ពុំទាន់មានព័ត៌មានថ្មីបន្ថែមទៀតទេ ដែលបញ្ជាក់ថា ជំងឺប៉េស្តជ្រូកអាហ្វ្រិក បានចូលឆ្លងចូលបណ្ដាខេត្តដទៃទៀត ក្រៅពីខេត្តរតនគិរីឡើយ ប៉ុន្តែមន្ត្រីការិយាល័យផលិតកម្ម និងបសុព្យាបាល នៃមន្ទីរកសិកម្មរុក្ខាប្រមាញ់ និងនេសាទខេត្តសៀមរាប បានចុះត្រួតពិនិត្យកន្លែងងាយប្រឈមឆ្លងជំងឺនេះ យ៉ាងហ្មត់ចត់ក្នុងខេត្តសៀមរាប។
បើតាមការឲ្យដឹងពី លោក យឿន សែ មន្ត្រីការិយាល័យផលិតកម្ម និងបសុព្យាបាល នៃមន្ទីរកសិកម្មរុក្ខាប្រមាញ់ និងនេសាទខេត្តសៀមរាប នៅថ្ងៃទី៨ ខែមេសា ឆ្នាំ២០១៩នេះ ក្រុមការងាររបស់លោក ជារៀងរាល់ថ្ងៃតែងតែចុះអនុវត្តន៍វិធានការណ៍ជីវសុវត្ថិភាពតាមបណ្តាទីសត្តឃាតនានា និងតាមដងផ្លូវក្នុងខេត្តសៀមរាប ដើម្បីទប់ស្កាត់ការរីករាលដាលនៃជំងឺឆ្លងសត្វគ្រប់ប្រភេទ និងធានាបានសុខសុវត្ថិភាពទាំងមនុស្ស និងសត្វ។
បើតាមការបញ្ជាក់ របស់ប្រធានការិយាល័យផលិតកម្ម និងបសុព្យាបាលខេត្តសៀមរាប លោក ព្រំ វិច បានឲ្យដឹងថា ក្រុមការងារបសុសត្វខេត្តសៀមរាប ជំងឺប៉េស្តអាហ្វ្រិក (ASF) បង្កដោយ វីរុស តែវាមិនឆ្លងមកមនុស្សទេ។ ជំងឺនេះមិនមែនជាជំងឺថ្មីទេ វាកើតមានជិត១០០ឆ្នាំមកហើយ ដោយឡែកកាលពីពេលថ្មីៗនេះ ដំបូងវាកើតនៅលើសត្វជ្រូកនៅបណ្ដាប្រទេសអាហ្វ្រិក រាលដាលទៅទ្វីបអឺរ៉ុប ប្រទេសរុស្សី ចិន វៀតណាម និងឆ្លងមកកម្ពុជា កាលចុងខែមីនាឆ្នាំ២០១៩នេះនៅឃុំសោមធំ ស្រុកអូយ៉ាដាវ ខេត្តរតនគិរី ៕
គួររម្លឹកថា យោងតាមប្រកាសលេខ ១៧៣ ប្រក កសក ចុះថ្ងៃទី០២ មេសាឆ្នាំ ២០១៩ របស់ក្រសួងកសិកម្មរុក្ខាប្រមាញ់ និងនេសាទ ស្តីពីការកំណត់តំបន់ផ្ទុះជំងឺប៉េស្តជ្រូកអាហ្វ្រិក មន្ត្រីបច្ចេកទេសនៃអគ្គនាយកដ្ឋានសុខភាពសត្វ និងផលិតកម្មសត្វ សហការជាមួយអាជ្ញាធរខេត្តចុះអនុវត្តការងារបច្ចេកទេសនៅតំបន់ផ្ទុះជំងឺ ដោយបានសម្លាប់សត្វឈឺ សត្វងាប់ដោយជំងឺ ដុតកម្ទេចចោល និងហាមមិនឲ្យទិញ លក់ សម្លាប់ សត្វដែលឈឺឡើយ។ ទន្ទឹមនឹងនោះ ហាមក្រុមឈ្មួញនាំសត្វចេញ ឬឆ្លងកាត់តំបន់ផ្ទុះជំងឺក្នុងរង្វង់២គីឡូម៉ែត្រ។ លើសពីនោះ វិធានការបន្ត ក្រសួងបានផ្សព្វផ្សាយដល់អ្នកចិញ្ចឹមជ្រូក ហាមនាំកាកសំណល់ផ្ទះបាយមកធ្វើជាចំណីជ្រូក ហាមនាំសាច់ជ្រូកពីកន្លែងផ្សេងមកហូបកន្លែងកសិដ្ឋានជ្រ ត្រូវការពារសត្វចង្រៃ ចេញ ចូលកសិដ្ឋាន។ ហាមមិនឲ្យមនុស្សមកពីមជ្ឈដ្ឋានខាងក្រៅចូល ឬទស្សនៈកិច្ចសិក្សា ហាមយកឧបករណ៍ ឬរបស់របរប្រើប្រាស់ផ្ទាល់ចូលក្នុងកសិដ្ឋាន ហាមប្រើមធ្យោបាយដឹកជញ្ជូនចូលក្នុងកសិដ្ឋាន ហាមយកសត្វថ្មីចូលក្នុងកសិដ្ឋាន ហាមយកទឹកខាងក្រៅ/សាធារណៈប្រើប្រាស់ក្នុងកសិដ្ឋាន ហាមលក់ ឬនាំសត្វឈឺចេញពីកសិដ្ឋាន និងហាមអ្នកថែទាំជ្រូកចេញ ចូលកសិដ្ឋានត្រូវឆ្លងកាត់កន្លែងសម្លាប់មេរោគ។
អត្ថបទ និង រូបថត ៖ លោក ជា ស្រស់ និង លោក ខេង ឧត្តម
កែសម្រួលអត្ថបទ ៖ លោក សេង ផល្លី
