយចំនួន ពួកគាត់មិនទាន់ស្គាល់ច្បាស់ពីប្រវត្ដអង្គរនៅឡើយ ដែលធ្វើឱ្យការទស្សនាប្រាសាទមិនបានទូលំទូលាយនៅមានមន្ទិលសង្ស័យពីស្ដេចអង្គណាកសាងប្រាសាទអង្គរវត្ដ។ អ្នកនាំផ្លូវទស្សនាប្រាសាទ មានសារៈសំខាន់ខ្លាំងណាស់ ក្នុងការស្វែងយល់ពីប្រវត្ដសាស្ដ្ររបស់ខ្មែរ ដែលមគ្គុទេសអាចពន្យល់និងរៀបរាប់យ៉ាងក្បោះក្បាយនូវរូបចម្លាក់នៅតាមជញ្ជាំងប្រាសាទឬនៅកន្លែងផ្សេងនៃប្រាសាទ។ លោកបន្ដថា ប្រាសាទអង្គរដែលជាបេតិកភណ្ឌពិភពលោកមានប្រវត្ដិសាស្ដ្រច្បាស់លាស់ត្រឹមត្រូវ ប៉ុន្ដែបើមានអ្នកនាំផ្លូវមិនដឹងពីវប្បធម៌របស់ខ្មែរនាំឱ្យមានការភ័នច្រឡំ។
ជាមួយគ្នានោះដែរ លោក ថូ ម៉ៅ ជាមគ្គុទេសក៍ដូចគ្នា បានឱ្យដឹងថា កន្លងមកធ្លាប់មានអ្នកទេសចរខ្មែរ យកមគ្គុទេសក៍ឱ្យដើរពន្យល់ពីប្រវត្ដិប្រាសាទបុរាណដែរ ប៉ុន្ដែមានតិចតួច ទើបពួកគាត់ចង់ឱ្យភ្ញៀវខ្មែរយកមគ្គុទេសក៍នាំផ្លូវ ដែលជាផ្នែកមួយឱ្យប្រជាពលរដ្ឋខ្មែរ បានយល់កាន់តែច្បាស់ពីប្រវត្ដសាស្ដ្រអង្គរ និងជួយលើកស្ទួយសេដ្ឋកិច្ចដល់មគ្គុទេសក៍ទេសចរណ៍ផងដែរ។ លោកបន្ដថា ប្រជាពលរដ្ឋខ្មែរមួយចំនួនទៅទស្សនាអង្គរវត្ដឬប្រាសាទផ្សេងៗ មិនទាន់ពីប្រវត្ដិតាមប្រាសាទនៅឡើយទេ ទើបមគ្គុទេសក៍ចង់ឱ្យភ្ញៀវទេសចរខមែរ យកអ្នកជំនាញជួយពន្យល់បន្ថែម ។
បើតាមការឲ្យដឹងពីលោក ខៀវ ធី ប្រធានសមាគមមគ្គុទេសក៍ទេសចរណ៍អង្គរ មានប្រសាសន៍ថា មគ្គុទេសក៍ទេសចរណ៍នៅក្នុងខេត្ដសៀមរាបមានចំនួនជាង ៥ពាន់នាក់ ប៉ុន្ដែមានចំនួន ៣ពាន់នាក់ បានប្រត្ដិបត្ដិការងាររាល់ថ្ងៃ ហើយគិតជាមធ្យមមានមគ្គុទេសក៍ទេសចរណ៍ចំនួន ១រយនាក់ កំពុងបំពេញការងារប្រចាំថ្ងៃនៅតាមប្រាសាទ។ លោកបន្ដថា តាមការកត់សំគាល់កន្លងមក ភ្ញៀវបរទេសតែយកមគ្គុទេសក៍ឱ្យជួយពន្យល់ពីប្រវត្ដប្រាសាទ ប៉ុន្ដែសម្រាប់ភ្ញៀវខ្មែរ ជួលមគ្គុទេសក៍ខ្មែរដើរបង្ហាញផ្លូវនៃការទស្សនា មានតែមកពីតាមស្ថាប័នរដ្ឋនិងលក្ខណៈជាក្រុមផ្សេងៗ និងខ្លះទៀតជាអនិកជន។ លោកក៏ចង់ឱ្យជនជាតិខ្មែរទៅទស្សនាប្រាសាទ យកមគ្គុទេសក៍ដើរអមទស្សនាប្រាសាទដែរ ដើម្បីឱ្យប្រជាពលរដ្ឋបានយល់ច្បាស់ពីប្រវត្ដសាស្ដ្រខ្មែរពិត ព្រោះធ្លាប់មានអ្នកនាំផ្លូវដែលមិនមានជំនាញ អត្ថាធិប្បាយខុសប្រាប់ភ្ញៀវខុសនាំឱ្យមានការភ័ន្ធច្រឡំ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
