នៅព្រឹកថ្ងៃទី០៣ខែមេសា ឆ្នាំ២០១៩នេះ យុវសិស្សចំនួន៩២រូប មកពីវិទ្យាល័យសម្តេចឪ និងអនុវិទ្យាល័យ ហ៊ុន សែនគ្រួស ត្រូវបានបំពាក់កន្សែងជាសមាជិកយុវជនសាខាកាកបាទក្រហមកម្ពុជាខេត្តសៀមរាប ក្រោមអធិបតីភាព លោកជំទាវ ទាង អេង ទៀ សីហា អនុប្រធានគណៈកម្មាធិការសាខា និងជាតំណាងខ្ពង់ខ្ពស់ ឯកឧត្តម ទៀ សីហា អភិបាលខេត្ត និងជាប្រធានគណៈកម្មាធិការសាខាកាបាទក្រហមកម្ពុជាខេត្តសៀមរាប ។
មានប្រសាសន៍នាឱកាសនោះ លោកជំទាវ ទាង អេង បានមានប្រសាសន៍ថា ដើម្បីបំពេញបន្ថែមសមាជិកយុវជនដែលបានប្រឡងចេញ ឬត្រូវបន្តការសិក្សា នៅថ្នាក់ឧត្តមសិក្សា និងដើម្បីពង្រីកសមាជិកយុវជនថ្មី សម្រាប់បំពេញសកម្មភាពមនុស្សធម៌ ថ្ងៃនេះ សាខាកាកបាទក្រហមកម្ពុជាខេត្តសៀមរាប បានទទួលស្គាល់ប្អូនៗជា យុវសិស្សចំនួន៩២រូប មកពីវិទ្យាល័យសម្តេចឪ និងអនុវិទ្យាល័យ ហ៊ុន សែនគ្រួស ជាសមាជិកយុវជនសាខាកាកបាទក្រហមកម្ពុជាខេត្ត ដូច្នេះតាមរយៈនេះ សូមឲ្យប្អូនៗ ត្រូវ ៖
ទី១. គោរពវិន័យសាលា ខិតខំរៀនសូត្រឱ្យបានពូកែ និងធ្វើជាគំរូល្អគ្រប់សកម្មភាពក្នុងស្រទាប់យុវវ័យ ,
ទី២. ផ្សព្វផ្សាយពីគោលការណ៍គ្រឹះនៃចលនាអន្តរជាតិកាកបាទក្រហម អឌ្ឍចន្ទក្រហម និងពីសកម្មភាពកាកបាទក្រហមកម្ពុជា នៅក្នុងវិទ្យាល័យ និងនៅក្នុងសហគមន៍ ,
ទី៣. ចូលរួមសកម្មភាពមនុស្សធម៌ក្នុងវិទ្យាល័យ មានការជួយដល់យុវសិស្សក្រីក្រ រៀនខ្សោយ និងការលើកទឹកចិត្តយុវសិស្សពិការផងដែរ ,
ទី៤. មានទំនាក់ទំនងស្មើភាពក្នុងជួរយុវជន ដោយសហការល្អ និង ចែករំលែកបទពិសោធន៍ជាមួយយុវកាយរិទ្ធិជាតិកម្ពុជា សហភាព សហព័ន្ធយុវជនកម្ពុជា ក៏ដូចជាយុវជននៃបណ្ដាប្រទេសជាមិត្តនានាក្នុងសកលលោក និង
ទី៥. ធ្វើជាគំរូល្អក្នុង ការគោរពច្បាប់ចរាចរណ៍ ដើម្បីរួមចំណែកកាត់បន្ថយគ្រោះថ្នាក់ និងពិការភាពដោយគ្រោះថ្នាក់ចរាចរណ៍ក្នុងសង្គម ជាពិសេសត្រៀមខ្លួនអនុវត្តឱ្យបានល្អក្នុងនាមជាយុវជនកាកបាទក្រហមកម្ពុជា និងអនុវត្តតាមអនុសាសន៍នែនាំដ៍ខ្ពង់ខ្ពស់របស់សម្តេចគតិព្រឹទ្ឋបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ។
លោកជំទាវ ទាង អេង មានប្រសាសន៍ទៀតថា យុវជនកាកបាទក្រហមកម្ពុជា គឺជាអ្នកស្ម័គ្រចិត្តវ័យក្មេង ដែលជាកម្លាំងស្នូលមួយដ៏មានសារៈសំខាន់ និងសកម្មបំផុត ក្នុងការផ្ដល់នូវសេវាកម្មមនុស្សធម៌ ប្រកបដោយការប្ដេជ្ញាចិត្តខ្ពស់ និងការលះបង់ឥតងាករេ ស្របតាមប្រធានបទ “យុវជនកំពុងនាំគ្នាធ្វើកម្មភាព យុវជនជាភ្នាក់ងារនៃការផ្លាស់ប្តូរឥរិយាបថក្នុងសង្គម” ហើយលើសពីនេះកម្ពុជាបានចាត់ទុកយុវជនជាធនធានគន្លឹះ និងមានតម្លៃបំផុតសម្រាប់ការអភិវឌ្ឍសេដ្ឋកិច្ច សង្គមកិច្ច វប្បធម៌ បរិស្ថាន និងការរក្សាសន្តិភាព ហើយនៅគ្រប់សម័យកាល គ្រប់សង្គម យុវជនជាកម្លាំងស្រួចដែលមានកម្លាំងកាយ-កម្លាំងចិត្ត និងស្មារតីភ្លឺស្វាង មានទឹកចិត្តក្លាហាន ពុះពារមិនរារែកគ្រប់ឧបសគ្គ ការលំបាកនានា ពិសេសយុវជនគឺជាសសរទ្រូងរបស់ប្រទេសជាតិទាំងនៅពេលបច្ចុប្បន្ន និងទៅអនាគត ។
សូមបញ្ជាក់ថា បច្ចុប្បន្ននេះ យុវជនសាខាកាកបាទក្រហមកម្ពុជាខេត្តសៀមរាប មានចំនួន៧៦៤នាក់ ៕
អត្ថបទ និង រូបថត ៖ លោក យូ វង្ស និង លោក គឿន វេត
កែសម្រួលអត្ថបទ ៖ លោក លីវ សាន្ត
