នៅព្រឹកថ្ងៃទី ០៩ ខែ មេសា ឆ្នាំ២០១៩ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានអនុញ្ញាតឲ្យប្រតិភូសហគ្រិនវ័យក្មេង ដឹកនាំដោយលោក ឡាយ គឹមសួ ប្រធានសហគ្រិនវ័យក្មេងកម្ពុជាខេត្តសៀមរាប ចូល ជួបសម្តែងការគួរសម ដើម្បីទទួលបានអនុសាសន៍ បច្ចេកទេសមួយចំនួន ជាមូលដ្ឋានគ្រឹះសម្រាប់សហគ្រិនវ័យក្មេងយកទៅអនុវត្ត ព្រមទាំងបានធ្វើការបង្ហាញអំពីគម្រោង ផែនការគោលរបស់សហគ្រិនវ័យក្មេង សម្រាប់ទៅថ្ងៃអនាគតផងដែរ ។
លោក ឡាយ គឹមសួ បង្ហាញថា យុវជនបច្ចុប្បន្ន នៅមានកង្វះខាតទៅលើចំណេះដឹង និងធនធានដើម្បីបង្កើត និងពង្រឹងមុខជំនួញរបស់ខ្លួន។ នៅក្នុងជំនួបពិភាក្សានោះ ប្រតិភូសហគ្រិនវ័យក្មេង បានចាប់អារម្មណ៍ទៅលើវិស័យទេសចរណ៍ក្នុងខេត្តសៀមរាប ដែលខេត្តមួយនេះ បានទាកទាញភ្ញៀវទេសចរណ៍ជាតិ និងអន្តរជាតិជាច្រើនលាននាក់ មកទស្សនារមណីយដ្ឋានធម្មជាតិ ប្រវត្តិសាស្ត្រ និងកែច្នៃ មួយវិញទៀតវិស័យកសិកម្ម ប្រជាពលរដ្ឋ ក្នុងខេត្តសៀមរាបប្រមាណ ៨២%ជាកសិករ។
លោក ឡាយ គឹមសួ បានបន្តថា ចំពោះហេដ្ឋរចនាសម្ព័ន្ធក្នុងក្រុង កាន់តែល្អប្រសើរ ដែលរួមមាន អគារ ផ្សារទំនើបជាច្រើនកន្លែង និងសណ្ឋាគារ ផ្ទះសំណាក់តូចធំ ដែលការអភិវឌ្ឍទាំងនេះបាននឹងកំពុងធ្វើឲ្យខេត្តសៀមរាប រឹតតែមានការចាប់អារម្មណ៍ជាពិសេសលើវិស័យទេសចរណ៍ក្នុងខេត្តនេះតែម្ដង។
មានប្រសាសន៍នាឱកាសនោះ ឯកឧត្តម ទៀ សីហា ក៏បានកោតសរសើរពីភាពវ័យឆ្លាតរបស់សហគ្រិនវ័យក្មេងកម្ពុជា ដែល តែងតែសិក្សាទៅលើការអភិវឌ្ឍថ្មីៗ របស់រាជរដ្ឋាភិបាល ក៏ដូចជារបស់អាជ្ញាធរខេត្ត ដើម្បីកសាងអនាគតដល់យុវជនកម្ពុជា ។
ឯកឧត្តមក៏បានលើកផងដែរ អំពីគោលដៅរបស់ រាជរដ្ឋាភិបាលកម្ពុជា ដែលមានក្រសួងទេសចរណ៍ជាសេនាធិការ នៅពេលខាងមុខនេះ ខេត្តសៀមរាប នឹងធ្វើការពង្រីកបន្ថែម នូវវិសាលភាពលើវិស័យទេសចរណ៍ នៅតាមតំបន់សំខាន់ជាច្រើន ក្នុងនោះភ្នំគូលែន ដែក៏នឹងក្លាយជាតំបន់មានសក្តានុពល ជា «តំបន់ទេសចរណ៍វប្បធម៌ ប្រវត្តិសាស្ត្រ និងធម្មជាតិ» រួមទាំង«ទេសចរណ៍បែបផ្សងព្រេង» ដ៏ទាក់ទាញថ្មីមួយទៀតនៅខេត្តសៀមរាប-អង្គរ ដើម្បីបំពេញតម្រូវការជូនភ្ញៀវទេសចរជាតិ-អន្តរជាតិ និង ដើម្បីចូលរួមអនុវត្តនូវយុទ្ធសាស្ត្ររបស់រាជរដ្ឋាភិបាល ដែលតែងតែជម្រុញឲ្យមានការបង្កើតផលិតផលទេសចរណ៍ថ្មីៗបន្ថែម ។
ជាមួយនឹងការខិតខំប្រឹងប្រែងក្នុងការអភិវឌ្ឍន៍នេះដែរ ឯកឧត្តមបានបន្តថា បច្ចុប្បន្ននេះ ខេត្តបានកំពុងបើកយុទ្ធនាការធ្វើការដាំដុះកូនឈើឡើងវិញ នៅតាមតំបន់ដីរបស់រដ្ឋ ដែលរងការកាប់បំផ្លាញ ដោយមានកិច្ចសហការជាមួយមន្ទីរបរិស្ថាន សហភាពសហព័ន្ធយុវជនកម្ពុជាខេត្ត រួមទាំងថ្នាក់ដឹកនាំ មន្ត្រីរាជការ កងកម្លាំង ប្រដាប់អាវុធ និង សិស្សានុសិស្ស រួមទាំងប្រជាពលរដ្ឋ ដើម្បីជាការរំលឹកពញាក់ស្មារតីបងប្អូន អំពីការបាត់បង់ព្រៃឈើ តើយើង ទទួលរងគ្រោះអី្វខ្លះពីធម្មជាតិវិញ ហើយការដាំដុះកូនឈើឡើងវិញ យើងនឹងទទួលបានអត្ថប្រយោជន៍ធំធេង តាមរយៈវិស័យ ទេសចរណ៍ គឺជាតំបន់ទេសចរណ៍មាសបៃតង ។
ក្នុងនោះឯកឧត្តមក៏បានបញ្ជាក់ ពីការយកចិត្តរបស់អាជ្ញាធរខេត្ត លើការងារ សន្តិសុខ សណ្តាប់ធ្នាប់ខ្ពស់ ដោយខេត្តសៀមរាប ជាកន្លែងប្រមូលផ្តុំចំពោះគណៈប្រតិភូជាន់ខ្ពស់ ថ្នាក់ជាតិ អន្តរជាតិ ចូលរួម កិច្ចប្រជុំ រួមទាំងការងារចរាចរណ៍ ដែលជាចំណោទបញ្ហា ដែលខេត្តបានកំពុងដោះស្រាយ ដោយក្រុងសៀមរាបជាក្រុងបុរាណកាលដែលមានផ្លូវតូចៗ ហើយខេត្តបានកំពុងធ្វើការពង្រីក និង កែលម្អផ្លូវមួយចំនួន ក្នុងការរំដោះភាពកកស្ទះចរាចរណ៍នៅក្នុង ក្រុង ។ ឯកឧត្តមក៏បានសំណូមពរដល់ សហគ្រិនវ័យក្មេង ត្រូវយកចិត្តទុកដាក់ចំពោះវិស័យកសិកម្ម ដើម្បីធ្វើការស្វែងរកនូវ ទីផ្សារ សម្រាប់បងប្អូនប្រជាកសិករខ្មែរយើង ក្នុងការលើកកម្ពស់ដល់ផលិតផលក្នុងស្រុកផងដែរ ៕
អត្ថបទ និង រូបថត ៖ លោក គឿនវេត
កែសម្រួលអត្ថបទ ៖ លោក សេង ផល្លី
