ក្រសួងទេសចរណ៍ មានគម្រោងចង់បង្កើត ដំណើរផ្សងព្រេង នៅលើភ្នំគូលេន ស្ថិតក្នុងស្រុកស្វាយលើ ខេត្តសៀមរាប ដើម្បីទាក់ទាញភ្ញៀវទេសចរអន្តរជាតិ ឲ្យចំណាយពេលស្នាក់នៅបានយូរ និងបង្កើនការចំណាយក្នុងប្រទេសកម្ពុជាកាន់តែច្រើន។
នៅក្នុងកិច្ចប្រជុំការងារ ក្នុងវិស័យទេសចរណ៍ប្រចាំត្រីមាសទី១ ឆ្នាំ២០១៩ របស់មន្ទីរទេសចរណ៍ខេត្តសៀមរាប នៅព្រឹកថ្ងៃទី០៨ ខែមេសា ឆ្នាំ២០១៩នេះ លោក ជុក ជំនោរ ប្រធាននាយកដ្ឋានអភិវឌ្ឍន៍ផលិតផលទេសចរណ៍ នៃក្រសួងទេសចរណ៍ បានឱ្យដឹងថា នៅក្នុងខេត្តសៀមរាបនេះ ផលិតផលទេសចរណ៍ ក្រៅពីប្រាសាទអង្គរវត្ត មានដូចជា សហគមន៍ទេសចរណ៍កំពង់ភ្លុក សហគមន៍ទេសចរណ៍បឹងពារាំង សហគមន៍ទេសចរណ៍កំពង់ឃ្លាំង ភូមិធម្មជាតិរុនតាឯក ជាដើម សុទ្ធសឹងតែជាកញ្ចប់ផលិតផលទេសចរណ៍ល្អៗ ។ ប៉ុន្តែលោកថា នៅក្នុងខេត្តសៀមរាប កំពុងខ្វះផលិតផលទេសចរណ៍ សម្រាប់អ្នកចូលចិត្តដើរផ្សងព្រេង។
បើតាមលោក ជុក ជំនោរ បានឲ្យដឹងថា កន្លងមក នៅកម្ពុជា អ្នកទេសចរដែលមានចំណូលចិត្តដំណើរកម្សាន្តបែបផ្សងព្រេងនៅតាមព្រៃភ្នំតែងតែនាំគ្នា ទៅកម្សាន្តនៅភ្នំឱរ៉ាល់។ ប៉ុន្តែឥឡូវនេះក្រសួងទេសចរណ៍ មានគម្រោងបង្កើតឱ្យមានដំណើរកម្សាន្តបែបផ្សងព្រេងនេះ នៅភ្នំគូលេន ខេត្តសៀមរាបបន្ថែមទៀត ព្រោះថា វាជាទីតាំងមួយដ៏ល្អសម្រាប់អ្នកទេសចរក្នុងការចំណាយពេលវេលា និងថវិកា មកកម្សាន្តនៅខេត្តសៀមរាប ដែលរួមមានទាំងការទស្សនាប្រាសាទបុរាណ តំបន់ទេសចរណ៍ធម្មជាតិ ទេសចរណ៍សហគមន៍ និងដំណើរកម្សាន្តបែបផ្សងព្រេងនៅក្នុងព្រៃភ្នំគូលេន ដែលទីនេះធ្លាប់ជាអតីតរាជធានីខ្មែរ មានប្រាសាទ និងសំណល់ប្រវត្តិសាស្ត្រផ្សេងៗនៅសល់ក្នុងព្រៃនេះ ហើយយើងមិនទាន់បានជួប។
ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍ថា វិស័យសាធារណៈ និងវិស័យឯកជនក្នុងវិស័យទេសចរណ៍ ត្រូវរួមគ្នាបង្កើតផលិតផលទេសចរណ៍ និងរមណីយដ្ឋានទេសចរណ៍ធម្មជាតិបន្ថែមទៀត ដើម្បីបំពេញចំណាប់អារម្មណ៍ និងតម្រូវការកម្សាន្តរបស់ភ្ញៀវទេសចរអន្តរជាតិ ធ្វើយ៉ាងណាឱ្យភ្ញៀវទេសចរដែលមកទស្សនាកម្ពុជា មានឱកាសស្នាក់នៅយូរថ្ងៃ និងចាយច្រើន។ ជាមួយនេះ ប្រតិបត្តិករទេសចរណ៍ទាំងអស់ត្រូវបង្កើនការផ្តល់សេវាជូនភ្ញៀវទេសប្រកបដោយគុណភាពខ្ពស់។
ឯកឧត្តមរដ្ឋមន្ត្រី ក៏បានណែនាំឱ្យមន្ទីរទេសចរណ៍ខេត្តសៀមរាប ត្រូវទប់ស្កាត់ការឡើងថ្លៃហួសហេតុពេកក្នុងឱកាសបុណ្យចូលឆ្នាំថ្មី ដោយត្រូវបញ្ជ្រាបឱ្យម្ចាស់មូលដ្ឋានអាជីវកម្មទេសចរណ៍ទាំងអស់ ដាក់បង្ហាញតារាងតម្លៃលើមុខទំនិញ-សេវាកម្មរបស់ខ្លួនឲ្យបានត្រឹមត្រូវ និងអាចទទួលយកបាន៕
អត្ថបទ និង រូបថត ៖ លោក ជា ស្រស់ និង លោក ខេង ឧត្តម
កែសម្រួលអត្ថបទ ៖ លោក សេង ផល្លី
