កាលពីព្រឹកថ្ងៃទី០២ ខែមេសា ឆ្នាំ២០១៩នេះ ឯកឧត្ដម ទៀ សីហា អភិបាលខេត្ត និង ឯកឧត្ដម អ៊ឹង ហឿន ប្រធានក្រុមប្រឹក្សាខេត្តសៀមរាប បានដឹកនាំឯកឧត្ដម លោក លោកស្រី ជាសមាជិកក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំមន្ទីរ អង្គភាព មន្ត្រីអ្នកមុខអ្នកការ អភិបាល អភិបាលរងក្រុងនិងស្រុកមួយចំនួនក្នុងខេត្តសៀមរាប បានចុះសាកសួរសុខទុក្ខកងទ័ព នៃកងវរៈសេនាតូចលេខ១ ដែលកំពុងឈរជើងនៅក្នុងភូមិសាស្ត្រភូមិត្រពាំងក្រសាំង ឃុំស្រែណូយ ស្រុកវ៉ារិន ខេត្តសៀមរាប គោលបំណងចង់ដឹងពីសុខទុក្ខនិងជីវភាពរស់នៅរបស់កងទ័ព និងសម្ដែងនូវការគោរពដឹងគុណចំពោះវីរភាពដ៏អង់អាចក្លាហានរបស់វីរយុទ្ធជន និង យុទ្ធនារី ដែលបានលះបង់សាច់ស្រស់ ឈាមស្រស់ និង អាយុជីវិត ក្នុងបុព្វហេតុរំដោះជាតិមាតុភូមិពីរបបប្រល័យពូជសាសន៍ ប៉ុល ពត និង ការពារអធិបតេយ្យភាពជាតិបានយ៉ាងរឹងមាំ ដើម្បីស្ថេរភាព សន្តិភាព និង ការអភិវឌ្ឍន៍ប្រទេសជាតិទាំងមូល ។
មានប្រសាសន៍សំណេះសំណាលក្នុងឱកាសនោះ ឯកឧត្ដម ទៀ សីហា អភិបាលខេត្តសៀមរាប បានពាំនាំនូវការផ្ដាំផ្ញើសាកសួរសុខទុក្ខពីសំណាក់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី និង ជារដ្ឋមន្ត្រីក្រសួងការពារជាតិ ដែលរយៈកាលកន្លងមក ក៏ដូចជាទៅអនាគត សម្ដេច តែងតែយកចិត្តទុកដាក់ជាខ្លាំងចំពោះសុខទុក្ខ និង ជីវភាពរស់នៅរបស់កងទ័ពយើងនៅទូទាំងប្រទេសកម្ពុជា ជាពិសេស ក្នុងនាមរដ្ឋបាលខេត្ត និង រូបឯកឧត្ដមផ្ទាល់ដែលជាយុវជនជំនាន់ក្រោយ សូមសម្ដែងនូវការគោរព ដឹងគុណ និង ចងចាំជាប់ជានិច្ចនូវគំរូវីរៈភាពទាំងអស់នេះក្នុងក្រអៅបេះដូង ដើម្បីប្រែក្លាយទៅជាសកម្មភាពជាក់ស្ដែង ក្នុងកិច្ចការពារជាតិមាតុភូមិ និង ការអភិវឌ្ឍន៍ប្រទេសជាតិឲ្យកាន់តែមានការរីកចម្រើនថ្មីៗបន្ថែមទៀត ។
ឯកឧត្ដម ទៀ សីហា មានប្រសាសន៍ទៀតថា បច្ចុប្បន្ននេះ ប្រទេសជាតិទាំងមូលមានសុខសន្តិភាពពេញបរិបូរណ៍ហើយ ដូច្នេះសូមឲ្យបន្តនូវកិច្ចការពារបូរណភាពជាតិ និង ទឹកដី រួមជាមួយនឹងការខិតខំយកចិត្តទុកដាក់លើការងារដាំដំណាំរួមផ្សំ និង ការចិញ្ចឹមសត្វ ដើម្បីជួយដោះស្រាយនូវជីវភាពប្រចាំថ្ងៃរបស់កងទ័ព ជាពិសេស ត្រូវបង្កើនការយកចិត្តទុកដាក់ក្នុងការការពាររាជរដ្ឋាភិបាលស្របច្បាប់ ដែលកើតចេញពីការបោះ ឆ្នោតជាសកល កុំជឿតាមការញ៉ុះញ៉ង់របស់ក្រុមអគតិ ឬក៏ក្រុម ជនដែលមាននិន្នាការប្រឆាំងជាមួយរាជរដ្ឋាភិបាលកម្ពុជា ៕
ព័ត៌មានជាតិ ថ្មីៗ
អត្ថបទ ៖ លោក លីវ សាន្ត
រូបថត ៖ សហការី
