នៅសាលប្រជុំសាលាខេត្តសៀមរាប នាព្រឹកថ្ងៃទី០៨ ខែ មេសា ឆ្នាំ២០១៩នេះ មានការបើកកិច្ចប្រជុំបូកសរុបលទ្ធផលការងារទេសចរណ៍ ប្រចាំត្រីមាសទី១ និង លើកទិសដៅអនុវត្តបន្តត្រីមាសទី២ ឆ្នាំ២០១៩ របស់មន្ទីរទេសចរណ៍ខេត្តសៀមរាបក្រោមកិច្ចដឹកនាំប្រជុំរបស់ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និង ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប។
កិច្ចប្រជុំនេះធ្វើឡើង ក្នុងគោលបំណងពិនិត្យពីវឌ្ឍនភាពការងារ និង បញ្ហាប្រឈម និង ដើម្បីចូលរួមចលនាប្រឡងប្រណាំង ទីក្រុងស្អាតរបស់បេក្ខភាពក្រុងសៀមរាប និង ការគ្រប់គ្រងសំណល់រឹង និង រាវ ព្រមទាំងផែនការអភិវឌ្ឍន៍ហេដ្ឋារចនាសម្ព័ន្ធ ផ្លូវ ថ្នល់ក្នុងក្រុង និង ការរៀបចំវិថីលក់ម្ហូបអាហារផងដែរ ។
ក្នុងកិច្ចស្វាគមន៍របស់ឯកឧត្តម ទៀ សីហា បានលើកថាការអភិវឌ្ឍន័វិស័យទេសចរណ៍ក្នុងខេត្តសៀមរាប គឺជាត្រីវិស័យមួយចង្អុលបង្ហាញលើការអនុវត្តការងារ ប្រកបទៅដោយប្រសិទ្ធភាព និរន្តភាព ដើម្បីប្រែក្លាយខេត្តសៀមរាប ទៅជាគោលដៅទេសចរណ៍ដ៏ពេញនិយមជាងគេ សម្រាប់ភ្ញៀវទេសចរជាតិ-អន្តរជាតិ ដែលជាតំបន់សំបូរទៅដោយសម្បត្តិបេតិកភណ្ឌ និង រមណីយដ្ឋានធម្មជាតិ ។
មានប្រសាសន៍ក្នុងឱកាសនោះដែរ ឯកឧត្តមបណ្ឌិត ថោង ខុន បានធ្វើការកោតសរសើរផងដែរ ដល់អង្គភាពរដ្ឋ និងវិស័យឯកជន ដែលបានយកចិត្តទុកដាក់លើវិស័យទេសចរណ៍នៅកម្ពុជា ជាពិសេសការអភិវឌ្ឍន៍វិស័យទេចរណ៍ និងគោលដៅទេសចរសំខាន់ៗ នៅក្នុងខេត្តសៀមរាប ។
ឯកឧត្តម បានគូសបញ្ជាក់ថា គោលដៅទេសចរណ៍ក្នុងខេត្តសៀមរាប បានស្រូបយកភ្ញៀវទេសចរអន្តរជាតិបានយ៉ាងច្រើនក្នុងមួយឆ្នាំៗ ប្រមាណ៤០% នៃភ្ញៀវទេសចរសរុបទូទាំងប្រទេស ។
ឯកឧត្តមបានបន្តទៀតថា កិច្ចប្រជុំនេះ គឺធ្វើការពិនិត្យនូវវឌ្ឍនភាពប្រចាំត្រីមាស ដោយលើកឡើងពីភាពរីកចម្រើន និង បញ្ហាប្រឈម ព្រមទាំងដំណោះស្រាយមួយចំនួនក្នុងគោលដៅ ធ្វើយ៉ាងណារក្សាឲ្យបាននូវខេត្តសៀមរាប ឲ្យនៅតែជាគោលដៅចំបងរបស់ភ្ញៀវទេសចរនៅទូទាំងពិភពលោក ។
តាមរបាយការណ៍បញ្ជាក់របស់លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានឲ្យដឹងអំពីស្ថានភាពភ្ញៀវទេសចរជាតិ ក្នុងត្រីមាសទី១ ឆ្នាំ២០១៩នេះថា មានចំនួន ១លាន១៦៨ពាន់៦៦នាក់ ថយចុះ៦.២៥ភាគរយ ។ ក្នុងនោះភ្ញៀវទេសចរអន្តរជាតិ មានចំនួន ៧៨៧ពាន់៩០០នាក់ ថយចុះ ៨.២៣ភាគរយ ក្នុងរយៈពេលដូចគ្នាធៀបនឹងឆ្នាំ២០១៨ ។
អត្តបទ៖គឿនវេត
