កាលពីថ្ងៃទី០៨ ខែមេសា ឆ្នាំ២០១៩ម្សិលមិញនេះ លោកវរៈសេនីយ៍ឯក ជិម សុវណ្ណ នាយការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប បានដឹកនាំមន្ត្រីក្រោមឱវាទចំនួន១០០នាក់ បានបរិច្ចាកឈាមជូនដល់មជ្ឈមណ្ឌលផ្តល់ឈាម នៃមន្ទីរពេទ្យបង្អែកខេត្តសៀមរាប សម្រាប់ប្រើប្រាស់ក្នុងការជួយសង្គ្រោះជនរងគ្រោះ និងព្យាបាលអ្នកជំងឺដែលត្រូវការឈាម ។
លោកវរៈសេនីយឯក ជិម សុវណ្ណ មានប្រសាសន៍ថា ថ្វីត្បិតតែនេះជាលើកទីមួយសម្រាប់អង្គភាពរបស់លោក ក្នុងការស្ម័គ្រចិត្តបរិច្ចាកឈាមជូនដល់មន្ទីរពេទ្យបង្អែកខេត្តក៏ពិតមែន តែសកម្មភាពនេះ បានបង្ហាញឱ្យឃើញពីស្មារតីសាមគ្គី និងបង្ហាញ ពីទឹកចិត្តសប្បុរសធម៌ ចេះជួយយកអាសារគ្នាទៅវិញទៅមក ហើយការបរិច្ចាកដោយស្ម័គ្រចិត្តនេះ គឺជាស្មារតីភ្ញាក់រលឹក ដើម្បីផ្តល់លទ្ឋភាពដល់មន្ទីរពេទ្យយកឈាមទៅប្រើប្រាស់តាមតម្រូវ ការ ព្រោះយល់ឃើញថាអ្នករងគ្រោះដោយគ្រោះថ្នាក់ និងឧបទ្ទវហេតុផ្សេងៗកន្លងមក ជួបប្រឈមទៅនឹងកង្វះឈាមហើយពុំមានលទ្ឋភាព ដូច្នេះហើយទើបមន្ត្រីនរគនរបាលចរាចរណ៍ក្នុងខេត្តស្ទើរតែទាំងអស់ បានស្ម័គ្រចិត្តបរិច្ចាកឈាម សម្រាប់អ្នករងគ្រោះនិងអ្នកជំងឺ គាត់អាចប្រើប្រាស់ឈាមពួកខ្ញុំទៅ តាមតម្រូវការជាក់ស្តែងនិងទៅតាមវេជ្ជបញ្ជាពីក្រុមគ្រូពេទ្យ ។
លោក ជិម សុវណ្ណ មានប្រសាសន៍ទៀតថា បច្ចុប្បន្ននេះ កម្លាំងនគរបាលចរាចរណ៍ផ្លូវគោកខេត្ត ក្រៅពីភារកិច្ចស្នូលក្នុងការ ជួយសម្រួលចរាចរណ៍តាមដងផ្លូវបញ្ចៀសការកកស្ទះជូនដល់ បងប្អូនប្រជាពលរដ្ឋ ដែលមិនគិតពីការហត់នឿយ ទោះយប់ក្តី ថ្ងៃក្តៅក្តីក៏ដោយ ក៏កម្លាំងយើងតែងតែជួយសហការគ្រប់ការ ងារ ដូច្នេះតាមរយៈនេះ សូមសំណូមពរដល់អ្នកប្រើប្រាស់ផ្លូវថ្នល់ទាំងអស់ សូមបើកបរដោយការប្រុងប្រយ័ត្ន ប្រើប្រាស់មួកសុវត្ថិភាពពេលបើកបរម៉ូតូ ដាក់ខ្សែក្រវ៉ាត់សុវត្ថិភាពក្នុងពេលបើកបររថយន្តឱ្យបានត្រឹមត្រូវ និងចូលរួមគោរពច្បាប់ចរាចរណ៍ ផ្លូវគោកទាំងអស់គ្នា ។
មានប្រសាសន៍ក្នុងឱកាសនោះដែរ លោក ប៉ែន ផលគុណ ប្រធានមន្ទីរពេទ្យបង្អែកខេត្តសៀមរាប បានសម្ដែងនូវអំណរគុណយ៉ាងក្រៃលែង ចំពោះស្មារតីលះបង់របស់កម្លាំងនគរបាលចរាចរណ៍ផ្លូវគោកខេត្តសៀមរាប ពិតជាបានរួមចំណែកក្នុងការជួយសង្គ្រោះជីវិតមនុស្សដែលត្រូវការឈាម បានមួយចំណែកជាពិសេសអ្នករងគ្រោះដោយសារគ្រោះថ្នាក់ចរាចរណ៍ និងឧបទ្ទវហេតុផ្សេងៗ និងស្ត្រីឆ្លងទន្លេដែលហូរឈាមច្រើន ហើយត្រូវការឈាមដើម្បីជួយសង្គ្រោះជីវិតខណៈដែលមន្ទីរពេទ្យបង្អែកខេត្ត ក្នុងមួយឆ្នាំៗ បានប្រើប្រាស់ឈាម ក្នុងការសង្គ្រោះអាយុជីវិតអ្នករងគ្រោះ និងព្យាបាលអ្នកជំងឺផ្សេងៗ ប្រមាណជិត៣ពាន់ប្លោក ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
