លោកស្រី នង បូរ៉ាវី បុរាណវិទូនៃនាយកដ្ឋានអភិរក្សប្រាសាទក្នុងឧទ្យាន និងបុរាណវិទ្យាបង្ការ អ្នកគ្រប់គ្រងនៅការដ្ឋានជួសជុលច្រាំងកសិន្ធុប្រាសាទអង្គរវត្ត បានឱ្យដឹងថា ការជួសជុលច្រាំងកសិន្ធុ គឺមានប្រវែង១០ម៉ែត្រ នៅទីតាំងបង្ហូរទឹករបស់បារាំងពីត្រពាំងសេះចូលក្នុងកសិន្ធុដែលជាចំណុចកណ្ដាល ដើម្បីបំពេញចំណុចដែលនៅជាចន្លោះប្រហោងនៃច្រាំងកសិន្ធុនេះ ខណៈដែលច្រាំងកសិន្ធុផ្នែកខាងលិចស្លាបខាងជើង ត្រូវបានជួសជុសដោយប្រទេសអ៊ីតាលីប្រវែង៨០ម៉ែត្រ បានបញ្ចប់នៅឆ្នាំ២០១៥ និងជួសជុលដោយអាជ្ញាធរជាតិអប្សរាជំហានដំបូងប្រវែង ៤០ម៉ែត្របានបញ្ចប់នៅឆ្នាំ២០១៧ ហើយគម្រោងនេះនឹងប្រើពេល៦ខែ អាចបញ្ចប់នៅអំឡុងខែកញ្ញា ឆ្នាំ២០១៩នេះ ។
លោកស្រី បូរ៉ាវី បានបញ្ជាក់ទៀតថា មូលហេតុសំខាន់ៗដែលធ្វើឱ្យរចនាសម្ពន្ធសំណង់កសិន្ធុអង្គរវត្តផ្នែកខាងលិចស្លាបខាងជើង រងនូវការខូចខាតយ៉ាងខ្លាំងនោះ គឺដោយសារតែអាយុកាលនៃសំណង់ , ការពុកផុយនៃស្រទាប់ថ្មបាយក្រៀមខាងក្រោម និង ឫសឈើចាក់ជ្រែកទៅក្នុងថ្ម ធ្វើឱ្យថ្មរំកិលពីទីតាំងដើម។
គួររំលឹកថា ចាស់បុរាណកសាងច្រាំងកសិន្ធុដោយដីបុកបង្ហាប់ បាតគ្រឹះក្រោម ដូច្នេះដើម្បីរក្សាតម្លៃនៃបេតិកភណ្ឌវប្បធម៌ អាជ្ញាធរជាតិអប្សរា បានជ្រើសយកបច្ចេកទេសបុរាណមកអនុវត្ត ដោយកាយយកដីចាស់ ដីស្អុយចេញ ហើយជំនួសដោយដីថ្មី ហើយបុកបង្ហាប់គ្រឹះក្រោមឱ្យមាំជាមួយថ្មភ្នំ ថ្មក្រលៀន ដីខ្សាច់ និងល្បាយដី ដែលបានពីកម្ទេចថ្មបាយក្រៀម ដីឥដ្ឋ កំបោរស រីឯចំពោះគ្រឹះ គឺបានពង្រីកទំហំគ្រឹះចាស់៨០ សង់ទីម៉ែត្រ ទៅ១២០សង់ទីម៉ែត្រ ហើយជម្រៅគ្រឹះទៅក្រោមពី៣០សង់ទីម៉ែត្រទៅ៨០សង់ទីម៉ែត្រ ដោយធ្វើយ៉ាងណាឱ្យកាំកសិន្ធុរឹងមាំបានល្អ ។
ក្រៅពីពង្រឹងគ្រឹះហើយ អ្នកជំនាញក៏បានពង្រឹងរចនាសម្ព័ន្ធច្រាំងកសិន្ធុ ដោយប្រើថ្មបាយក្រៀមថ្មី ជំនួសថ្មបាយក្រៀមចាស់ដែលពុកផុយមិនអាចប្រើឡើងវិញបាន ហើយបានរៀបជាជណ្ដើរចំនួន ៨កាំ ដោយដាក់ឆ្លាស់គ្នា និងដាប់ចុះក្រោម១សង់ទីម៉ែត្រសម្រាប់ប្រទាក់គ្នាពីមួយទៅមួយក្នុងការរក្សាលំនឹងឱ្យបានល្អមិនឱ្យថ្មរអិល ហើយបិទភ្ជាប់ថ្មពីមួយទៅមួយដោយបាយអររាវ ដើម្បីការពារជម្រាបទឹកចូលក្នុងថ្ម ធ្វើឱ្យថ្មឆាប់ពុកផុយ ។
រីឯថ្មភក់ដែលរៀបនៅផ្នែកខាងលើថ្មបាយក្រៀម មាន៥កាំ ក៏រៀបទៅតាមលំនាំដើម ដោយប្រើថ្មដែលមានស្រាប់ និងថ្មជំនួសថ្មីដែលមិនអាចទ្រទម្ងន់បានទៀត ហើយបិទភ្ជាប់ថ្មដោយបាយអរម្សៅ ដើម្បីភ្ជឹតស្នាមមិនឱ្យទឹកចូលក្នុងថ្ម ធ្វើឱ្យថ្មឆាប់ខូច ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
