លោក សេម ចាន់ ឬ ចាន់ ឆីនហុង ជាជនបរទេសម្នាក់ដែលចូលចិត្តទទួលទាននំបញ្ចុកខ្មែរជាងគេ និងបានផ្សព្វផ្សាយអាហារមួយប្រភេទនេះជាញឹកញាប់ ទៅកាន់ជនបរទេសដទៃទៀតដែលស្គាល់គាត់។ តើមូលហេតុអី្វ បានជានំបញ្ចុកជាអាហារដ៏ពេញនិយមរបស់គាត់?
លោក សេម ចាន់ គឺជាអ្នកវិនិយោគិន ជនជាតិម៉ាឡេស៊ី បច្ចុប្បន្នលោកជាម្ចាស់ក្រុមហ៊ុនទេសចរណ៍មួយ ម្ចាស់ភោជនីយដ្ឋានមួយកន្លែងនៅក្នុងខេត្តសៀមរាប និងជាសមាជិកសមាគមចុងភៅកម្ពុជា ហើយនាពេលកន្លងមកលោកក៏ធ្លាប់ជាថ្នាក់ដឹកនាំមួយរូបនៅក្រុមហ៊ុនអាកាសចរណ៍អង្គរអ៊ែរផងដែរ។
លោក បានប្រាប់ឲ្យដឹងថា លោកត្រូវបានបញ្ជូនមកបំពេញការងារនៅកម្ពុជា ដោយក្រុមហ៊ុនអាកាសចរណ៍អង្គរអ៊ែរ អំឡុងពេលលោកបម្រើការងារក្នុងក្រុមហ៊ុនមួយនេះ នៅពេលនោះលោកពិបាកក្នុងការបរិភោគម្ហូបខ្មែរណាស់ ថ្ងៃមួយមានសន្តិសុខម្នាក់បានណែនាំលោកអំពីនំបញ្ចុក ដែលលក់នៅតាមផ្លូវ ពេលនោះហើយជាឱកាស ដែលលោកបានភ្លក្សរសជាតិនំបញ្ចុកខ្មែរលើកដំបូង ហើយចាប់ពីពេលនោះមក លោកក៏ចូលចិត្តទទួលទានវារហូតមកដល់បច្ចុប្បន្ន។
រយៈពេលដែលលោកធ្វើការវិនិយោគក្នុងប្រទេសកម្ពុជាជាង ៦ឆ្នាំនេះ លោក សេម បានភ្លក្សរសជាតិនំបញ្ចុកប្លែកៗគ្នា នៅតាមបណ្ដាខេត្តនានា ក្នុងប្រទេសកម្ពុជា។ បន្ទាប់មក លោកបាន ដាក់បញ្ចូលនំបញ្ចុកទៅក្នុងបញ្ជីមុខម្ហូប ទៅក្នុងភោជនីយដ្ឋានរបស់លោក។
លោក បានឲ្យដឹងបន្ថែមថា បន្ទាប់ពីស្គាល់ពីនំបញ្ចុកច្បាស់ហើយ លោក បានណែនាំវាទៅភ្ញៀវបរទេសដទៃទៀត ដោយលោកបានបង្ហាញ ពីរបៀបធ្វើដោយផ្ទាល់ទៅតាមបែបបទ ដើម្បីបាននំបញ្ចុកមួយចាន និងណែនាំពីរបៀបញ៉ាំវា ថាតើមានភាពខុសប្លែកយ៉ាងណាខ្លះ ពីម្ហូបរបស់ពួកគេទទួលទានរាល់ថ្ងៃ។
នៅពេលមានសំណួរសួរថា ហេតុអ្វីលោកមិន លើកតម្កើងមុខម្ហូបប្រចាំប្រទេសម៉ាឡេស៊ីមកកាន់កម្ពុជាជំនួសឲ្យនំបញ្ចុកវិញ? វិនិយោគិនម៉ាឡេស៊ីរូបនេះ បានឆ្លើយថា បច្ចុប្បន្នលោកមានគ្រួសារជាជនជាតិខ្មែរនៅកម្ពុជា ហើយលោករស់នៅទីនេះយូរឆ្នាំដែរហើយ អញ្ចឹងលោកប្រហែលមិនពូកែចម្អិនម្ហូបប្រចាំប្រទេសលោកទៀតទេ ខ្ញុំទុកភារកិច្ចនេះជូនអ្នកជំនាញចម្អិនម្ហូបនៅក្នុងប្រទេសរបស់ខ្ញុំចោះ ហើយនៅពេលនេះម្ហូបដែលខ្ញុំចង់ណែនាំទៅកាន់មិត្តភក្តិរបស់ខ្ញុំគឺនំបញ្ចុកខ្មែរ។
លោក សេម ចាន់ មានចិត្តត្រេកណាស់ នៅពេលមនុស្សដែលលោកស្គាល់ ប្រាប់ថា ពួកគេបានញ៉ាំនំបញ្ចុក ទោះបីនៅកន្លែងផ្សេង ក្រៅពីភោជនីយដ្ឋានរបស់គាត់ក៏ដោយ។ ប៉ុន្មានឆ្នាំមកនេះ លោកត្រូវបានមិត្តភក្តិរបស់លោក ដាក់ឈ្មោះឲ្យថា Mr. Noodle ឬជាភាសាខ្មែរ បុរសនំបញ្ចុក។
លោកបានបញ្ជាក់ថា ជនបរទេសមួយចំនួនមិនចូលចិត្តប្រហុកខ្មែរ តែសម្រាប់លោកគឺចូលចិត្តណាស់ ហើយម្ហូបដែលលោកចូលចិត្តទទួលទានមានដូចជា សម្លម្ជូរ សម្លកកូរ និងម្ហូបជាច្រើនទៀត ដែលចម្អិនផ្សំជាមួយប្រហុកខ្មែរ។
អត្ថបទ៖ លោក សេង ផល្លី
រូបភាព៖ អ៊ុន ណារាជ្យ
