នៅព្រឹកថ្ងៃទី០៨ ខែមេសា ឆ្នាំ២០១៩ម្សិលមិញ នេះ លោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាក បាទក្រហមកម្ពុជាខេត្តសៀមរាប និងជាតំណាងឯកឧត្តម ទៀ សីហា ប្រធានគណៈកម្មាធិការសាខា បានទទួលស្វាគមន៍ និង សំណេះសំណាលជាមួយគណៈប្រតិភូកាកបាទក្រហមកូរ៉េ ស្រុក ជុងជូ រដ្ឋធានីសេអ៊ូល នៃសាធារណរដ្ឋកូរ៉េ ដែលដឹកនាំដោយ លោកស្រី Kim Young Sok នៅសាលប្រជុំទីស្នាក់ការសាខាកាកបាទក្រហមកម្ពុជា ខេត្តសៀមរាប។
មានប្រសាសន៍ក្នុងឱកាសនោះ លោកជំទាវ ទាង អេង ទៀសីហា បានពាំនាំប្រសាសន៍ផ្ដាំផ្ញើរបស់ឯកឧត្តមប្រធានគណៈ កម្មាធិការសាខា ដែលឯកឧត្តមមិនបានមកទទួលផ្ទាល់នាពេលនេះ ហើយក្នុងនាមគណៈកម្មាធិការសាខា លោកជំទាវសូមសម្តែងនូវកិច្ចស្វាគមន៍យ៉ាងកក់ក្តៅចំពោះដំណើរទស្សនកិច្ចរបស់គណៈ ប្រតិភូកាកបាទក្រហមកូរ៉េ មកកាន់ខេត្តសៀមរាបនាពេលនេះ ហើយក្រោមមគ្គុទេសក៍ដឹកនាំដ៏ឈ្លាសវៃរបស់សម្តេចកិត្តិព្រឹទ្ធ បណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សាខា កាកបាទក្រហមកម្ពុជាខេត្តសៀមរាប បានបំពេញតួនាទី ជាជំនួយការឱ្យអាជ្ញាធរសាធារណៈលើវិស័យមនុស្សធម៌ បានរួមចំណែកអនុវត្តយុទ្ធសាស្ត្រ២០១១-២០២០ របស់កាកបាទក្រហមកម្ពុជា គឺរួមចំណែកពន្លឿន ការកាត់បន្ថយភាពក្រីក្រ ការពារសេចក្តីថ្លៃថ្នូររបស់មនុស្សជាតិ និងការពារតម្លៃមនុស្សធម៌របស់ជនងាយរងគ្រោះ ។
លោកជំទាវ ទាង អេង ទៀសីហា មានប្រសាសន៍ទៀតថា ដើម្បីអនុវត្តទិសដៅសកម្មភាពដែលមហាសន្និបាតកាកបាទក្រហមកម្ពុជាអាណត្តិទី៦បានដាក់ចេញនេះ សាខាកាកបាទក្រហមកម្ពុជាខេត្តសៀមរាប បន្តរួមគ្នាធ្វើសកម្មភាពមនុស្សធម៌ក្នុងខេត្ត ឲ្យមានដំណើរការកាត់តែរលូន និង មានប្រសិទ្ធភាព គឺរួមចំណែកពន្លឿនកាត់បន្ថយភាពក្រីក្រ , ការពារសេចក្ដីថ្លៃថ្នូររបស់មនុស្សជាតិ និងការពារតម្លៃមនុស្សធម៌របស់ជនរងគ្រោះ ក៏ដូចជាបេសកកម្ម ជាសមាគមជាតិនាំមុខគេក្នុងវិស័យមនុស្សធម៌ កាកបាទក្រហមកម្ពុជា ប្រមូលផ្ដុំកម្លាំងមនុស្សធម៌ ដើម្បីបន្តជួយដល់ជនរងគ្រោះបំផុត តាមរយ:ការគ្រប់គ្រងគ្រោះមហន្តរាយ , សុខភាព និងការថែទាំសុខភាពក្នុង សហគមន៍ , ការលើកកម្ពស់គោលការណ៍គ្រឹះ និងតម្លៃមនុស្សធម៌របស់ចលនា និង ការអភិវឌ្ឍស្ថាប័ន និងអភិវឌ្ឍធនធាន ។
នាឱកាសនេះដែរ លោកស្រី Kim Young Sokក៏បានថ្លែងអំណរគុណយ៉ាងជ្រាលជ្រៅចំពោះសាខាកាកបាទក្រហមកម្ពុជា ខេត្តសៀមរាប ដែលបានទទួលស្វាគមន៍យ៉ាងកក់ក្តៅ និងចែក រំលែកបទពិសោធន៍ល្អៗជាច្រើន សម្រាប់អនុវត្តន៍ការងារមនុស្សធម៌ តាមស្ថានភាពភូមិសាស្ត្រ ប្រជាសាស្ត្រ និង វប្បធម៌ ស្របតាមគោលការណ៍គ្រឹះរបស់ចលនាអន្តរជាតិកាកបាទក្រហម អឌ្ឍចន្ទក្រហម ដើម្បីផ្តល់សេវាកម្មមនុស្សធម៌ដល់ ជនរងគ្រោះ និង ជនងាយរងគ្រោះទាំងឡាយ ហើយលោកស្រីនឹងជួយផ្សព្វ ផ្សាយសកម្មភាពដ៏ប្រពៃនេះ ដើម្បីជូនដល់ប្រជាជនកូរ៉េ នៅក្នុងភូមិសាស្ត្រនៃស្រុកជុងជូផងដែរ ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
