នៅក្នុងឱកាសនៃការដឹកនាំប្រតិភូសម្ព័ន្ធមេត្រីភាព ជួបសំណេះសំណាលសួរសុខទុក្ខ និងយកអំណោយមួយចំនួន ដើម្បីអបអរសាទរបុណ្យចូលឆ្នាំថ្មី ប្រពៃណីជាតិខ្មែរ ឧបត្ថម្ភជូនដល់កងវរៈសេនាតូចលេខ១ ចំណុះតំបន់ប្រតិបត្តិការសឹករងសៀមរាប។
នៅថ្ងៃទី០៧ ខែមេសា ឆ្នាំ២០១៩ ឯកឧត្តម សៀង ណាំ សមាជិកសភាមណ្ឌលសៀមរាប និងជាប្រធាននៃក្រុមសម្ព័ន្ធមេត្រីភាព លើកឡើងថា ៖ សកម្មភាព និង ពលិកម្មរបស់កងយោធពលខេមរភូមិន្ទ គឺដើម្បីថែរក្សាសន្តិភាព ស្ថិរភាពនយោបាយ គាំទ្រដាច់ខាត ការដឹកនាំរបស់រាជរដ្ឋាភិបាលស្របច្បាប់ ដែលប្រសូត្រចេញពីឆន្ទៈរបស់រាស្ត្រ តាមរយៈការបោះឆ្នោត ឆ្ពោះទៅរកការអភិវឌ្ឍនៅកម្ពុជា ។
ឯកឧត្តម បានលើកឡើងផងដែរថា កន្លងមកនេះ មានជនបំផ្លាញសង្គមមួយចំនួន តាំងខ្លួនថាជាអ្នកសេ្នហាជាតិ បានធ្វើសកម្មភាពញុះញ៉ង់ លាបពណ៌ តាមរយៈនៃការបំផុសចលនាប្រជាធិបតេយ្យ និង សិទ្ធមនុស្ស បំពេញមហិច្ឆតាបំបែកបំបាក់សាមគ្គីផ្ទៃក្នុងជាតិ ។ ឯកឧត្តម បានបញ្ចាក់ថា អ្នកស្នេហាជាតិពិតប្រាកដ គឺកងយោធពលខេមរភូមិន្ទនេះហើយ ដែលហ៊ានលះបង់អ្វីៗគ្រប់បែបយ៉ាង រួមទាំងអាយុជីវិត ដើម្បីការពារបូរណភាពទឹកដីនៃមាតុភូមិ ការពារសេចក្តីសុខសាន្តជូនប្រជាជន ។
សម្លេងដើម ឯកឧត្តម សៀង ណាំ (ក្នុងវីដេអូ)
ឯកឧត្តម បានរំលឹកឡើងវិញផងដែរ អំពីប្រវត្តិសាស្ត្រដ៏ជូរចត់នៃកម្ពុជា ។ រដ្ឋប្រហាររបស់លោកសេនាប្រមុខ លន់ ណុល គាំទ្រដោយសហរដ្ឋអាមេរិក ទម្លាក់ព្រះមហាក្សត្រខ្មែរ ( ព្រះបាទនរោត្តម សីហនុ ព្រះបូរមរតនកោដិ ) ចេញពីព្រះរាជបល្ល័ង្គ បាននាំមកនូវមហាវិនាសកម្ម ក្រោមរបបប្រល័យពូជសាសន៍ ប៉ុល ពត ។ ឯកឧត្តម ក៏បានបង្ហាញផងដែរ អំពីគោលជំហរដាច់ខាតរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី ដែលបានអះអាងថា ទោះជាក្នុងតម្លៃណាក៏ដោយ នៅកម្ពុជាមិនអនុញ្ញាតិឲ្យមានប្រវត្តិសាស្ត្រជ្រំដែលនោះឡើយ ដែលទាំងនោះគឺការទប់ស្កាត់ឲ្យបានដាច់ខាត ការវិលត្រឡប់មកវិញនៃរបបប្រល័យពូជសាស្ត្រ និង ការប៉ុនប៉ងធ្វើរដ្ឋប្រហារដណ្តើមអំណាច ទាំងការប្រើប្រាស់រូបភាពនៃការធ្វើបដិវត្តពណ៌ និងបណ្តាគ្រប់រូបភាពផ្សេងៗទៀត ដែលខុសពីគន្លងនៃការអនុវត្តលទ្ធិប្រជាធិបតេយ្យ សេរី ពហុបក្ស និង ការគោរពសិទ្ធិមនុស្ស ដែលមានចែងនៅក្នុងមាត្រានៃរដ្ឋធម្មនុញ្ញ របស់ព្រះរាជាណាចក្រកម្ពុជា ។
គួរបញ្ជាក់ដែរថា ទីបញ្ជាការកងវរៈសេនាតូចលេខ១ ចំណុះតំបន់ប្រតិបត្តិការសឹករងសៀមរាប បច្ចុប្បន្ន សិ្ថតនៅក្នុងភូមិសាស្ត្រស្រុកវារិន ខេត្តសៀមរាប ។ អង្គភាពមួយនេះ កំពុងបំពេញភារកិច្ចត្រៀមអន្តរាគមន៍ ក្នុងភូមិសាស្ត្រទិសទី២ នៃសមរភូមិទិសយោធភូមិភាគទី៤ ។ នៅក្នុងឱកាសជួបសំណេះសំណាលនោះ លើសពីស្បៀងអាហារជាច្រើនមុខនិងថវិកាប្រមាណជាង១០លានរៀលទៀត សម្រាប់ឧបត្ថម្ភឱកាសបុណ្យចូលឆ្នាំខ្មែរប្រពៃណីជាតិ ក្នុងនាមក្រុមសម្ព័ន្ធមេត្រីភាពដែលចំណុះដោយសប្បុរសជន មន្ត្រីរាជការ អាជីវករ ពាណិជ្ជករក្នុងខេត្ត ឯកឧត្តម សៀង ណាំ បានឧបត្ថម្ភបន្ថែម គោយន្តកន្ត្រៃ ១ គ្រឿង និង ធុងទឹកចំណុះ ២ ០០០លីត្រ ចំនួន៣ សម្រាប់បំពេញតម្រូវការក្នុងអង្គភាពនិងត្រៀមអន្តរាគមន៍ ជួយប្រជាពលរដ្ឋក្នុងករណីកង្វះខាតទឹកប្រើប្រាស់ក្នុងរដូវក្តៅនេះ ។ ដោយឡែក អាគារឃ្លាំងសម្ភារៈ១ខ្នងទៀត ទំហំ ៨ម៉ែត្រ គុណនិង ១២ ម៉ែត្រ ឯកឧត្តម ក៏បានអនុញ្ញាតិឲ្យមានការសាសងសង់តាមសំណើរផងដែរ ក្រោមការជួយឧបត្ថម្ភរបស់ក្រុមសម្ព័ន្ធមេត្រីភាព ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
