នៅថ្ងៃទី០៧ ខែមេសា ឆ្នាំ២០១៩ លោក ពិន ប្រាកដ អភិបាលរងខេត្តសៀមរាប បានសម្ពោធដាក់ឲ្យប្រើប្រាស់ជាផ្លូវ ការនូវសាលាធម្មសភា និងសមិទ្ធផលនានា ក្នុងវត្តព្រះស្នេហាបរិច្ឆ័ត្តព្រឹក្ស ហៅវត្តរលួស ស្ថិតនៅក្នុងឃុំរលួស ស្រុកប្រាសាទបាគង ខេត្តសៀមរាប។
លោក ពិន ប្រាកដ មានប្រសាសន៍ទៀតថា រាជរដ្ឋាភិបាលកម្ពុជាបានផ្ដល់តួនាទីយ៉ាងសំខាន់ដល់ព្រះពុទ្ធសាសនា តាំងពីអតីតកាលដល់បច្ចុប្បន្ន នឹងទៅអនាគត ដែលបានចារឹកទុកក្នុងរដ្ឋធម្មនុញ្ញនៃព្រះរាជាណាចក្រកម្ពុជាថា ´´´ព្រះពុទ្ធសាសនា ជាភាសាររបស់រដ្ឋ’’ ហើយក្នុងបរិបទនេះ រដ្ឋមានតួនាទីផ្សព្វផ្សាយ និងលើកតម្កើងគ្រឹះស្ថានអប់រំផ្នែកព្រះពុទ្ធសាសនា រួមមាន៖ សាលាបាលី និងពុទ្ធិកសិក្សានៅគ្រប់កម្រិត។
ថ្វីត្បិតតែ ព្រះពុទ្ធសាសនា ជាសាសនារបស់រដ្ឋ ប៉ុន្តែប្រទេសកម្ពុជា ដែលមានសម្ដេចអគ្គមហាសេនាបតីតេជោ ជានាយករដ្ឋមន្ត្រី បានផ្ដល់សេរីភាពពេញលេញ ទៅដល់សាសនិកនៃសាសនានានា នៅក្នុងប្រទេសកម្ពុជាធ្វើការប្រតិបត្តិ ដោយមិនប្រកាន់ ពូជសាសន៍ ពណ៌សំបុរ និងជំនឿឡើយ។
លោកអភិបាលរងខេត្ត ក៏បានបញ្ជាក់ទៀតថា ទោះបីប្រជាពលរដ្ឋខ្មែរយើងគោរពប្រតិបត្តិយ៉ាងខ្ជាប់ខ្ជួនក្ដី តែយើងក៏ត្រូវតែខិតខំធ្វើឲ្យបានប្រសើរឡើងថែមទៀត លើកត្តាសំខាន់ៗមួយចំនួន ដូចជាការពង្រឹងការអនុវត្តនូវខ្លឹមសារអនុសំវច្ឆរ ការពង្រឹងតួនាទី និងភារកិច្ចមន្ត្រីសង្ឃគ្រប់ថ្នាក់ឲ្យកាន់តែប្រសើរឡើង ជាពិសេសយុវជនត្រូវបង្កើនគំនិតបណ្តុះគុណធម៌ សីលធម៌ ចរិយាធម៌ ឲ្យមានទឹកចិត្តស្រឡាញ់ គោរព សណ្តោស និងការដឹងគុណចំពោះអ្នកមានគុណផងដែរ។
ក្នុងពិធីសម្ពោធនេះដែរ លោក អភិបាលរងខេត្ត បាននាំយកអំណោយជូនដល់យាយជី តាជី ១០០នាក់ក្នុងម្នាក់ៗ ទទួលបានក្រណាត់ស១ដុំនិងថវិកា ៥០០០រៀល យុវជន ស ស យ ក ២០ នាក់ ក្នុង១ម្នាក់ទទួលបានថវិកា ១ម៉ឺនរៀល យុវជនកាយរឹទ្ធ ២០នាក់ ក្នុងម្នាក់ៗទទួលបាន ១ម៉ឺនរៀល យុវជនកាកបាទក្រហម ២០ នាក់ ក្នុង១ទទួលថវិកា ១ ម៉ឺនរៀល សិស្សានុសិស្ស ១០០ នាក់ ក្នុងម្នាក់ៗទទួល សៀវភៅ ២ក្បាល ប៉ិច២ដើម និងថវិកាបីពាន់រៀល និងលោកគ្រូ អ្នកគ្រូ ៣៨ នាក់ ក្នុង ១ នាក់ ទទួលបានថវិកា ៣ម៉ឺនរៀល។
អត្ថបទ និង រូបថត ៖ លោក អ៊ុន ណារាជ្យ
កែសម្រួលអត្ថបទ ៖ លោក សេង ផល្លី