ឯកឧត្តមបណ្ឌិត ឌុច វនទីតូ អនុរដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ដើម្បីឲ្យការគ្រប់គ្រង និងអភិវឌ្ឍន៍ក្រុងសៀមរាប ប្រកបដោយចីរភាព គណៈកម្មាធិការៀបចំដែនដី និងនគររូបនីយកម្មខេត្ត និងក្រុងសៀមរាប ក្រោមការគាំទ្របច្ចេកទេសដោយក្រសួងរៀបចំដែនដី នគរូបនីយកម្មនិងសំណង់ បានរៀបចំនូវ ប្លង់គោលប្រើប្រាស់ដីក្រុងសៀមរាប ចក្ខុវិស័យឆ្នាំ២០៣៥ ដើម្បីជាមូលដ្ឋានក្នុងការគ្រប់គ្រងនិងតម្រង់ទិសអភិវឌ្ឍដែនដីក្រុងសៀមរាបទាំងមូល ស្របតាមចក្ខុវិស័យសំខាន់ៗជាច្រើនទៀត ក្នុងនោះក្រសួង បានដាក់ចេញនូវយុទ្ធសាស្ដ្រចំនួន០៨ចំណុច ដើម្បីសម្រេចបានគោលដៅលើប្លង់គោលប្រើប្រាស់ដីក្នុងក្រុងសៀមរាប រួមមាន ៖
១. ការគ្រប់គ្រងប្រើប្រាស់ដី និងនគររូបនីយកម្មប្រកបដោយប្រសិទ្ធភាព និងចីរភាព ,
២. អភិវឌ្ឍន៍វិស័យទេសចរណ៍ក្រុងសៀមរាប ,
៣. អភិវឌ្ឍន៍ហេដ្ឋារចនាសម្ព័ន្ធបចេ្ចកទេស និងសេវាកម្ម ,
៤. អភិវឌ្ឍន៍វិស័យកសិកម្ម និងផ្សព្វផ្សាយផលិតផលក្នុងស្រុក ,
៥. អភិវឌ្ឍន៍វិស័យសង្គមកិច្ច ,
៦. ការការពារបរិស្ថាន និងធនធានធម្មជាតិ ,
៧. ការទប់ស្កាត់គ្រោះមហន្តរាយ និង
៨. ពង្រឹងការគ្រប់គ្រង និងហិរញ្ញវត្ថុនៅមូលដ្ឋានជាដើម។
ឯកឧត្តម ឌុច វនទីតូ បានលើកឡើងដូចច្នេះ នៅក្នុងសិក្ខាសាលាស្តីពីការផ្សព្វផ្សាយប្លង់គោលប្រើប្រាស់ដីនៅក្នុងក្រុងសៀមរាប សម្រាប់ការអភិវឌ្ឃ និងការអភិរក្សប្រកបដោយចីរភាព នៅសាលាខេត្តសៀមរាប នាព្រឹកថ្ងៃទី០២ ខែមេសា ឆ្នាំ២០១៩នេះ ។
ឯកឧត្តមបណ្ឌិត មានប្រសាសន៍ទៀតថា ប្លង់គោលប្រើប្រាស់ដីនេះ ត្រូវបានកសាងឡើងដោយការសិក្សាច្បាស់លាស់លើកត្តាភូមិសាស្ត្រ សេដ្ឋកិច្ច សង្គមកិច្ច បរិស្ថាន ទេសចរណ៍ និងវប្បធម៍ ព្រមទាំងគោលនយោបាយ ច្បាប់ និងលិខិតបទដ្ឋានគតិយុត្តសំខាន់ៗមួយចំនួន ពាក់ព័ន្ធនឹងការរៀបចំដែនដីនិងនគរូបនីយកម្មនៅថ្នាក់ជាតិ និងថ្នាក់ក្រោមជាតិ មានជាអាទិ៍ ៖ ច្បាប់ភូមិបាល , ច្បាប់ស្តីពីការរៀបចំទឹកដី នគរូបនីយកម្ម និងសំណង់ , ច្បាប់ស្តីពីកិច្ចការពារ បរិស្ថាននិងធនធានធម្មជាតិ , ច្បាប់ស្តីពីកិច្ចការពារបេតិកភណ្ឌវប្បធម៌ , ច្បាប់ស្តីពីទេសចរណ៍ , ច្បាប់ស្តីពីផ្លូវថ្នល់ , ច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ និងច្បាប់រួមទាំងអនុក្រឹត្យមួយចំនួនទៀត ។
គួររំលឹកថា ក្រុងសៀមរាប មានផ្ទៃដីសរុបជាង ៤ម៉ឺនហិកតា ដែលផ្ទៃដីអាចសាសង់បានទំហំជាង៣ម៉ឺនហិកតា ស្មើនឹង ៨១,៥៣ភាគរយ និងផ្ទៃដីជាង៨ពាន់ហិកតាទៀត មិនអាចសាងសង់បាន ព្រោះជាតំបន់ការពារ ៕
អត្ថបទ និង រូបថត ៖ លោក បុង ឆវ័ន
កែសម្រួលអត្ថបទ ៖ លោក លីវ សាន្ត
