សម្ព័ន្ធភាពជាតិក្រុមប្រឹក្សាថ្នាក់មូលដ្ឋាន បានរៀបចំសិក្ខាសាលាស្តីពីការលើកកម្ពស់សមត្ថភាពរបស់រដ្ឋបាលមូលដ្ឋាននៅក្នុងមូលដ្ឋាននីយកម្មគោលដៅអភិវឌ្ឍន៍ប្រកបដោយចីរភាព រយៈពេលពីរថ្ងៃ ចាប់ពីថ្ងៃទី៨ដល់ថ្ងៃទី៩ខែមេសាឆ្នាំ២០១៩នៅខេត្តសៀមរាប។
សិក្ខាសាលានេះរៀបចំឡើងក្នុង គោលបំណងលើកកម្ពស់សមត្ថភាព របស់រដ្ឋបាលមូលដ្ឋាន និងសមាគមរដ្ឋបាលមូលដ្ឋាន ក្នុងការសម្រេចបានគោលដៅអភិវឌ្ឍន៍ប្រកបដោយចីរភាព(SDGs) និងជាវេទិកាសម្រាប់សន្ទនាពិគ្រោះយោបល់រវាងតំណាងរដ្ឋាភិបាល និងរដ្ឋបាលមូលដ្ឋាននៅក្នុងមូលដ្ឋាននីយកម្ម(SDGs)។ ជារួម សិក្ខាសាលានេះផ្តល់លទ្ឋភាពចំពោះ ការបកស្រាយ ការកំណត់ទស្សនៈអំពីមូលដ្ឋាននីយកម្ម និងវាយតម្លៃសកម្មភាព ដែលបានអនុវត្តក្នុងរយៈពេលកន្លងមក ព្រមទាំងចែករំលែកការអនុវត្តល្អនៅក្នុងមូលដ្ឋាននីយកម្ម និងការរៀបចំផែនការយុទ្ឋសាស្ត្រជាក់លាក់នៅតាមប្រទេស សម្រាប់រដ្ឋបាលមូលដ្ឋាន និងរដ្ឋបាលតំបន់ ក្នុងការទទួលបានតួនាទីកាន់តែជាក់លាក់ នៅក្នុងមូលដ្ឋាននីយកម្ម(SDGs)។
ឯកឧត្តម សយ កុសល ប្រធានសម្ព័នភាពជាតិក្រុមប្រឹក្សាថ្នាក់មូលដ្ឋាននៃព្រះរាជាណាចក្រកម្ពុជា មានប្រសាសន៍ថាក្នុងគោលដៅអភិវឌ្ឍន៍ប្រកបដោយចីរភាព(SDGs) មានគោលដៅចំនួន១៧ ចំណុចដៅចំនួន១៦៩ និងសូចនាករសម្រាប់ពិនិត្យតាមដានចំនួន២៣២។ ដោយឡែកកម្ពុជា មានគោលដៅចំនួន១៨ ក្នុងនោះគោលដៅចំនួន១៧ ជាគោលដៅសាកល និងគោលដៅចុងក្រោយទី១៨ ជាគោលដៅរបស់ជាតិ ដែលផ្តោតលើការបញ្ចប់ផលប៉ះពាល់ជាអវិជ្ជមានដោយសារគ្រាប់មីន កាកសំណល់សង្គ្រាម និងការលើកកម្ពស់ជំនួយចំពោះជនរងគ្រោះ។
ឯកឧត្តម សយ កុសល បញ្ជាក់ថា៖ដោយយល់ឃើញអំពីការចាំបាច់ក្នុងការអនុវត្តគោលដៅអភិវឌ្ឍន៍ប្រកបដោយចីរភាព(SDGs) សម្ព័ន្ឋភាពជាតិបានផ្តោតការយកចិត្តទុកដាក់ក្នុងការផ្តល់សេវា និង ពង្រឹងសមត្ថភាពបន្ថែម ដើម្បីគាំទ្រដល់ក្រុមប្រឹក្សាមូលដ្ឋាន ក្នុងការអនុវត្ត និងសម្រេចគោលដៅ(SDGs)។ ក្នុងន័យនេះ ការរៀនសូត្រ និងការគាំទ្រដល់ក្រុងស្រុកខណ្ឌ និងឃុំសង្កាត់ ជាសមាជិករបស់យើងក្នុងការអនុវត្តគោលដៅអភិវឌ្ឍន៍ប្រកបដោយចីរភាព(SDGs) និងការពិនិត្យតាមដានការរីកចម្រើនការអនុវត្តនេះ (SDGs) ក៏ជាតម្រូវការខ្ពស់ នៅក្នុងផែនការយុទ្ឋសាស្ត្ររយៈពេល៥ឆ្នាំ(២០១៨-២០២២)របស់សម្ព័នភាពជាតិក្រុមប្រឹក្សាថ្នាក់មូលដ្ឋាននៃកម្ពុជាផងដែរ។
សូមបញ្ជាក់ថា៖សិក្ខាសាលានេះ គាំទ្រពីក្រសួងមហាផ្ទៃ ក្រសួងការបរទេស នៃព្រះរាជាណចក្រកម្ពុជា និងសហការជាមួយសមាគមទីក្រុងនិងរដ្ឋបាលមូលដ្ឋានប្រចាំតំបន់អាស៊ី និងប៉ាស៊ីហ្វិក រួមជាមួយ សហព័ន្ឋទីក្រុងនៃប្រទេសកាណាដានិងអភិបាលកិច្ចមូលដ្ឋាននៅអាស៊ី ដោយមានសិក្ខាកាមចូលរួមមកពីប្រទេស កម្ពុជា ប៉ាគីស្ថាន ហ្វីលីពីន ព្រមទាំងអង្គការដៃគូពាក់ព័ន្ឋនានា និងមាន វាគ្មិនចែករំលែកចំណេះដឹងអំពីដំណើរការនៃការអនុវត្តគោលដៅអភិវឌ្ឍន៍ប្រកបដោយចីរភាព(SDGs)នៅកម្ពុជា ព្រមទាំងមានការចូលរួមមកពីក្រសួងផែនការរបស់កម្ពុជា លោកស្រី ពីទ្រីក អូស្ទែហូប អ្នកពិគ្រោះយោបល់អភិវឌ្ឍន៍ប្រកបដោយចីរភាពមកពីធនាគារអភិវឌ្ឍអាស៊ី អ្នកតំណាងតំបន់ពិសេសនៃក្រសួងផែនការប្រទេសឥណ្ឌូណេស៊ី និងតំណាងសហប្រតិបត្តិសហព័ន្ឋរដ្ឋបាលមូលដ្ឋាននៃប្រទេសស្រីលង្កា ផងដែរ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
