លោក នាក់ ណេរ៉ុន អភិបាលរងខេត្តសៀមរាប បានលើកឡើងថា តាមរយៈការស្ទង់មតិរបស់យុវជនខេត្តសៀមរាប គាំទ្រដោយ វិទ្យាស្ថានតស៊ូមតិ និងគោលនយោបាយ ស្ដីអំពី “យុវជន និងព័ត៌មានការងារ ក្នុងខេត្តសៀមរាប” ដែលបានបង្ហាញថា យុវជនក្នុងខេត្តមួយនេះ ទទួលបានព័ត៌មានអំពីឱកាសទទួលបានការងារ នៅមានកម្រិតទាបពីស្ថាប័នរដ្ឋ គឺនៅមិនទាន់ស្រង់មតិបានគ្រប់ជ្រុងជ្រោយ និងគ្រប់ភាគីនៅឡើយទេ។
នេះបើតាមប្រសាសន៍របស់លោក ក្នុងឱកាសបើកវេទិកា កិច្ចសន្ទនាគោលនយោបាយ ស្តីពីយុវជននិងការងារព័ត៌មាន នៅខេត្តសៀមរាប នាព្រឹកថ្ងៃទី០៤ ខែមេសា ឆ្នាំ២០១៩នេះ ដែលរៀបចំឡើងដោយ វិទ្យាស្ថានតស៊ូមតិ និងគោលនយោបាយ គាំទ្រដោយ UNDP។
សូមបញ្ជាក់ថា ក្នុងបទបង្ហាញនៃវេទិកានេះ បានលើកយកលទ្ឋផលនៃការស្រាវជ្រាវរយៈពេលពីរខែ គឺខែកុម្ភៈនិងខែមីនា ឆ្នាំ២០១៩ របស់ក្រុមយុវជនខេត្តសៀមរាប តាមរយៈការស្ទង់មតិពីយុវជនចំនួន១៣៤នាក់នៅខេត្តសៀមរាប គឺមានយុវជនចំនួនតែ៤៩នាក់ប៉ុណ្ណោះ ដែលថាបានដឹងពីកន្លែងផ្តល់ព័ត៌មានការងារ និង មានយុវជនច្រើនលើសលប់ ទទួលបានព័ត៌មានអំពីការងារតាមរយៈបណ្តាញទំនាក់ទំនងសង្គមនិងមិត្តភក្តិ ហើយក្នុងចំណោមយុវជនចំនួន១៣៤នាក់ដដែលនោះ មានយុវជនចំនួន១០១នាក់ មិនធ្លាប់បានចូលរួមជជែក និងពិភាក្សាអំពីគោលនយោបាយនានា ទាក់ទងទៅនឹងយុវជននិងការងារឡើយ។
ទាក់ទងនឹងការងារជាមួយយុវជន លោក នាក់ ណេរ៉ុន លើកឡើងថា តាមរយៈបទពិសោធរបស់លោក អតីតជាអភិបាលស្រុកស្រីស្នំនាពេលកន្លងមក យុវជនមួយចំនួននៅពេល ដែលទៅសួរព័ត៌មានអំពីការជ្រើសរើស និងស្វែងរកការងារនៅតាមសាលាឃុំ សាលាស្រុក ពួកគាត់ចាប់អារម្មណ៍តែប្រាក់បៀរវត្ស និងតួនាទី រីឯការងារតូចតាច ឬការងារស្ម័គ្រចិត្ត ពួកគាត់មិនមកដាក់ពាក្យឡើយ។ មួយវិញទៀត ការបណ្ដុះបណ្ដាលអំពីវិជ្ជាជីវៈដោយឥតគិតថ្លៃ ក្នុងខេត្តសៀមរាប បានផ្សព្វផ្សាយជារៀងរាល់ថ្ងៃតាមបណ្ដាយសង្គម និងវិទ្យុជាតិខេត្តសៀមរាប ដើម្បីផ្ដល់ឱកាសដល់យុវជន ដែលមានកម្រិតវប្បធម៌ទាប រហូតដល់ខ្ពស់ មានជំនាញ ងាយស្រួលរកការងារធ្វើ និងទទួលបានប្រាក់កម្រៃសមរម្យ។ ផ្ទុយទៅវិញ យុវជនមួយចំនួនជ្រើសយកមុខវិជ្ជាសិក្សាតាមគ្នា ដោយមិនខ្វល់ពីទីផ្សារការងារបន្ទាប់ពីបញ្ចប់ការសិក្សា និងមួយចំនួនទៀតជ្រើសយកមុខវិជ្ជាសិក្សាលើសពីសមត្ថភាពរបស់ខ្លួន។
លោក នាក់ ណេរ៉ុន បានបញ្ជាក់ថា ការងារតូចតាច ការងាររយៈពេលខ្លី ឬការងារស្ម័គ្រចិត្ត គឺជាមូលដ្ឋាន នាំទៅកាន់ភាពរឹងមាំ និងមានបទពិសោធន៍ សម្រាប់ឈានឆ្ពោះទៅរកការងារសមរម្យ ស្របតាមបំណងប្រាថ្នារបស់ពួកគាត់ ដូច្នេះតាមរយៈនេះ សូមស្នើឲ្យក្រុមយុវជននៃវិទ្យាស្ថានតស៊ូមតិ និងគោលនយោបាយ និងក្រុមយុវជនខេត្តសៀមរាប ត្រូវស្វែងរកបន្ថែមនូវធាតុចូល ដែលផ្តល់ដោយអាជ្ញាធរ និងមន្ត្រីជំនាញពាក់ព័ន្ធ ដើម្បីសំយោគបញ្ហាប្រឈមឲ្យបានគ្រប់ជ្រុងជ្រោយ និង កំណត់បាននូវទិសដៅរួមមួយ ក្នុងការដោះស្រាយបញ្ហាការងារ និងមុខរបររបស់យុវជនក្នុងខេត្ត ឲ្យមានប្រសិទ្ធផល និង ស័ក្តសិទ្ធភាព។
បើតាមការបញ្ជាក់ពី លោក ណែប សេថៃ តំណាងឲ្យ វិទ្យាស្ថានតស៊ូមតិ និងគោលនយោបាយ បានឲ្យដឹងថា លទ្ធផលនៃការស្ទង់មតិនេះ គឺជារបកគំហើញរបស់យុវជនខេត្តសៀមរាប ដើម្បីដាក់ចូលក្នុងកិច្ចសន្ទនា ពិភាក្សាជាមួយអាជ្ញាធរ ពុំមែនជាការស្រាវជ្រាវគ្រប់ជ្រុងជ្រោយនោះឡើយ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
