បច្ចុប្បន្ន មជ្ឈមណ្ឌលស្ដារលទ្ធភាពពលកម្មកាយសម្បទា នៃសាខាមូលនិធិជនពិការខេត្តសៀមរាប កំពុងធ្វើការកំណត់អត្តសញ្ញាណជនមានពិការភាព នៅតាមមូលដ្ឋាន ដើម្បីឱ្យពួកគាត់អាចទទួលបានអត្តសញ្ញាណបណ្ណ ជនមានពិការភាព ដែលអាចទទួលអត្ថប្រយោជន៍ ក៏ដូចជាសេវាផ្សេងៗពីរាជរដ្ឋាភិបាល និងវិស័យឯកជននៅពេលខាងមុខ នេះបើតាមការលើកឡើងរបស់លោក បឹង ពេជ្រ មន្ត្រី ផ្នែកកំណត់អត្តសញ្ញាណជនមានពិការភាព នៃមជ្ឈមណ្ឌលស្ដារលទ្ធភាពពលកម្មកាយសម្បទា ខេត្តសៀមរាប ក្នុងកម្មវិធីសន្ទាមតិ របស់មន្ទីព័ត៌មានខេត្តសៀមរាប ថ្ងៃទី២៤ ខែមករា ឆ្នាំ២០២៣។
លោក បឹង ពេជ្រ បញ្ជាក់ថា ដើម្បីអាចទទួលបានអត្តសញ្ញាណបណ្ណជនមានពិការភាព គឺតម្រូវឱ្យបងប្អូនមានពិការភាព ទៅចុះឈ្មោះនៅឃុំ សង្គាត់ ដែលខ្លួនរស់នៅ និងមានការបញ្ជាក់ពីអាជ្ញាធរមូលដ្ឋាននៅទីនោះ។ តាមរយៈទិន្និន័យដែលទទួលបានពីមូលដ្ឋាន បច្ចុប្បន្នក្នុងខេត្តសៀមរាប មានជនពិការសរុបចំនួន ១៤ ១៦៨នាក់។ ជាមួយនោះ ដើម្បីជួយដល់ជនមានពិការភាព អាចប្រកបរបរចិញ្ចឹមជីវិតមានភាពប្រសើរជាមុន មជ្ឃមណ្ឌលស្តារស្តារកាយសម្បទា ស្ថិតក្នុងក្រុងសៀមរាប មានផ្ដល់សេវា ផលិតដៃ ជើង សិប្បនិមិត្តជូនជនពិការភាពដោយឥគិតថ្លៃ លើសពីនោះ ចំពោះការស្នាក់នៅ ក៏មជ្ឈមណ្ឌលផ្ដល់ជូនដោយឥតគិតថ្លៃផងដែរ។
ព័ត៌មានជាតិ ថ្មីៗ
លោក បឹង ពេជ្រ ក៏បានបញ្ជាក់បន្ថែមថា ការធ្វើអត្តសញ្ញាណបណ្ណជនមានពិការភាពនេះដែរ ក៏នឹងជួយជំរុញដល់ក្រសួងពាក់ព័ន្ធ ក្នុងការធ្វើផែនការឱ្យមានភាពបន្ស៊ីគ្នា ដើម្បីអាចឱ្យជនមានពិការភាពដែលមានបណ្ណក្រីក្រ ដើម្បីឱ្យពួកគាត់អាចទទួលកញ្ចប់គាំពារសង្គម។
តាមការឱ្យដឹងពី លោក សេង គឹម សួរ អ្នកសម្របសម្រួលកម្មវិធី របស់អង្គការ ហារការ ប្រចាំតំបន់ភាគពាយ័ព្យ បានឱ្យដឹងថា ជនមានពិការភាព ភាគច្រើន ពុំមានលិខិតសម្គាល់អត្តសញ្ញាណខ្លួននោះទេ ពួកគាត់ផ្លាស់ប្ដូរទីលំនៅញឹកញាប់ ដែលធ្វើឱ្យអាជ្ញាធរមូលដ្ឋានពិបាក ក្នុងធ្វើលិខិតបញ្ជាក់ទីលំនៅជូនពួកបាន ជាមួយនោះពួកគាត់ ក៏ពិបាកក្នុងការស្នើកិច្ចគាំពាសង្គមពីរាជរដ្ឋាភិបាលផងដែរ។
អត្ថបទ និងរូបភាព៖ លោក ហ៊ុន ឆៃលាង
កែសម្រួល៖ លោក សេង ផល្លី
