នារសៀល ថ្ងៃទី០៩ ខែមសា ឆ្នាំ២០១៩នេះ នៅមន្ទ្ទីរព័ត៌មានខេត្តសៀមរាប បានកិច្ចប្រជុំមួយ ដើម្បីបូកសរុបលទ្ធផលការងារប្រចាំត្រីមាសទី១ និងលើកទិសដៅបន្តសម្រាប់ការ អនុវត្តត្រីមាសទី២ ឆ្នាំ២០១៩ របស់មន្ទីរ ក្រោមការដឹកនាំរបស់លោក លីវ សុខុន ប្រធានមន្ទីរព័ត៌មានខេត្តសៀមរាប។
លោក លីវ សុខុន មានប្រសាសន៍ថា គោលបំណងសំខាន់នៃកិច្ចប្រជុំ ក្រៅពីការផ្សព្វផ្សាយនូវលទ្ធផលការងារដែលសម្រេចបានក្នុងរយៈពេលត្រីមាសទី១ កន្លងមកនេះ គឺនឹងធ្វើការប្រមូលយកនូវមតិយោបល់ កសាងវិធីសាស្ត្របន្ថែម ដើម្បីជំរុញឲ្យមានការអភិវឌ្ឍថ្មីលើវិស័យព័ត៌មាន រួមទាំងបញ្ហាប្រឈមនានាផងដែរ ដើម្បីស្វែងរកដំណោះស្រាយ ជំរុញល្បឿននៃការផ្សព្វផ្សាយ រហ័សទាន់ហេតុការណ៍ និងមានគុណភាព ជាប្រភពនៃជំនឿទុកចិត្តរបស់អ្នកអាន អ្នកស្តាប់ និង ទូរទស្សនិកជន ។
លោក លីវ សុខុន មានប្រសាសន៍ទៀតថា ថ្វីត្បិតតែលទ្ធផលការងារ ដែលយើងទាំងអស់គ្នាសម្រេចបានរយៈពេលកន្លងមក ទទួលបានការគាំទ្រពីសំណាក់ថ្នាក់ដឹកនាំក្រសួង ព័ត៌មាន ថ្នាក់ដឹកនាំខេត្ត និង ថ្នាក់ដឹកនាំនៃបណ្ដាមន្ទីរនានាមួយចំនួនក្នុងខេត្ត សៀមរាបក៏ពិតមែន ប៉ុន្តែយើងត្រូវប្រឹងប្រែងបំពេញ ការងារតាមតួនាទី និង ភារកិច្ចរបស់ខ្លួនម្នាក់ៗ ឲ្យសម្រេចបានជោគជ័យថ្មីៗ បន្ថែមទៀត ដើម្បីឆ្លើយតបទៅនឹង ការអភិវឌ្ឍរបស់ខេត្ត និង ប្រទេសជាតិ នាសម័យបច្ចេកវិទ្យាទំនើប ស្របតាមទិសស្លោករបស់ក្រសួងព័ត៌មាន គឺ លឿន ប្លែក ទុកចិត្តបាន ទីណា និង ពេលណាក៏បាន ៕
ព័ត៌មានជាតិ ថ្មីៗ
